Woliʼ ñumen pʼojlel jiñi depresión, ansiedad o yan tac bʌ

Ili jiñʌch tsaʼ bʌ i yʌlʌyob añoʼ bʌ i ansiedad, depresión o yambʌ cheʼ bʌ bajcheʼ ili. ¿Cheʼ ba maʼ wubin a bʌ jatet, o a cʌñʌ ba cheʼ bʌ miʼ yubin i bʌ bajcheʼ jiñi?

Mi cheʼʌchi, mach a bajñelic jach, tiʼ petol pañimil (mulawil) cabʌl lac piʼʌlob cheʼʌch miʼ yubiñob i bʌ bajcheʼ jiñi o miʼ ñusañob wocol tiʼ caj añob i familia o i yamigo añoʼ bʌ i chaʼan ili cʼamʌjel tac.

Tsiquil chaʼan ili ora «wen wocol» yicʼot «bʌbʌqʼuen», jin chaʼan cabʌl chuqui miʼ yʌcʼonla ti pensar i mi lac ñusan wocol (2 Timoteo 3:1). Jiñi Organización Mundial de la Salud miʼ yʌl chaʼan ti ocho lac piʼʌlob juntiquil an i chaʼan ansiedad, depresión o yambʌ cheʼ bʌ bajcheʼ iliyi. I tiʼ caj jiñi pandemia chaʼan COVID-19, ti 2020 tsaʼ ñumen pʼojli cheʼ bʌ 78 millón añoʼ bʌ i chaʼan tsʌts bʌ depresión.

Pero mach jiñic ñuc i cʼʌjñibal jaytiquil an i chaʼan ili cʼamʌjel. Ñuc bʌ i cʼʌjñibal jiñʌch chuqui miʼ mejlel a mel (chaʼlen) jatet yicʼot jiñi a cʌñʌ bʌ chaʼan wen miʼ laʼ wajñel.

¿Bajcheʼ yilal juntiquil maʼañic bʌ i chaʼan ansiedad, depresión o yan tac bʌ?

Cheʼ bʌ weñʌch an juntiquil lac piʼʌl, tijicña i mach wocolic miʼ yubin chaʼan miʼ mel i yeʼtel (troñel) ti jujumpʼejl qʼuin. Miʼ mejlel i ñusan jiñi wocol tac, wen miʼ mel i yeʼtel i tijicña tiʼ cuxtʌlel.

¿Chuquiyes jiñi ansiedad yicʼot depresión?

• Mach jumpʼejlic laj cʼunlel.

• Jumpʼejlʌch cʼamʌjel muʼ bʌ i mejlel i yʌcʼ ti cʌlʌx pensar juntiquil lac piʼʌl, miʼ tech i ñaʼtan mach bʌ weñic tiʼ tojlel, maʼañic miʼ mejlel i ticʼ bajcheʼ yubil miʼ yubin yicʼot i melbal (chaʼlibal).

• Tiʼ caj iliyi, maʼañic miʼ mulan i ñochtan yañoʼ bʌ yicʼot maʼañic miʼ tsʼʌctesan i yeʼtel.

• Majqui jach miʼ mejlel i taj, mach yʌlʌyic i jabilel, baqui chʼoyol, i ñopbal, baqui jaxʌl tsiʼ chaʼle clase o bajcheʼ cʼamel i taqʼuin.

Cʼajtin a coltʌntel

An i tajol juntiquil lac piʼʌl miʼ qʼuextʌyel bajcheʼ yilal, bajcheʼ miʼ cʼux i waj o mach cheʼix miʼ wʌyel bajcheʼ ti ñaxan. O tajol añix ora miʼ cʌlʌx chaʼlen pensar o chʼijyem. Mi jatet o juntiquil a cʌñʌ bʌ cheʼ miʼ yubin i bʌ bajcheʼ jiñi, tajol yom maʼ cʼajtin a coltʌntel chaʼan maʼ ñaʼtan chucoch cheʼ maʼ wubin bajcheʼ jiñi i maʼ tajben i tsʼʌcal. Pero ¿baqui miʼ mejlel a cʼajtin a coltʌntel?

Jesucristo, jiñi ñumen am bʌ i ñaʼtʌbal tsaʼ bʌ ñumi ila ti Pañimil, tsiʼ yʌlʌ: «Jiñi cʼocʼoʼ bʌ mach i cʼʌjñibalic i chaʼañob doctor, pero jiñi cʼamoʼ bʌ i cʼʌjñibalʌch i chaʼañob» (Mateo 9:12). Juntiquil doctor yujil bʌ chaʼan ili cʼamʌjel tac miʼ mejlel i coltañet a chaʼ taj a tijicñʌyel i maʼ mel ñʌmʌl bʌ a mel ti ñaxan. Mi tsiquilʌch chaʼan an a chaʼan ili cʼamʌjel o cabʌlix ora a cajel, ñumen wen cheʼ muqʼuix a cʼajtin a coltʌntel.a

Jiñi Biblia mach jumpʼejlic libro chaʼan tsʼac, pero jiñi muʼ bʌ i yʌl mucʼʌch i mejlel i coltañonla. Jiñi yan tac bʌ tema mi caj i yʌl bajcheʼ jiñi Biblia miʼ mejlel i coltañonla cheʼ an lac chaʼan ansiedad, depresión o yan tac bʌ bajcheʼ ili muʼ bʌ i ticʼlan lac pensar. Mic subeñetla chaʼan miʼ laʼ pejcan.