2. ¿Am ba ti lac mul jiñi lac wocol?
¿Chucoch ñuc i cʼʌjñibal cheʼ la cujil i jacʼbal?
Mi joñoñʌchla an ti lac mul jiñi lac wocol tac, mucʼʌch i mejlel lac tsʼitaʼ lajmesan cheʼ jiñi.
Ñaʼtancu iliyi
Mi caj laj qʼuel muʼ bʌ i tech tac lac wocol. ¿Baqui jaxʌl an ti lac mul jiñi wocol tac?
Jiñi ticʼlʌntel
Jiñi Organización Mundial de la Salud (OMS) miʼ yʌl chaʼan ti chʌntiquil lac piʼʌlob an juntiquil tsaʼ bʌ ticʼlʌnti cheʼ bʌ chutto, i ti uxtiquil xʼixic an juntiquil tsaʼ bʌ jajtsʼi o tsaʼ ticʼlʌnti ti piʼleya, o tsiʼ ñusa tiʼ chaʼpʼejlel ili wocol.
Cheʼ bʌ miʼ chʌmel juntiquil lac familia
Cheʼ bajcheʼ miʼ yʌl jiñi Estadísticas sanitarias mundiales 2018, (am bʌ ti inglés) tsaʼ bʌ i tsʼijbu jiñi OMS, miʼ yʌl «chaʼan ti 2016 tsaʼ tsʌnsʌnti 477 mil lac piʼʌlob tiʼ petol pañimil (mulawil)». Pero cheʼ jaʼel miʼ ñaʼtʌntel chaʼan cheʼ bʌ 180 mil wiñicob xʼixicob (quixtañujob) tsaʼ chʌmiyob ti jiñi jach bʌ jabil tiʼ caj jiñi guerra yicʼot yan tac bʌ wocol muʼ bʌ i tech jiñi quixtañujob.
Wocol tac tiʼ caj jiñi cʼamʌjel
Ti jumpʼejl artículo tsaʼ bʌ loqʼui ti jiñi revista National Geographic, juntiquil reportera i cʼabaʼ Fran Smith tsiʼ yʌlʌ chaʼan ñumen ti mil millón muʼ bʌ i ñucʼob cʼujts, i jiñi cʼujtsijel miʼ chʼʌm tilel cʼamʌjel tac ti lac pusicʼal, miʼ yajlel chʼichʼ ti lac sicojc yicʼot miʼ tajonla cáncer ti lac pulmón, i tiʼ caj iliyi cabʌl miʼ chʌmelob (sajtelob).
Cheʼ bʌ mach junlajalic miʼ qʼuelob i bʌ jiñi lac piʼʌlob
Jiñi psicóloga Jay Watts miʼ yʌl: «Jiñi muʼ bʌ i ñumen techbeñob i cʌlʌx pensar jiñi quixtañujob jiñʌch jiñi pʼumpʼuñiyel, cheʼ mach junlajalic añob i taqʼuin, cheʼ mach junlajalic i colorlel i pʌchʌlelob, cheʼ bʌ ñuc bʌ miʼ qʼuelob i bʌ, cheʼ ñumen weñob i cultura miʼ yubiñob i bʌ yicʼot cheʼ bʌ miʼ xijqʼuelob i cʌyob i yotot».
CHAʼAN MAʼ ÑUMEN CɅN
Ochen yaʼ ti jw.org i qʼuele jiñi video ¿Chucoch tsiʼ mele Dios ili Pañimil?
Muʼ bʌ i yʌl jiñi Biblia
Jiñi wocol tac am bʌ ili ora i tsʼitaʼ mulʌch jiñi quixtañujob
Lʌcʼʌl tiʼ pejtelel jiñi wocol tac jiñʌch an tiʼ mul jiñi yumʌlob muʼ bʌ i poj alob chaʼan miʼ coltañob jiñi quixtañujob pero mucʼ jach i ticʼlañob.
Jiñi wiñicob miʼ «cʼʌñob i pʼʌtʌlel chaʼan miʼ jisañob i piʼʌlob» (ECLESIASTÉS 8:9).
Añʌch chuqui miʼ mejlel lac mel chaʼan maʼañic mi lac wen taj wocol
Jiñi ticʼojel tac am bʌ ti Biblia miʼ coltañonla ti laj cʼocʼlel yicʼot chaʼan wen mi la cajñel yicʼot yambʌlob.
«Cheʼ ñʌchʼʌl lac pusicʼal cʼocʼonla yubil. Cheʼ tsʌytsʌyña lac pusicʼal chaʼan lac piʼʌlob añʌch lac chʌmel yubil» (PROVERBIOS 14:30).
«Cʌyʌla ti junyajlel: tsʼaʼleya, michʼajel, aʼleya, michʼ bʌ tʼan, uʼyaj tʼan, yicʼot pejtelel jontolil» (EFESIOS 4:31).