¿Bajcheʼ miʼ subeñonla Dios chuqui tac ñaʼtʌbil i chaʼan?

Cʼʌlʌl cheʼ bʌ Dios tsiʼ mele (pʌtʌ) jiñi lac piʼʌlob, an i cʼʌñʌ jiñi ángelob yicʼot jiñi xʼaltʼañob chaʼan miʼ pejcañonla. Cheʼ jaʼel, tsiʼ yʌcʼʌ ti tsʼijbuntel jiñi i Tʼan yicʼot chuqui ñaʼtʌbil i chaʼan. Dios miʼ subeñonla chaʼan ti jiñi talto bʌ qʼuin tijicña mi caj la cajñel, pero tajol mi laj cʼajtiben lac bʌ: «¿Baqui miʼ mejlel lac taj jiñi ñaʼtʌbil tac bʌ i chaʼan?».

Jiñi muʼ bʌ i subeñonla Dios yaʼ mi lac taj ti jiñi Chʼujul bʌ tsʼijbujel (2 Timoteo 3:16). ¿Bajcheʼ tsiʼ cʼʌñʌ Dios jiñi xʼaltʼañob chaʼan miʼ tsʼijbuñob jiñi i Tʼan? Dios tsiʼ yʌcʼʌ i ñaʼtʌbal tiʼ pensar ili wiñicob chaʼan miʼ tsʼijbuñob (2 Pedro 1:21). Laʼcu lac ñaʼtan iliyi: Mi juntiquil xyaj eʼtel (troñel) miʼ subentel tiʼ yum chaʼan miʼ tsʼijbun jumpʼejl carta, maʼañic miʼ cajel lac ñaʼtan chaʼan jiñi carta i chaʼañʌch jiñi xyaj eʼtel, i chaʼañʌch i yum. Cheʼ jaʼel, anquese Dios tsiʼ cʼʌñʌ wiñicob chaʼan miʼ tsʼijbuñob chuqui tsiʼ yʌlʌ, mach yomic i yʌl chaʼan mach i tʼañic yaʼ bʌ mi lac taj ti jiñi Chʼujul bʌ tsʼijbujel.

MAJQUI JACH MIʼ MEJLEL I TAJ JIÑI I TʼAN DIOS

Wen ñuc i cʼʌjñibal chuqui miʼ yʌl Dios, jin chaʼan yom chaʼan tiʼ pejtelel jiñi lac piʼʌlob miʼ pejcañob yicʼot miʼ chʼʌmbeñob i sujm. Ili ora «jini añoʼ bʌ tiʼ pejtelel tejclum tac yicʼot pejtelel winicob xʼixicob yujiloʼ bʌ tʼan ti chajp ti chajp» miʼ mejlel i yubiñob «jini wen tʼan am bʌ tiʼ pejtelel ora» (Apocalipsis 14:6). Tiʼ coltaya Dios, jiñi i Tʼan an chaʼlenti ti traducir ti tsʼʌcʌl o tʼoxol jaxto ñumen ti 3,000 tʼan tac, ñumento bajcheʼ yan tac bʌ libro.