Cʌntesʌntel 16
Wen utsʼat bʌ chaʼan ti yijñam Isaac
¿MUʼ ba a cʌn ili xʼixic am bʌ ila ti dibujo? I cʼabaʼ jiñʌch Rebeca. Woli i majlel yaʼ baʼan jini winic i cʼabaʼ Isaac. Mi caj i sujtel ti yijñam. ¿Bajcheʼ tsaʼ ujti iliyi?
Weno, jini Abraham, i tat Isaac, yom chaʼan mi taj wen utsʼat bʌ i yijñam chaʼan i yalobil. Mach yomic chaʼan Isaac miʼ ñujpuñel yicʼot xʼixic chʼoyol bʌ yaʼ ti Canaán, come jini winicob xʼixicob miʼ chʼujutesañob diostac mach bʌ isujmic. Jini chaʼan Abraham tsiʼ pʌyʌ tilel i winic i tsiʼ sube: ‹Com chaʼan maʼ majlel tic lumal baʼan c piʼʌlob yaʼ ti Harán chaʼan maʼ sajcʌben i yijñam calobil Isaac›.
Cheʼ jini i winic Abraham tsiʼ pʌyʌ loqʼuel lujuncojt camello tac i tsaʼ loqʼui majlel ti ñajt bʌ xʌmbal. Cheʼ lʌcʼʌlix miʼ cʼotel yaʼ baʼ chumulob i piʼʌlob Abraham, tsaʼ waʼle yaʼ baʼan jumpʼejl pozo. Ochʼajelix qʼuin, cheʼ i yorajlelix miʼ tilelob ti luch jaʼ ti pozo jini xʼixicob yaʼ ti tejclum. Jini chaʼan i winic Abraham tsiʼ pejca Jioba ti oración, tsiʼ yʌlʌ: ‹Jini xchʼoc muʼ bʌ i luch jaʼ chaʼan mi yʌqʼueñon c jap yicʼot chaʼan jini camello tac jiñʌch tsaʼ bʌ a yajcʌbe chaʼan ti yijñam Isaac›.
Cheʼ jini, tsaʼ tili Rebeca ti luch jaʼ. Cheʼ bʌ tsiʼ cʼajti i jap jaʼ i winic jini Abraham, Rebeca tsiʼ yʌqʼue i jap jaʼ. Cheʼ jini tsaʼ majli i luch tilel ti on jini jaʼ chaʼan tiʼ pejtelel jini camello tac am bʌ i tiquin tiʼ. Tsiʼ chaʼle tsʌts bʌ eʼtel, come jini camello tac wen on mi japob jaʼ.
Cheʼ bʌ tsaʼ ujti i mel Rebeca jini eʼtel, jini i winic Abraham tsiʼ cʼajtibe chuqui i cʼabaʼ i tat. Yicʼot jaʼel tsiʼ cʼajtibe mi mucʼʌch i mejlel i ñusan acʼʌlel yaʼ ti i yototob. Jini xchʼoc tsiʼ yʌlʌ: ‹Joñon i yalobilon Betuel, añʌch jochol bʌ otot baʼ maʼ jijlel›. Jini i winic Abraham yujilʌch chaʼan Betuel i yalobilʌch Nacor, i yijtsʼin Abraham. Jini chaʼan tsiʼ ñocchoco i bʌ chaʼan miʼ suben wocolix i yʌlʌ Jioba, chaʼan tsiʼ pʌsbe i bijlel baqui chumul i piʼʌlob Abraham.
Ti jini acʼʌlel i winic Abraham tsiʼ sube Betuel yicʼot Labán, i yʌscun Rebeca, chucoch tsaʼ tili. Tsiʼ yʌlʌyob chaʼan Rebeca miʼ mejlel ti majlel yicʼot jini winic chaʼan miʼ ñujpuñel yicʼot Isaac. ¿Chuqui tsiʼ yʌlʌ Rebeca cheʼ tsiʼ cʼajtibeyob? Tsiʼ yʌlʌ chaʼan yomʌch majlel. Jini chaʼan, ti yijcʼʌlal tsaʼ cʼʌchleyob ti camello tac i tsiʼ techeyob ñajt bʌ xʌmbal cʼʌlʌl mi chaʼ cