Jiñi tempa bʌ chaʼan subtʼan miʼ pʼʌtʼesañonla, miʼ coltañonla yicʼot miʼ chajpañonla

1. ¿Chucoch miʼ mejlel jiñi tempa bʌ chaʼan subtʼan?

¹ Ti jumpʼejl bʌ qʼuin, Jesús tsiʼ tempa jiñi 70 xcʌntʼañob cheʼ bʌ muʼto caj i majlelob ti subtʼan (Lc. 10:1-11). Tsiʼ pʼʌtʼesayob cheʼ bʌ tiʼ subeyob chaʼan mach i bajñelob, come Jehová, «i yum cʼajbal», mi caj i cʌntesañob. Tiʼ subeyob bajcheʼ yom miʼ melob jiñi eʼtel, i tsiʼ chajpayob chaʼan miʼ majlelob ti «chaʼchaʼtiquil». Jiñi tempa bʌ chaʼan subtʼan ti ili ora lajalʌch bajcheʼ ti wajali: Chaʼan miʼ pʼʌtʼesañonla, miʼ coltañonla i miʼ chajpañonla.

2. ¿Jaypʼejl minuto mi caj i jalʼan jiñi tempa bʌ chaʼan subtʼan?

² Ti ili ora, jiñi tempa bʌ chaʼan subtʼan miʼ jalʼan 10 o 15 minuto. Miʼ yʌjlel baqui miʼ cajel jiñi subtʼan, miʼ chajpʌntel jiñi grupo i miʼ mejlel jiñi oración. Pero mi caj i jalʼan 5 o 7 minuto, i mi caj i tejchel ti abril. Mi ujtel jax to i mejlel yambʌ tempa bʌ yaʼ ti congregación mach taja 5 o 7 minuto mi caj i jalʼan, come jiñi xsubtʼañob tsaʼix i wen ñʌchʼtʌbeyob i tʼan Dios. Cheʼ maʼañix mi caj i jalʼan jiñi tempa bʌ chaʼan subtʼan, mi caj i coltañonla chaʼan mi lac ñumen chaʼlen subtʼan. Cheʼ jaʼel, mi sʌcʼan tsiʼ techeyob subtʼan jiñi precursorob yicʼot xsubtʼañob, jumucʼ jach mi caj i cʌyob subtʼan chaʼan miʼ majlelob ti jiñi tempa bʌ.

3. ¿Bajcheʼ yom miʼ chajpʌntel jiñi tempa bʌ chaʼan subtʼan?

³ Jiñi tempa bʌ chaʼan subtʼan yom wen chajpʌbil chaʼan miʼ coltan jiñi xsubtʼañob. Cabʌl congregación ñumen wen miʼ qʼuelob cheʼ ti grupo tac miʼ tempañob i bʌ chaʼan mach ñajtic baʼ miʼ melob jiñi tempa i bʌ yicʼot jiñi territorio. Cheʼ jaʼel, mach wocolic mi caj i subentel chuqui yom miʼ melob jiñi hermanojob yicʼot jiñi añoʼ bʌ tiʼ wenta jiñi grupo mi caj i qʼuelob ti jujuntiquil jiñi xsubtʼañob. Jiñi ancianojob mi caj i qʼuelob baqui bʌ ñumen wen chaʼan jiñi congregación. Cheʼ miʼ yujtel jiñi tempa bʌ yicʼot oración, yom yujilobix baqui miʼ cajel subtʼan yicʼot majqui i piʼʌlob.

4. ¿Chucoch ñucʌch i cʼʌjñibal jiñi tempa bʌ chaʼan subtʼan bajcheʼ yan tac bʌ tempa bʌ?

