PʼɅTʼESAN JIÑI A ÑUJPUÑEL
Pʼʌtʼesan jiñi a ñujpuñel
Jiñi Biblia miʼ yʌl: «Cheʼ ti lac bajñel, tsʼitaʼ jach mi mejlel lac mel. Cheʼ chaʼtiquilonla cabʌl mi mejlel. Mi tsaʼ yajli juntiquil miʼ tech letsel i piʼʌl» (Eclesiastés 4:9, 10). Jiñi wiñic yicʼot i yijñam mach yomic lajalob bajcheʼ xʼalasob i contrajoʼ bʌ i bʌ, yom lajalob bajcheʼ xʼalasob jumpʼejl jach bʌ equipo añob.
Chaʼlenla wersa chaʼan maʼañic mi laʼ melben laʼ bʌ mach bʌ weñic cheʼ bʌ woliʼ wen aqʼuetla ti pensar jiñi laʼ wocol tac. Mi caj i ñumen coltañetla mi laʼ wujilʌch pijt yicʼot mi mucʼʌch laʼ chʼʌm laʼ bʌ ti ñuc.
Junyaj ti jumpʼejl semana miʼ mejlel laʼ wʌl jiñi laʼ wocol tac. Mach laʼ wʌl majqui i mul, tojʼesan jachla jiñi wocol.
Temel yom mi laʼ mel jiñi muʼ bʌ laʼ mulan.
Cʼajtesanla jiñi utsʼatax bʌ tsaʼ laʼ ñusa. Tajol miʼ mejlel laʼ qʼuel jiñi foto tac cheʼ bʌ tsaʼ ñujpuñiyetla o yambʌ.
«Tajol jumpʼejl xñujpuñel mach junlajalic chuqui miʼ ñaʼtañob, pero jiñi mach yomic i yʌl chaʼan mach mejlobic ti sujtel ti jumpʼejl equipo. Añʌch chuqui miʼ mejlel i ñaʼtañob i mel i miʼ chaʼleñob wersa chaʼan weñʌch miʼ loqʼuel» (David).
MACH A ÑAJTʼESAN A BɅ TI A WAMIGOJOB
Mach a ñajtʼesan a bʌ ti a wamigojob
Mach a pijtan chaʼan jiñi a wamigojob miʼ coltañetob. Coltañob jaʼel. Mi caj a bajñel coltan a bʌ mi mucʼʌch a coltan yañoʼ bʌ.
Ti jujumpʼejl qʼuin pejcan jiñi a wamigojob chaʼan maʼ ñaʼtan bajcheʼ yilal añob.
Cʼajtiben jiñi a wamigojob bajcheʼ an i lʌtʼʌyob jiñi wocol tac lʌcʼʌ lajal bʌ bajcheʼ a chaʼan.
«Jiñi wocol tac miʼ mejlel lac lajin bajcheʼ icʼ jaʼal. Cheʼ bʌ jiñi jaʼal yicʼot jiñi icʼ maʼañic chuqui miʼ yʌqʼueñonla laj qʼuel, jiñi la camigojob miʼ mejlel i coltañoñobla chaʼan mi lac ñaʼtan baqui añonla yicʼot baqui yom mi lac majlel. Anquese jin jach miʼ subeñoñobla jiñi la cujilix bʌ. Jiñi la camigojob mucʼʌch i cʼuxbiñoñobla i yujilob chaʼan mucʼʌch laj cʼuxbiñob jaʼel» (Nicole).
CHʼɅMBEN I SUJM JIÑI A WALOBILOB
Chʼʌmben i sujm jiñi a walobilob
Jiñi Biblia miʼ yʌl: «Yom chajpʌbiletla chaʼan mi laʼ ñʌchʼtan tʼan, pero mach ti orajic yom mi laʼ jacʼ» (Santiago 1:19 ). Tajol jiñi a walobilob mach yomic i yʌlob jiñi muʼ bʌ i pensariñob o jiñi muʼ bʌ i bʌcʼñañob. Pero mi mucʼʌch a wen ñʌchʼtañob, mach wocolic mi caj i yubiñob chaʼan miʼ yʌlob bajcheʼ yubil miʼ yubiñob.
Coltan jiñi a walobilob chaʼan tijicña miʼ yubiñob i bʌ cheʼ bʌ mi caj a pejcañob. Tajol miʼ mulañob tʼan baqui tijicña miʼ yubiñob i bʌ, jumpʼejl ejemplo, cheʼ bʌ woliyetla ti xʌmbal o woli laʼ majlel ti carro, i mach jiñic cheʼ bʌ jiñi i tat i ñaʼ miʼ buchchocoñob cheʼ bʌ yom i pejcañob.
Wen qʼuele chaʼan jiñi a walobilob maʼañic woliʼ wen ubiñob noticia tac mach bʌ weñic.
Subeñob chuqui woli a mel chaʼan cʌntʌbil miʼ yajñel jiñi laʼ familia.
Chajpan chuqui mi caj a mel cheʼ baʼ ora miʼ yujtel wocol i chaʼlen ti ensayar a wicʼot a walobilob.
«Chaʼlen tʼan a wicʼot jiñi a walobilob i acʼʌyob ti tʼan. Tajol woliyob ti bʌqʼuen, michʼob i maʼañic miʼ subeñetob. Subeñob chaʼan cheʼʌch maʼ wubin jaʼel yicʼot chuqui an a mele chaʼan tijicña maʼ wubin a bʌ» (Bethany).