Miʼ mejlel a taj ñʌchʼtʌlel anquese an guerra tac yicʼot jontolil
Gary, soldado bʌ ti wajali, miʼ yʌl: «Cheʼ bʌ maxto mucʼoñic ti estudio, maʼañic mic ñaʼtan chucoch cʌlʌxix wocol, jontolil yicʼot ticʼlʌntel. Pero wʌle añix i ñʌchʼtʌlel c pusicʼal yicʼot cujil chaʼan Jehová mi caj i sujtesan ili lum ti jumpʼejl utsʼatax bʌ lac chumlib».
Cabʌlob cheʼ bʌ miʼ yubiñob i bʌ bajcheʼ Gary. Laʼ laj qʼuel bajcheʼ an i coltayob muʼ bʌ i yʌl jiñi Biblia.
MUʼ BɅ I YɅL JIÑI BIBLIA: «Isujm utsʼatet, c Yum, maʼ ñusʌbeñon lojon c mul» (Salmo 86:5).
BAJCHEʼ MIʼ COLTAÑONLA: «Muʼ bʌ i yʌl jiñi texto miʼ yʌqʼueñon cubin c tijicñʌyel come miʼ pʌsbeñon chaʼan Jehová miʼ pʼuntañonla. Cujil chaʼan mucʼʌch caj i ñusʌbeñon pejtelel tsaʼ bʌ c mele cheʼ bʌ tsajñon ti guerra» (Wilmar, Colombia).
MUʼ BɅ I YɅL JIÑI BIBLIA: «Laʼ wilan wolic mel tsijiʼ bʌ panchan yicʼot tsijiʼ bʌ pañimil. Maʼanic mi caj i chʌn ñaʼtʌntel jini tsaʼix bʌ ñumi. Maʼanix majch mi caj i chʌn cʼajtesan» (Isaías 65:17).
BAJCHEʼ MIʼ COLTAÑONLA: «Jiñi tsaʼ tac bʌ c ñusa cheʼ bʌ soldadojob tsiʼ wen ticʼlayon, i an c chaʼan depresión. Pero ili texto miʼ pʌsbeñon chaʼan tsʼitaʼ jax yom chaʼan Jehová miʼ yʌqʼueñon c ñajʌtesan pejtelel tsaʼ bʌ j qʼuele o c mele cheʼ bʌ soldadojon. Mi caj i junyaj ñajʌyel c chaʼan, maʼañix mi caj c wis cʼajtesan. ¡Jumpʼejlʌch ñuc bʌ bendición tilem bʌ ti Jehová!» (Zafirah, Estados Unidos).
MUʼ BɅ I YɅL JIÑI BIBLIA: «Mux i tajob i wenlel jini tojoʼ bʌ cheʼ woli ti yumʌl. Mux i tajob cabʌl i ñʌchʼtʌlel i pusicʼal winicob cheʼ anto uw» (Salmo 72:7).
BAJCHEʼ MIʼ COLTAÑONLA: «Mic wen ñaʼtan muʼ bʌ i yʌl jiñi texto. Tsʼitaʼ jax yom chaʼan miʼ jilel jiñi guerra tac i maʼañix mi caj lac bʌcʼñan chaʼan an chuqui miʼ mejlel i chaʼlen jiñi lac familia o la camigojob» (Olexandra, Ucrania).
MUʼ BɅ I YɅL JIÑI BIBLIA: «Jini chʌmeñoʼ bʌ muʼ bʌ i ñopetob mi caj i chaʼ cuxtiyelob. [ . . . ] Laʼ chʼojyicob jini wʌyʌloʼ bʌ ti lum. Laʼ i chaʼleñob cʼay tiʼ tijicñʌyel i pusicʼal» (Isaías 26:19).
