¿Chucoch bej anto guerra tac?

TIʼ CAJ JIÑI MULIL

Dios tsiʼ mele Adán yicʼot Eva tiʼ yejtal, iliyi yom i yʌl chaʼan miʼ mejlel i lajiñob i miʼ pʌsob i cʼuxbiya yicʼot miʼ sʌclañob ñʌchʼtʌlel jaʼel (Génesis 1:27; 1 Corintios 14:33; 1 Juan 4:8). Pero tsiʼ ñusʌbeyob i tʼan Dios i tsiʼ chaʼleyob mulil, i joñonla xmuliloñixla jaʼel yicʼot mi lac chʌmel come i pʼolbalonla (Romanos 5:12). I tiʼ caj jiñi mulil, miʼ mejlel ti tilel jontol bʌ lac pensar i cheʼ jiñi mi lac mel mach tac bʌ weñic (Génesis 6:5; Marcos 7:​21, 22).

JIÑI YUMɅLOB

Dios maʼañic tsiʼ meleyonla chaʼan mi lac bajñel yuman lac bʌ. Jiñi Biblia miʼ yʌl chaʼan «maʼanic i ñaʼtʌbal winic chaʼan miʼ bajñel tojʼesan majlel i bʌ. Mach mejlic i bajñel yajcan i bijlel» (Jeremías 10:23). Jinmecu chaʼan, jiñi yumʌlob maʼañic miʼ mejlel i junyajlel jisañob jiñi guerra tac yicʼot jontolil.

SATANÁS YICʼOT I XIBAJOB

Jiñi Biblia miʼ yʌl chaʼan «jiñi pañimil an tiʼ pʼʌtʌlel Satanás» (1 Juan 5:19). Satanás, jiñi Diablo, juntiquilʌch xtsʌnsa mach bʌ yujilic pʼuntaya (Juan 8:44). ¿Chuqui miʼ mel? Miʼ cʼʌn jiñi wiñicob xʼixicob chaʼan miʼ yujtel guerra tac yicʼot chaʼan an jontolil ila ti pañimil (Apocalipsis 12:​9, 12).