WOCOL TAC TI PAÑIMIL

4 | Mach a sʌt a pijtaya

¿CHUCOCH ÑUC I CʼɅJÑIBAL?

Tiʼ caj muʼ bʌ lac ñusan mi lac mejlel ti cʼamʼan yicʼot lac taj lac chʼijyemlel. Jin chaʼan cabʌlob tsaʼix i sʌtʌyob i pijtaya. ¿Chuqui miʼ yujtel?

An mach bʌ yomobix i ñaʼtan chaʼan jiñi talto bʌ qʼuin.
Yambʌlob miʼ wen tech i japob lembal yicʼot i cʼʌñob droga.
An yambʌlob muʼ bʌ i ñaʼtañob chaʼan maʼañix i cʼʌjñibal cheʼ bej cuxulobto i miʼ yʌlob: «¿Chuquito i cʼʌjñibal mic bej chaʼlen wersa?».

¿A wujilix ba?

Tajol jiñi wocol tac woli bʌ a ñusan mucʼʌch caj i tojʼan.
Mi mach cheʼic miʼ yujtel, añʌch chuqui miʼ mejlel a mel chaʼan maʼ ñusan majlel.
Jiñi Biblia miʼ yʌl chaʼan pejtelel jiñi wocol tac mi caj i jilel.

¿Chuqui miʼ mejlel a mel?

Jiñi Biblia miʼ yʌl: «Mach laʼ cʼojoʼtan chuqui mi caj i yujtel ijcʼʌl come yambʌyix chuqui mi caj laʼ cʼojoʼtan. Jasʌl jach jiñi wocol tac am bʌ ti jujumpʼejl qʼuin» (Mateo 6:34).

Mach a cʌlʌx cʼojoʼtan muʼ bʌ caj i yujtel tiʼ yijcʼʌlel, mele jach jiñi yom bʌ maʼ mel ti jiñi bʌ qʼuin.

Cheʼ mi laj cʌlʌx cʼojoʼtan jiñi mach tac bʌ weñic miʼ mejlel ti ujtel, mucʼ jach i ticʼlañonla yicʼot miʼ yʌqʼueñonla lac sʌt lac pijtaya.

¿BAJCHEʼ MIʼ MEJLEL A LɅTʼ? Ticʼojel tac

ÑAʼTAN JACH CHUQUI WEM BɅ MIʼ YUJTEL

Jiñi Biblia miʼ yʌl: «Wocol jax miʼ ñusan qʼuin jini woli bʌ ti wocol, pero woli ti qʼuiñijel tiʼ pejtelel ora jini tijicña bʌ i pusicʼal» (Proverbios 15:15). Mi cojach maʼ ñaʼtan a wocol, tajol maʼañic mi caj a taj a qʼuel chaʼan mucʼʌch i mejlel ti tojʼan. Pero mi wen jach bajcheʼ yilal maʼ qʼuel, mi caj i mejlel a tojʼesan.

Mach a cʌlʌx qʼuel noticia tac.
Cheʼ bʌ miʼ yujtel jiñi qʼuin, ñaʼtan chaʼpʼej uxpʼejl chuqui wem bʌ tsaʼ taja.
Mele jumpʼejl lista chaʼan muʼ bʌ caj a mel ti jiñi qʼuin, i cheʼ bajcheʼ jiñi mi cajel a ñaʼtan chuqui mi caj a ñaxan mel. I cheʼ bajcheʼ jiñi mi caj a qʼuel chuqui tac tsaʼ mele.

CʼAJTIN A COLTɅNTEL

Jiñi Biblia miʼ yʌl: «Jini muʼ bʌ i tʌtsʼ loqʼuel i bʌ baʼan i piʼʌlob [...] i contrajʌch weñoʼ bʌ i pusicʼal» (Proverbios 18:1). Maʼañic majqui miʼ mejlel ti bajñel loqʼuel ti wocol, wersa yom coltʌntel.

Cʼajtiben coltaya a familia o a wamigojob.
Ñaʼtan chaʼan mucʼʌch a mejlel a coltañob jaʼel. Mi mucʼʌch a coltan yambʌlob, mi caj i coltañet chaʼan pʼisbil jach bajcheʼ yilal maʼ qʼuel a wocol.
Cheʼ bʌ maʼañix a pijtaya maʼ wubin yicʼot chaʼan maʼañix i cʼʌjñibal cheʼ cuxulet, yomʌch maʼ majlel ti doctor. Mi cheʼ maʼ wubin bajcheʼ jiñi yom i yʌl chaʼan cʼamet. An añʌch bʌ i coltayob cheʼ miʼ chʼʌmob tsʼac.a

a Jiñi revista ¡Jamʌx a wut! maʼañic miʼ yʌl chuqui ti tsʼac yom maʼ chʼʌm.

Jiñi Biblia miʼ yʌqʼueñonla i sujm bʌ lac pijtaya

Jiñi tsaʼ bʌ i tsʼijbu jumpʼejl salmo o cʼay am bʌ yaʼ ti Biblia tiʼ sube Dios: «Jini a tʼan lajalʌch bajcheʼ lámpara chaʼan coc. I sʌclelʌch c bijlel» (Salmo 119:105). ¿Chuqui yom i yʌl jiñi?

Jumpʼejl foco miʼ mejlel i coltañonla laj qʼuel lac bijlel cheʼ ti acʼʌlel. Cheʼ jaʼel, jiñi Biblia miʼ yʌqʼueñonla wen tac bʌ ticʼojel muʼ bʌ i coltañonla cheʼ bʌ an chuqui woli lac ñaʼtan lac mel.

Jumpʼejl foco miʼ coltañonla lac ñajti qʼuel jiñi lac bijlel. Cheʼ jaʼel, jiñi Biblia miʼ pʌsbeñonla muʼ bʌ caj i yujtel ti talto bʌ qʼuin.

Jiñi Biblia chʼujulʌch pero mach cojach miʼ yʌl bajcheʼ tsaʼ tejchi ili pañimil. Cheʼ jaʼel, miʼ yʌqʼueñonla i sujm bʌ lac pijtaya. Miʼ jacʼ ili cʼajtiya tac:

¿Bajcheʼ?

¿Bajcheʼ tsaʼ tejchi jiñi wocol? Jiñi Biblia miʼ yʌl: «Tiʼ tojlel juntiquil wiñic, jiñi mulil tsaʼ ochi ti pañimil i tiʼ caj jiñi mulil tsaʼ ochi jiñi chʌmel, i cheʼʌch tsaʼ pam pujqui jiñi chʌmel tiʼ tojlel pejtelel wiñicob come tiʼ pejtelelob tsiʼ chaʼleyob mulil» (Romanos 5:12).

¿Chucoch?

¿Chucoch jiñi wiñicob maʼañic miʼ mejlel i tojʼesañob jiñi wocol tac? Jiñi Biblia miʼ yʌl: «C Yum, cujil maʼanic i ñaʼtʌbal winic chaʼan miʼ bajñel tojʼesan majlel i bʌ. Mach mejlic i bajñel yajcan i bijlel» (Jeremías 10:23). Jiñi woli bʌ i yujtel ili ora miʼ pʌs chaʼan i sujmʌch iliyi.

¿Chuqui?

¿Chuqui mi caj i mel Dios chaʼan miʼ tojʼesan pejtelel jiñi wocol? Jiñi Biblia miʼ yʌl: «Mi caj i sujcubeñob i yaʼlel i wut, maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel» (Apocalipsis 21:4).