⁴ Ñuc i cʼʌjñibal bajcheʼ yan tac bʌ tempa bʌ. Ti ili tempa bʌ cojach miʼ majlelob jiñi xsubtʼañob, mach chaʼañic tiʼ pejtelel jiñi congregación. Pero ili mach yomic yʌl chaʼan bajcheʼ jach mi caj i mejlel come i cʼʌjñibalʌch bajcheʼ yan tac bʌ tempa bʌ. Lac majtañʌch tilem bʌ ti Jehová baʼ mi laj cʌntesʌntel laj cʼuxbin lac bʌ yicʼot chaʼan mi lac mel chuqui wen (He. 10:24, 25). Jiñi muʼ bʌ i melob ili tempa bʌ yom wen chajpʌbilob chaʼan miʼ yʌjqʼuel ti ñuc Jehová yicʼot chaʼan miʼ tajob i wenlel jiñi xsubtʼañob. Yom mi lac chaʼlen wersa chaʼan mi lac majlel ti ili tempa bʌ chaʼan subtʼan.

Jiñi tempa bʌ chaʼan subtʼan mach bajcheʼ jach yom miʼ mejlel come i cʼʌjñibalʌch bajcheʼ yan tac bʌ tempa bʌ

5. a) ¿Chuqui yom miʼ mel jiñi am tiʼ wenta jiñi subtʼan cheʼ miʼ chajpan jiñi tempa bʌ? b) ¿Bajcheʼ yom miʼ melob jiñi hermanajob jiñi tempa bʌ chaʼan subtʼan?

⁵ ¿Bajcheʼ yom miʼ mejlel? Cheʼ an majqui mi caj i ñusan jumpʼejl asignación, jalto mach cʼot i yorajlel miʼ wen chajpan i bʌ. Cheʼʌch miʼ mejlel jaʼel chaʼan jiñi tempa bʌ chaʼan subtʼan. Cheʼ mach junlajalic baʼ miʼ tempañob i bʌ jiñi grupo tac, jiñi tempa bʌ chaʼan subtʼan mi caj i mel jiñi am bʌ ti wenta jiñi grupo o jiñi xcoltaya i chaʼan. Pero cheʼ bʌ miʼ tempañob i bʌ tiʼ pejtelel jiñi grupo tac, jiñi am bʌ tiʼ wenta jiñi subtʼan mi caj i suben juntiquil hermano chaʼan miʼ mel jiñi tempa bʌ. Jiñi am bʌ tiʼ wenta jiñi subtʼan miʼ mejlel i mel jumpʼejl programa chaʼan miʼ yʌqʼuen i copiajlel jiñi muʼ bʌ caj i melob jiñi tempa bʌ i yom miʼ lʌpʼ yaʼ ti tablero. Jiñi am bʌ tiʼ wenta jiñi subtʼan yom miʼ wen qʼuel majqui mi caj i mel jiñi tempa bʌ come yom miʼ mel juntiquil wen yujil bʌ cʌntesa yicʼot muʼ bʌ i wen chajpan i bʌ. Mi maʼañic mi caj i loqʼuel ti subtʼan jiñi anciano, siervo ministerial o yambʌ hermano tsaʼix bʌ i chʼʌmʌ jaʼ pero yajcʌbil bʌ ti ancianojob, jiñi am bʌ tiʼ wenta jiñi subtʼan yom miʼ suben juntiquil hermana añix bʌ i ñaʼtʌbal ti subtʼan chaʼan miʼ mel jiñi tempa bʌ. (Qʼuele jiñi parte «Mi juntiquil hermana mi caj i mel jiñi tempa bʌ».)

6. ¿Chucoch yom wen chajpʌbil jiñi muʼ bʌ i mel jiñi tempa bʌ?

⁶ Cheʼ mi la cʌqʼuentel jumpʼejl asignación yaʼ ti Escuela chaʼan bʌ i Yeʼtel Dios o ti Tempa bʌ baʼ mi laj cʌntesʌntel chaʼan subtʼan, mi lac chajpan lac bʌ i mi laj qʼuel ti ñuc. Mach jinto cheʼ yaʼix lac majlel ti tempa bʌ mi lac ñaʼtan chuqui mi caj la cʌl. Cheʼʌch yom jaʼel cheʼ mi lac taj lac mel jiñi tempa bʌ chaʼan subtʼan. Come maʼañix mi caj i jalʼan, yom wen chajpʌbil chaʼan miʼ pʼʌtʼesañonla i chaʼan maʼañic miʼ ñumel ti pʼis jiñi ora. Cheʼ bʌ maxto caj jiñi tempa bʌ yom ñaʼtʌbilix baqui miʼ cajel jiñi subtʼan.

