Jiñi cojix bʌ wocol

Moisés tsiʼ yʌqʼue i tʼan jiñi Faraón chaʼan maʼañix mi caj i chʌn qʼuel. Pero tiʼ sube cʌytʌl: «Cheʼ ti yojlil acʼʌlel, jiñi yʌx alʌlob yaʼ ti Egipto mi caj i chʌmelob, cheʼ bajcheʼ a walobil yicʼot i yalobil jiñi mozojob».

Jehová tiʼ sube jiñi israelob: «Chajpanla jumpʼejl bʌlñʌcʼʌl maʼañic bʌ baʼ laʼ chajpa. Tsʌnsanla i tat tiñʌmeʼ o chivo an jaxto bʌ jumpʼejl jab, i tsijcʌbenla i chʼichʼel yaʼ tiʼ teʼel i tiʼ laʼ wotot. Pojponla i cʼuxula yicʼot caxlan waj maʼañic bʌ i levadurajlel. Yom chajpʌbiletla chaʼan mi laʼ loqʼuel majlel, yom an laʼ pislel yicʼot laʼ warach. Ili acʼʌlel libre mi caj laʼ cʌytʌl». ¿Muʼ baʼ ñaʼtan bajcheʼ cʼamel i tijicñʌyel jiñi israelob?

Cheʼ tiʼ yojlil (xin) acʼʌlel, i yángel Jehová tsaʼ ñumi tiʼ pejtelel otot am bʌ ti Egipto. Yaʼ tiʼ tiʼ otot baʼ maʼan tsijcʌbil jiñi chʼichʼ, tsaʼ chʌmi jiñi ñaxam bʌ alobob. Jiñi ángel maʼañic tiʼ tsʌnsa jiñi alobob yaʼ baqui tsijcʌbilʌch jiñi chʼichʼ. Tiʼ pejtelel añoʼ bʌ i taqʼuin o pʼumpʼuñoʼ bʌ yaʼ ti Egipto tsaʼ chʌmi jiñi ñaxan bʌ i yalobilob. Pero mi juntiquilic tsaʼ chʌmi i yalobil jiñi israelob.

Jiñi ñaxam bʌ i yalobil faraón tsaʼ chʌmi jaʼel. Faraón maʼañix tsaʼ chʌn cujchi i chaʼan i tiʼ sube Moisés yicʼot Aaron: «¡Loqʼuenla wʌʼi! ¡Cucu chʼujutesan laʼ Dios! ¡Pʌyʌla majlel laʼ wʌlacʼ i cucuxla!».

Ti jiñi acʼʌlel petsel jiñi Luna. Tiʼ mojt tiʼ mojt tsaʼ cajiyob ti loqʼuel jiñi israelob yaʼ ti Egipto. An 600 mil wiñicob, cheʼ jaʼel wen cabʌl xʼixicob yicʼot alobob. Cabʌl mach bʌ israelob tsaʼ majliyob jaʼel chaʼan miʼ chʼujutesañob Jehová. ¡Librejix tsaʼ cʌyle jiñi israelob!

Ti jujumpʼejl jab mi caj i chajpañob jiñi bʌlñʌcʼʌl tsaʼ bʌ i chajpayob ti ñaxan chaʼan i cʼajtesʌntel cheʼ bʌ tsaʼ coltʌntiyob ti Jehová. Ili tsaʼ cʌjñi bajcheʼ Pascua.