Muʼ bʌ i mejlel i mel muʼ bʌ i taj i locʼ jiñi grupo chaʼan subtʼan

Jiñi tempa bʌ chaʼan subtʼan yicʼot jiñi tempa bʌ muʼ bʌ i mejlel ti jujumpʼejl semana, jumpʼejlʌch majtañʌl muʼ bʌ i yʌqʼueñonla Jehová muʼ bʌ i coltañonla lac pʌs cʼuxbiya yicʼot chaʼan wen mi lac mel la queʼtel (Heb 10:24, 25). ¿Bajcheʼ cʼamel yom miʼ jalʼan jiñi tempa bʌ chaʼan bʌ subtʼan? Yom miʼ jalʼan 5 o 7 minuto, pero yaʼix ochem cheʼ bʌ miʼ yajcʌntel majqui mi caj i majlelob yicʼotob ti subtʼan, baqui bʌ territorio yicʼot jiñi oración. I mi tsaʼix ujti jumpʼejl tempa bʌ i mi caj i loqʼuelob ti subtʼan, ñumento mach yomic miʼ jalʼañob. Jiñi muʼ bʌ i taj i locʼ jiñi grupo yom miʼ chajpan ti wen chuqui muʼ bʌ caj i yʌl. Jumpʼejl ejemplo, cheʼ ti sábado miʼ mejlel ti ajlel jiñi muʼ bʌ mejlel la cʌl yaʼ ti subtʼan come jiñʌch bʌ qʼuin cheʼ bʌ miʼ ñumen loqʼuelob ti subtʼan jiñi hermanojob. ¿Chuqui yan tac bʌ miʼ mejlel ti alol?

• Miʼ mejlel i cʼʌjñel jiñi muʼ bʌ i mejlel la cʌl am bʌ yaʼ ti Jun chaʼan lac tempa bʌ I Subtʼan yicʼot i Melbal jiñi xÑoptʼan.

• Muʼ bʌ i ñumel ti noticia o mi an chuqui tsaʼ ujti yaʼ baqui chumuletla.

• Jiñi ñʌmʌl bʌ mi laʼ subentel yaʼ ti laʼ territorio.

• Chaʼan bajcheʼ miʼ mejlel laʼ jacʼben juntiquil maʼan bʌ miʼ ñop Dios, muʼ bʌ i ñop chaʼan evolución, yujil bʌ yambʌ tʼan o am bʌ jumpʼejl i ñopbal mach bʌ wen cʌmbilic yaʼ ti laʼ territorio.

• Chaʼan bajcheʼ yom miʼ cʼʌjñel jiñi jw.org, jiñi aplicación JW Library^® o jiñi Biblia.

• Chaʼan bajcheʼ yom miʼ cʼʌjñel jiñi la queʼtijib chaʼan bʌ cʌntesa.

• Chaʼan bajcheʼ yom miʼ laʼ chaʼlen subtʼan ti teléfono, ti carta, baqui miʼ ñumel cabʌl lac piʼʌlob, cheʼ mi laʼ mel revisita o cheʼ mi laʼ wʌcʼ estudio.

• Chaʼan yom miʼ subeñob yom bʌ i ñʌchʼtan jiñi i yum otot, yom miʼ cʌntañob i bʌ, yom wem bʌ i melbalob, wen chuqui miʼ ñaʼtañob yicʼot yan tac bʌ.

• Jumpʼejl cʌntesʌntel o cʼʌñʌ jiñi video am bʌ yaʼ ti folleto Sujten ti ñumen wem bʌ xcʌntesa yicʼot xpejcaya jun.

• Chaʼan bajcheʼ miʼ mejlel laʼ coltan jiñi laʼ piʼʌl ti subtʼan.

• Jumpʼejl texto muʼ bʌ i taj i bʌ yicʼot laʼ subtʼan o jumpʼejl experiencia.