7. ¿Chuqui miʼ mejlel ti alol yaʼ ti tempa bʌ chaʼan subtʼan?

⁷ ¿Chuqui yom miʼ yʌjlel? Mach lajalic jiñi territorio tac, jin chaʼan jiñi xucʼul bʌ xʼeʼtel maʼañic melbil i chaʼan bosquejo tac chaʼan yom bʌ miʼ yʌjlel ti jujumpʼejl tempa bʌ chaʼan subtʼan. Jiñi recuadro «Muʼ bʌ i mejlel ti alol yaʼ ti tempa bʌ chaʼan subtʼan» miʼ coltañonla. Jiñi tempa bʌ chaʼan subtʼan miʼ tsajintel yicʼot yaʼ bʌ tempʌbilob. An tajol mi caj i ñusʌntel demostración o video chaʼan bʌ subtʼan am bʌ ti jw.org/ctu. Jiñi muʼ bʌ caj i mel jiñi tempa bʌ yom miʼ ñaʼtan chuqui mi caj i pʼʌtʼesan yicʼot i cʌntesan jiñi xsubtʼañob.

Cheʼ miʼ chajpan i bʌ jiñi muʼ bʌ caj i mel jiñi tempa bʌ, yom miʼ ñaʼtan chuqui mi caj i pʼʌtʼesan yicʼot i cʌntesan jiñi xsubtʼañob

8. ¿Chuqui yom miʼ yʌjlel yaʼ ti tempa bʌ cheʼ tiʼ yujtibal semana?

⁸ Cabʌl xsubtʼañob miʼ pucob jiñi La Atalaya cheʼ ti sábado. Mi an ti español jiñi revista, yom mi laʼ puc yaʼ baʼ yujilob jiñi tʼan miʼ maʼañic congregación ti español yaʼi. Ñumen wen cheʼ jin mi lac puc jiñi jun tac am bʌ ti lac tʼan. Cabʌl miʼ loqʼuelob ti subtʼan cheʼ ti sábado come mach mejlobic cheʼ ti semana, tajol wocol miʼ cʼajtesañob jiñi subtʼan tsaʼ bʌ i ñopoyob yaʼ ti chʼujutesaya ti familia. Jin chaʼan, mi caj i coltan jiñi xsubtʼañob mi mucʼʌch i chaʼ cʼajtesʌntel jiñi demostración tac am bʌ yaʼ ti La Queʼtel tiʼ chaʼan bʌ Dios. Yambʌ muʼ bʌ i mejlel ti alol jiñʌch bajcheʼ miʼ mejlel laj cʼʌn jumpʼejl noticia, qʼuiñijel o yan tac bʌ cheʼ mi lac puc jiñi revista tac. Miʼ mejlel ti alol jaʼel bajcheʼ miʼ mejlel lac chaʼ julaʼtan jiñi tsaʼ bʌ laj cʌybe revista tac. Mi an xsubtʼañob tsaʼix bʌ i pucuyob jiñi revista tac ti jiñi uw, miʼ mejlel i cʼajtibentelob bajcheʼ tsiʼ pucuyob o chuqui wen tac bʌ tsiʼ ñusayob yaʼ ti subtʼan. Cheʼʌch miʼ mejlel ti melol jaʼel ti domingo chaʼan i pucol jiñi jun tac ti jiñi uw. Jiñi folleto muʼ bʌ laj cʼʌn ti pʌs estudio cheʼ bajcheʼ Jini wen tʼan yicʼot Ñichʼtan Dios o jiñi Enseña, miʼ mejlel ti cʼʌñol ti baqui jach bʌ qʼuin, i miʼ mejlel ti alol yaʼ ti tempa bʌ bajcheʼ miʼ mejlel ti pucol.

