Carta i chaʼan Junmojt muʼ bʌ i pʌsob bij

Tiʼ pejtelel muʼ bʌ i cʼuxbiñob Jehová:

Jesús tsiʼ yʌlʌ: «[Jatetla] mi caj laʼ cʌn i sujmlel c tʼan. I sujmlel c tʼan mi caj i yʌqʼuetla ti colel» (Juan 8:32). ¡Miʼ wen aqʼueñonla lac tijicñʌyel ili tʼan! Mucʼʌch i mejlel lac taj jiñi i sujmlel, anquese ti ili «cojix bʌ qʼuin tac» wen wocol come ñumen pʼojlemix jiñi lot (2 Timoteo 3:1). Cheʼ jaʼel, miʼ yʌqʼueñonla lac tijicñʌyel cheʼ mi laj cʼajtesan bajcheʼ yubil tsaʼ laj cubi cheʼ bʌ tsaʼ cʼoti laj cʌn jiñi sujmlel am bʌ tiʼ Tʼan Dios. ¡Wen utsʼatax tsaʼ laj cubi!

Pero mach jasʌlic cheʼ la cujilix jiñi i sujmlel yicʼot chaʼan woli lac chaʼlen wersa lac puc ñumel. Yom mi lac chumtan. Yom mi lac chʌn ajñel tiʼ cʼuxbiya Dios. Pero ¿bajcheʼ mi caj lac chʌn ajñel tiʼ cʼuxbiya? Jesús tsiʼ yʌcʼʌ i jacʼbal ti jiñi cojix bʌ acʼʌlel cheʼ bʌ lʌcʼʌlix mi caj i tsʌnsañob, tsiʼ sube jiñi xucʼul bʌ i apóstolob: «Mi woli laʼ jacʼbeñon c mandar, mi caj c chʌn cʼuxbiñetla. Cheʼ jaʼel tsac jacʼbe i mandar c Tat. Wolic chʌn cʼuxbintel tic Tat» (Juan 15:10).

¿Tsaʼ ba laj qʼuele chuqui tsiʼ colta Jesús chaʼan miʼ chʌn ajñel tiʼ cʼuxbiya Dios? Jiñʌch cheʼ tsiʼ chʌn jacʼbe i mandar i Tat. Cheʼʌch yom mi lac mel jaʼel. Chaʼan mi lac chʌn ajñel tiʼ cʼuxbiya Dios, jiñi i sujmlel jiñʌch yom bʌ miʼ tojʼesañonla tiʼ pejtelel chuqui mi lac mel. Cheʼʌch tsiʼ yʌlʌ Jesús ti jiñi acʼʌlel: «Mi laʼ wujilʌch chuqui tsac subeyetla, tijicñayetla cheʼ mi laʼ mel» (Juan 13:17).

Jiñi com bʌ lojon jiñʌch chaʼan ili libro miʼ coltañonla ti lac pejtelel chaʼan mi lac chʌn mel jiñi i sujmlel bʌ i cheʼ jiñi mi lac chʌn ajñel ‹tiʼ cʼuxbiya Dios [...] chaʼan mi lac taj laj cuxtʌlel mach bʌ añic miʼ jilel› (Judas 21).