CʼAJTIYA TAC CHAʼAN BɅ JIÑI BIBLIA

¿Am ba i sujmlel laj cuxtʌlel?

¿Am baʼ cʼajtibe a bʌ mi cojach an ti laj cuxtʌlel jiñi alas, eʼtel, ñujpuñel, i cosʌntel alʌl yicʼot ñoxʼan? (Job 14:1, 2.) Yaʼ ti Biblia mi lac taj chaʼan jiñi añoʼ bʌ cabʌl i ñaʼtʌbal an i melbeyob i bʌ jaʼel jiñi cʼajtiya. (Pejcan Eclesiastés 2:11.)

Yom mi lac tsajin bajcheʼ tsaʼ tejchi jiñi laj cuxtʌlel chaʼan mi lac ñaʼtan mi añʌch i cʼʌjñibal. Cabʌl cʼotem i ñaʼtañob chaʼan añʌch majqui tsiʼ meleyonla wen am bʌ i ñaʼtʌbal come an i tsajiyob bajcheʼ melbil jiñi lac sicojc yicʼot lac bʌcʼtal. (Pejcan Salmo 139:14.) Mi cheʼʌchi, añʌch i sujmlel cheʼ tsiʼ meleyonla. Mi caj lac ñumen tajben i sujmlel laj cuxtʌlel cheʼ miʼ cʼotel lac ñaʼtan chucoch tsiʼ meleyonla.

¿Chucoch tsiʼ meleyonla Dios?

Cheʼ bʌ tsiʼ mele Dios jiñi ñaxam bʌ wiñic yicʼot xʼixic, tsiʼ yʌqʼue wen utsʼatax bʌ eʼtel. Yom tsiʼ yʌlʌ chaʼan ili pañimil miʼ butʼob tiʼ yalobilob, miʼ sujtesañob ti jumpʼejl paraíso yicʼot miʼ chumtʌlob tiʼ pejtelel ora. (Pejcan Génesis 1:28, 31.)

Cheʼ bʌ jiñi quixtañujob tsiʼ ñusʌbeyob i mandar Dios, mach yaʼic tsaʼ lajmi jiñi ñaʼtʌbil bʌ i chaʼan, i maʼañic tsiʼ yʌlʌ chaʼan maʼañix mi caj lac taj lac wenlel. Jiñi Biblia miʼ yʌl chaʼan Dios chʌn woli ti eʼtel chaʼan miʼ coltan i wiñicob, i chaʼan miʼ tsʼʌctiyel jiñi tsaʼ bʌ i ñaʼta chaʼan ili Pañimil. Cheʼ jaʼel, yom chaʼan tijicña maʼ chumtʌl, cheʼ bajcheʼ tsiʼ wʌn ñaʼta. (Pejcan Salmo 37:29.) Chaʼan cheʼʌch mi lac chumtʌl cheʼ bajcheʼ ñaʼtʌbil bʌ i chaʼan Dios, jiñi Biblia miʼ subeñonla chuqui yom mi lac mel.