9. Mi woli ti ñuc bʌ subtʼan jiñi congregación, ¿chuqui miʼ mejlel ti alol tiʼ yujtibal jiñi semana?

⁹ Mi woli ti ñuc bʌ subtʼan jiñi congregación, tiʼ yujtibal jiñi semana miʼ mejlel ti alol bajcheʼ miʼ mejlel ti pucol jiñi jun tac chaʼan bʌ lac pʌyol o tratado tac woli bʌ ti cʼʌjñel ti jiñi ñuc bʌ subtʼan yicʼot jiñi revista tac, o chuqui miʼ mejlel lac mel mi an tsaʼ bʌ i wen ñʌchʼta jiñi wen tʼan. Miʼ mejlel ti alol jaʼel experiencia tac baʼ miʼ pʌs chaʼan i cʼʌjñibalʌch jiñi ñuc bʌ subtʼan.

10, 11. ¿Chucoch yom miʼ chajpañob i bʌ jiñi xsubtʼañob chaʼan jiñi tempa bʌ?

¹⁰ ¿Bajcheʼ yom miʼ chajpañob i bʌ jiñi xsubtʼañob? Mi mucʼʌch i majlelob ti tempa bʌ chaʼan subtʼan tiʼ pejtelel mi caj i tajob i wenlel. Mi mucʼʌch i wen chajpañob i bʌ, tajol yaʼ ti chʼujutesaya ti familia, mi caj i yʌcʼob i comentario yaʼ ti tempa bʌ. Yom mi lac ñaxan chʼʌm jiñi jun tac muʼ bʌ caj laj cʼʌn cheʼ muʼto i cajel jiñi tempa bʌ chaʼan ora mi lac majlel yaʼ ti territorio.

¹¹ Ñuc i cʼʌjñibal jaʼel cheʼ mi laj cʼotel ti jiñi tempa bʌ chaʼan subtʼan cheʼ bʌ maxto tejchem, cheʼʌch bajcheʼ mi lac mel ti yan tac bʌ tempa bʌ. Mi tejchemix jiñi tempa bʌ cheʼ mi laj cʼotel chaʼan jach ti laj caj miʼ mejlel ti qʼuextʌyel jiñi ñaʼtʌbilix. ¿Chucoch? Jiñi hermano muʼ bʌ caj i ñusan jiñi tempa bʌ an cabʌl chuqui tac miʼ qʼuel cheʼ bʌ muʼto caj i locʼ jiñi grupo. Jumpʼejl ejemplo, mi mach cabʌlic yaʼañob ti tempa bʌ, tajol mi caj i chocob majlel ti jumpʼejl territorio baqui maxto ujtemic ti subol. Mi ñajt jiñi territorio, tajol mi caj i choc majlel jiñi xsubtʼañob yicʼot añoʼ bʌ i carro. Mi bʌbʌqʼuen jax jiñi territorio, tajol mi caj i suben jiñi hermanojob chaʼan lʌcʼʌl miʼ yajñelob yaʼ baqui an jiñi hermanajob. Mi an cʼam bʌ xsubtʼan, miʼ mejlel ti chojquel majlel yaʼ baʼ tojach jiñi calle o ti otot tac baʼ maʼañic escalera. Jiñi tsijib to bʌ xsubtʼañob miʼ mejlelob ti loqʼuel yicʼot jiñi añobix bʌ i ñaʼtʌbal. Pero mi tejchemix jiñi tempa bʌ cheʼ mi laj cʼotel, jiñi hermano tajol mi caj i qʼuextan jiñi ñaʼtʌbilix bʌ i chaʼan i mi caj i qʼuextan jiñi añobix bʌ i piʼʌl ti subtʼan. Isujmʌch, an tajol añʌch chucoch tejchemix jiñi tempa bʌ cheʼ mi laj cʼotel. Pero mi tiʼ pejtelel ora cheʼ mi lac mel bajcheʼ jiñi, ¿chaʼan ba maʼañic mi laj qʼuel ti ñuc jiñi tempa bʌ o chaʼan maʼañic mi lac chajpan lac bʌ?

