Jiñi guerra tac mi caj i jilel

DIOS MI CAJ I JISAN JIÑI YUMɅLOB

Dios mi caj i jisan jiñi yumʌlob ti jiñi guerra cʌmbil bʌ bajcheʼ Armagedón (Apocalipsis 16:16).a Ti jimbʌ ora «jiñi reyob [o yumʌlob] tiʼ petol pañimil» mi caj i tempʌntelob ti «jiñi guerra chaʼan bʌ jiñi ñuc bʌ i qʼuiñilel Dios, jiñi Mach bʌ añic i pʼisol i pʼʌtʌlel» (Apocalipsis 16:14). Jiñi guerra chaʼan bʌ Armagedón jiñʌch jiñi cojix bʌ guerra muʼ bʌ caj i yujtel ti pañimil.

Dios mi caj i cʼʌn jiñi i Yumʌntel chaʼan miʼ yochel tiʼ qʼuexol jiñi yumʌlob am bʌ ila ti pañimil. Ili Yumʌntel mi caj i mel i yeʼtel yaʼ ti panchan i maʼañic baʼ ora mi caj i jisʌntel (Daniel 2:44). Dios tsiʼ yajca Jesucristo chaʼan miʼ yochel bajcheʼ Rey ti jiñi Yumʌntel (Isaías 9:​6, 7; Mateo 28:18). Ili Yumʌntelb jiñʌch tsaʼ bʌ i taja ti tʼan Jesús cheʼ bʌ tsiʼ cʌntesa bajcheʼ yom miʼ chaʼleñob oración jiñi xcʌntʼañob i chaʼan (Mateo 6:​9, 10). Jumpʼejl jach yumʌntel mi caj i yochel tiʼ wenta pejtelel lac piʼʌlob i Jesús mi caj i chaʼlen yumʌl.

Cheʼ bʌ jiñi wiñicob miʼ yochelob tiʼ yeʼtel bajñel i wenlel jach miʼ ñaʼtañob, pero Jesús mach cheʼic miʼ caj i mel. Juntiquilʌch toj bʌ rey yicʼot junlajal mi caj i qʼuel lac piʼʌlob, mach yʌlʌyic baqui chʼoyolob, chuqui ti tʼan yujilob yicʼot bajcheʼ yilalob i colorlel (Isaías 11:​3, 4). Jiñi lac piʼʌlob maʼañix mi caj i chaʼleñob guerra chaʼan miʼ qʼuejlelob ti ñuc, ¿chucoch? Come Jesús mi caj i coltan pejtelel lac piʼʌlob. Mi caj i «locʼsan ti wocol jini pʼumpʼun bʌ cheʼ miʼ cʼajtiben. Yicʼot jini ticʼlʌbil bʌ mach bʌ anic majqui miʼ coltan. […] Mi caj i mʌn jini ticʼlʌbiloʼ bʌ yicʼot jini chuculoʼ bʌ ti jontolil chaʼan miʼ yʌcʼob ti colel» (Salmo 72:​12-14).

Jiñi i Yumʌntel Dios mi caj i jisan pejtelel chuqui miʼ cʼʌjñel ti tsʌnsa (Miqueas 4:3). Cheʼ jaʼel, mi caj i jisan pejtelel jiñi jontoloʼ bʌ mach bʌ yomobic i cʌy guerra o muʼ bʌ i ticʼlan yambʌlob (Salmo 37:​9, 10). Maʼañix mi laj cajel ti bʌqʼuen baqui jach mi lac majlel (Ezequiel 34:28).

Cheʼ bʌ wolix i mel i yeʼtel jiñi i Yumʌntel Dios, tojix bajcheʼ mi caj lac chumtʌl. Maʼañix miʼ cajel guerra come maʼañix pʼumpʼuñiyel, wiʼñal yicʼot ti lac pejtelel mi caj i mejlel lac mel la cotot. Ti lac pejtelel mi caj lac ñusan lac bʌ ti sumuc bʌ bʌlñʌcʼʌl yicʼot tijicña mi caj lac chumtʌl ti la cotot (Salmo 72:16; Isaías 65:​21-23).

Yaʼ ti tsijiʼ bʌ pañimil mi caj i jilel pejtelel jiñi wocol am bʌ i yʌcʼʌ jiñi guerra tac. Maʼañix majqui mi caj i ñusan wocol tiʼ caj jiñi guerra, luʼ cʼoqʼuix mi caj la cajñel. Jiñi tsaʼ bʌ chʌmiyob mi caj i chaʼ cuxtʌyelob (Isaías 25:8; 26:19; 35:​5, 6). Juntemel mi caj i yajñel jiñi familia tac i maʼañix majqui mi caj i chʌn cʼajtesan pejtelel am bʌ i ñusa ti guerra (Apocalipsis 21:4).

DIOS MI CAJ I JISAN JIÑI MULIL

Ti jiñi i Yumʌntel Dios cojach mi caj i chʼujutesʌntel Jehová,c «jiñi Dios chaʼan bʌ cʼuxbiya yicʼot ñʌchʼtʌlel» (2 Corintios 13:11). Ñʌchʼʌlix mi caj i chumtʌlob pejtelel lac piʼʌlob (Isaías 2:​3, 4; 11:9). Jiñi muʼ bʌ i jacʼbeñob i tʼan Jehová tojobix mi caj i sujtel (Romanos 8:​20, 21).

DIOS MI CAJ I JISAN SATANÁS YICʼOT I XIBAJOB

Dios mi caj i jisan Satanás yicʼot i xibajob, cheʼ bajcheʼ jiñi maʼañix mi caj i cʼʌn jiñi lac piʼʌlob chaʼan miʼ techob jiñi guerra (Apocalipsis 20:​1-3, 10). Jiñi lac piʼʌlob mi caj i «tajob cabʌl i ñʌchʼtʌlel i pusicʼal» (Salmo 72:7).

Miʼ mejlel a ñop chaʼan Dios mi caj i jisan jiñi guerra tac yicʼot jiñi wocol tac am bʌ tiʼ caj jiñi jontolil, ¿chucoch? Come añʌch i pʼʌtʌlel chaʼan miʼ mel yicʼot yomʌch i meleʼ.

• Dios yujil bajcheʼ miʼ mejlel i jisan jiñi guerra yicʼot jiñi jontolil i añʌch i pʼʌtʌlel chaʼan miʼ mel (Job 9:4). Maʼañic chuqui mach bʌ mejlic i mel (Job 42:2).

• Dios maʼañic miʼ mulan cheʼ bʌ an majqui miʼ ñusan wocol (Isaías 63:9). Cheʼ jaʼel, «miʼ tsʼaʼlen jini jontol bʌ winic yicʼot jini muʼ bʌ i lon mulan jisaya» (Salmo 11:5).

• Dios mach yujilic lot, miʼ ts’ʌctesan pejtelel chuqui miʼ yʌl (Isaías 55:​10, 11; Tito 1:2).