Miʼ chucob Jesús

Jesús yicʼot jiñi apóstolob tsaʼ majliyob yaʼ ti Olivo wits i tsaʼ ñumiyob yaʼ ti joctʌl Cedrón. Petsel jiñi Luna i ñumeñix tiʼ yojlil (xiñil) acʼʌlel cheʼ bʌ tsaʼ cʼotiyob yaʼ ti pʌcʼʌbʌl Getsemaní, Jesús tsiʼ yʌlʌ: «Ajñenla wʌʼi i yom yʌxʌl laʼ wo». Jesús tiʼ ñajtʼesa i bʌ i tsaʼ ñocle. Wen chʼijiyem tsiʼ yubi i tsiʼ pejca Jehová: «Laʼ mejlic bajcheʼ a wom». Cheʼ jiñi, Jehová tsiʼ chocbe tilel juntiquil ángel chaʼan miʼ pʼʌtʼesan. Ti wiʼil, Jesús tsaʼ chaʼ majli yaʼ baqui an jiñi uxtiquil apóstolob i wʌyʌl tsiʼ tajayob. Jin chaʼan tiʼ subeyob: «¡Chʼojyenla! Mach i yorajlelic wʌyel. I yorajlelix chaʼan mi cʌjqʼuel tiʼ cʼʌb j contrajob».

Ti ora jach tsaʼ cʼoti Judas yicʼot cabʌl wiñicob xʼixicob (quixtañujob) añoʼ bʌ i yespada yicʼot i teʼ. Yujilix baqui miʼ mejlel i taj Jesús come ajñemix yicʼot jiñi apóstolob ti jiñi pʌcʼʌbʌl. Judas tiʼ sube jiñi soldadojob chaʼan mi caj i pʌsbeñob majqui Jesús. Toj tsaʼ majli baʼan Jesús i tiʼ sube: «Maestro», i cheʼ jiñi ti tsʼujtsʼu. Jesús tiʼ sube: «Judas, ¿maʼ tsʼujtsʼuñon chaʼan maʼ wʌcʼon tiʼ cʼʌb j contrajob?».

Jesús tsiʼ yʌcʼʌ i bʌ ti ñaxan i tsiʼ cʼajtibe jiñi wiñicob: «¿Majqui mi laʼ sʌclan?». Tsiʼ jacʼʌyob: «Jesús chʼoyol bʌ ti Nazaret». Jesús tsiʼ jacʼʌ: «Joñoñʌch». Tsaʼ to chaʼ sujtiyob tiʼ pat i tsaʼ ñocleyob. Jesús tsiʼ chaʼ cʼajtibeyob: «¿Majqui mi laʼ sʌclan?». Tsiʼ chaʼ jacʼʌyob: «Jesús chʼoyol bʌ ti Nazaret». Jesús tsiʼ jacʼbeyob: «Tsaʼix c subeyetla chaʼan joñoñʌch. Jin chaʼan, acʼʌla majlel ili wiñicob».

Cheʼ bʌ Pedro tsiʼ qʼuele chuqui woli (choncol) ti ujtel, tsiʼ locʼsa i yespada i tiʼ tsepbe i chiquin jiñi Malco, i yaj eʼtel jiñi ñuc bʌ motomaj. Pero Jesús tsiʼ tʌlbe i chiquin i tiʼ tsʼʌca. Cheʼ jiñi, tiʼ sube Pedro: «Loto a wespada. Mi tsaʼ cʼʌñʌ a wespada, mi caj a tsʌnsʌntel ti espada». Jiñi soldado tsiʼ chucuyob Jesús, tsiʼ cʌchbeyob i cʼʌb i tsaʼ putsʼi jiñi apóstolob. Ti wiʼil, tsiʼ pʌyʌyob majlel Jesús yaʼ baʼan jiñi motomaj Anás. Cabʌl chuqui tsiʼ cʼajtibe Jesús i tsiʼ choco majlel baʼan jiñi ñuc bʌ motomaj Caifás. Pero ¿chuqui tsiʼ chaʼle jiñi apóstolob?