12. Mi juntiquil jach muʼ bʌ lac loqʼuel la quicʼot tiʼ pejtelel ora, ¿chuqui miʼ mejlel lac mel?

¹² Jiñi xsubtʼañob miʼ mejlel i wʌn subeñob yambʌlob chaʼan miʼ loqʼuelob ti subtʼan o miʼ mejlel i pijtañob chaʼan yaʼ to ti tempa bʌ miʼ subentelob. Pero mi juntiquil jach muʼ bʌ i loqʼuel la quicʼot tiʼ pejtelel ora, ¿muʼ ba lac mejlel ti loqʼuel la quicʼot yambʌlob? (2 Co. 6:11-13.) ¿Muʼ ba lac mejlel ti loqʼuel la quicʼot juntiquil tsijib to bʌ xsubtʼan chaʼan mi laj coltan ti sujtel ti wem bʌ xcʌntesa? (1 Co. 10:24; 1 Ti. 4:13, 15.) Ti jiñi tempa bʌ mi lac subentel tʼan tac yom bʌ mi lac ñʌchʼtan, cheʼ bajcheʼ baqui mi caj lac tech subtʼan. Cheʼ miʼ yujtel jiñi tempa bʌ, mach laj qʼuextan jiñi tsaʼix bʌ ajli i yom ti ora mi lac majlel yaʼ ti territorio.

13. Mi mucʼʌch lac chaʼlen wersa ti lac pejtelel, ¿bajcheʼ mi caj i coltañonla jiñi tempa bʌ chaʼan subtʼan?

¹³ ‹Tijicña tsaʼ sujtiyob› ti subtʼan jiñi xcʌntʼañob i chaʼan Jesús (Lc. 10:17). Jiñi tempa bʌ tsaʼ bʌ i mele Jesús cheʼ bʌ muʼto caj i majlelob ti subtʼan, tsiʼ wen coltayob. Jiñi tempa bʌ chaʼan subtʼan ti ili ora miʼ coltañonla jaʼel. Mi mucʼʌch lac chaʼlen wersa ti lac pejtelel, ili tempa bʌ mi caj i pʼʌtʼesañonla yicʼot i cʌntesañonla chaʼan mi lac wen chajpan lac bʌ ‹tiʼ subol jiñi wen tʼan tiʼ pejtelel pañimil› (Mt. 24:14).

Mi juntiquil hermana mi caj i mel jiñi tempa bʌ

Jiñi hermana yom miʼ mos i jol i yom miʼ buchtʌl. Lajal bʌ temaj mi caj i yʌl bajcheʼ juntiquil hermano. Anquese maʼañic mi caj i pʌs chaʼan woli ti cʌntesa, miʼ mejlel i tech tʼan tiʼ tojlel jumpʼejl temaj yicʼot yaʼ bʌ tempʌbilob. Mi yambʌ hermana miʼ mel jiñi oración, yom miʼ mos i jol jaʼel. Mi tsaʼ cʼoti juntiquil hermano cheʼ woliʼ mel jiñi tempa bʌ, jiñi hermana mi caj i suben chaʼan jiñix miʼ yujtesan. Jiñi am bʌ tiʼ wenta jiñi subtʼan yom miʼ qʼuel chaʼan maʼañic miʼ yujtel bajcheʼ jiñi, chaʼan maʼañic majqui lecoj miʼ yubin i bʌ. Ejemplo: Tajol yaʼan juntiquil chʼiton tsaʼix bʌ i chʼʌmʌ jaʼ cheʼ bʌ jiñi hermana miʼ mel jiñi tempa bʌ. Mi jiñi ancianojob mi yʌlob chaʼan maxto chajpʌbilic jiñi chʼiton chaʼan miʼ mel jiñi tempa bʌ pero mi chajpʌbilʌch chaʼan miʼ mel jiñi oración, jiñi am bʌ ti wenta jiñi subtʼan mi caj i suben jiñi hermana chaʼan miʼ mel jiñi tempa bʌ, pero jiñi oración mi caj i mel jiñi chʼiton. O tajol yaʼan juntiquil hermano mach bʌ mejlic i mel jiñi tempa bʌ o jiñi oración chaʼan tiʼ caj jumpʼejl wocol cojach bʌ yujil jiñi ancianojob. Jiñi ancianojob maʼañic mi caj i yʌlob chuqui ti wocol an i chaʼan jiñi hermano, cojach mi caj i subeñob jiñi hermana chaʼan miʼ mel jiñi tempa bʌ yicʼot jiñi oración anquese yaʼan jiñi hermano. Jiñi ancianojob jaʼel yom miʼ subeñob jiñi hermano chuqui ti qʼuin mi taj i melob tempa bʌ jiñi hermanajob.