BAJCHEʼ MIʼ COLTAÑONLA: «Lʌcʼʌ tiʼ pejtelel c familia tsaʼ tsʌnsʌnti cheʼ bʌ tsaʼ cʼotiyob ti tsʌnsʌntel jiñi cʌmbiloʼ bʌ bajcheʼ tutsi. Pero muʼ bʌ i yʌl jiñi texto miʼ pʌsbeñon chaʼan mi caj i mejlel c chaʼ qʼuel jiñi c familia. Comix c chaʼ ubibeñob i tʼan yicʼot i tijicñʌyel cheʼ bʌ miʼ chaʼ chʼojyelob» (Marie, Ruanda).
MUʼ BɅ I YɅL JIÑI BIBLIA: «Mach jalix mi caj i jilel jini mach bʌ anic miʼ ñop Dios. Cheʼ mi caj a qʼuel jini xjontolil mach yaʼix an. Jini utsoʼ bʌ i pusicʼal mi caj i yʌqʼuentelob i wenlel. Tijicña mi caj i yubiñob cheʼ ñʌchʼʌlob i pusicʼal» (Salmo 37:10, 11).
BAJCHEʼ MIʼ COLTAÑONLA: «Anquese ilayi tsaʼix ujti jiñi guerra, bej añixto jontol bʌ lac piʼʌlob yicʼot an muʼ bʌ i ticʼlʌntelob. Ili texto miʼ wen coltañon come miʼ pʼʌtʼesañon. Jehová miʼ qʼuel pejtelel chuqui miʼ yujtel i miʼ chʼʌmben i sujm chuqui mic ñusan. Cheʼ jaʼel, miʼ yʌl chaʼan muqʼuix caj i jisan pejtelel jiñi wocol i maʼañix mi caj laj cʼajtesan» (Daler, Tayikistán).
Yonlelob bajcheʼ jiñi tsaʼ bʌ tajleyob ti tʼan ti ili revista an i coltayob muʼ bʌ i yʌl jiñi Biblia chaʼan miʼ chaʼ tajob i ñʌchʼtʌlel yicʼot i tijicñʌyel. Tajol ti ñaxan miʼ tsʼaʼleñob yañoʼ bʌ jaʼel tiʼ caj baqui chʼoyolob, chuqui ti tʼan yujilob, bajcheʼ yilalob i colorlel o jiñʌch chuqui tiʼ caj, pero wʌle mach chʌn cheʼobix bajcheʼ jiñi (Efesios 4:31, 32). Jiñi i testigojonbʌlon Jehová maʼañic mi cotsan lojon c bʌ ti política yicʼot ti chuqui tac mach bʌ weñic miʼ mejlel (Juan 18:36).
Jiñi Testigojonbʌlon mij qʼueleʼ lojon c bʌ bajcheʼ jumpʼejl familia i mij comol coltan lon c bʌ (Juan 13:35). Cheʼʌch tsiʼ qʼuele jaʼel Olexandra cheʼ bʌ tsaʼ putsʼi majlel ti yambʌ país yicʼot i chich tiʼ caj jiñi guerra. Miʼ yʌl: «Cheʼ bʌ tsaʼ cʼotiyon lojon ti jiñi yambʌ país, ti ora jach tsaʼ c taja lon j qʼuel jiñi i testigojob Jehová. Yaʼix añob i pijtañon lojon. Tsiʼ wen coltayon lojon chaʼan mach wen wocolic mi lon cubin chaʼan mic ñʌmʼan lojon ti jiñi país».
Mic chaʼleñet lojon ti invitar ti jiñi tempa bʌ muʼ bʌ c meleʼ lojon. Yaʼi mi caj a cʌn bajcheʼ miʼ mejlel lac taj lac ñʌchʼtʌlel ili ora yicʼot chaʼan mi caj i jilel jiñi guerra tac i miʼ cajel ñʌchʼtʌlel. Ochen ti jw.org i sʌclan baqui miʼ tempañob i bʌ jiñi i testigojob Jehová yaʼ baqui añet o cʼajtin jumpʼejl estudio loqʼuem bʌ ti Biblia, mach tojbilic. Juntiquil i testigo Jehová mi caj i cʼʌn jiñi jun Ubin a tijicñʌyel chaʼan miʼ cʌntesañet.