Muʼ bʌ i mejlel ti alol yaʼ ti tempa bʌ chaʼan subtʼan:

Demostración loqʼuem bʌ ti La Queʼtel tiʼ chaʼan bʌ Dios.
Video chaʼan subtʼan am bʌ ti jw.org/ctu.
I tsictesʌntel bajcheʼ miʼ mejlel lac tech tʼan, bajcheʼ miʼ mejlel lac chaʼ julaʼtan jiñi quixtañujob o chaʼan jiñi taqʼuin loqʼuem bʌ tiʼ pusicʼal wiñicob xʼixicob chaʼan jiñi jun tac muʼ bʌ laj cʌy.
Jumpʼejl texto muʼ bʌ i pʼʌtʼesañonla o i cʌntesañonla ti subtʼan.
Experiencia tac muʼ bʌ i yʌjlel yaʼ ti jun tac loqʼuem bʌ ti Biblia o ujtem bʌ ti territorio.
Wen tac bʌ tʼan tsaʼ bʌ qʼuejli ti jumpʼejl temaj yaʼ ti La Queʼtel tiʼ chaʼan bʌ Dios.
Temaj maxto bʌ wajali qʼuejli ti Tempa bʌ baʼ mi laj cʌntesʌntel chaʼan subtʼan.
Temaj chaʼan bʌ subtʼan loqʼuem bʌ ti La Atalaya.
Tʼan tac chaʼan bʌ subtʼan am bʌ ti Benefíciese yicʼot ti «Ven, sé mi seguidor»
Bajcheʼ miʼ cʼʌjñel jw.org/ctu ti subtʼan.
Tʼan o temaj chaʼan bʌ subtʼan am bʌ ti Guía para el estudio de la Palabra de Dios yicʼot Introducción a la Palabra de Dios.
Bajcheʼ miʼ mejlel lac tech tʼan yicʼot juntiquil ateo, evolucionista yicʼot yambʌlob.
Chuqui miʼ mejlel la cʌl cheʼ bʌ mach yomobic i ñʌchʼtañob lac tʼan.
Bajcheʼ miʼ mejlel laj coltan lac piʼʌl ti subtʼan chaʼan ñumen wen miʼ sub jiñi wen tʼan.
Chuqui yom mi lac mel mi tsaʼ lac taja yujil bʌ yambʌ tʼan.
Bajcheʼ miʼ mejlel lac sʌclan yujiloʼ bʌ yambʌ tʼan, bajcheʼ miʼ mejlel lac chaʼlen subtʼan ti teléfono, yaʼ baʼ an cabʌl quixtañujob, bajcheʼ yom mi lac mel revisita o estudio tac.
I cʼajtesʌntel chaʼan mi laj cʌntan lac bʌ, chaʼan la cutslel, chaʼan mi lac ñaʼtan wen tac bʌ tʼan, chaʼan mi lac pʌs wem bʌ lac melbal yicʼot yan tac bʌ.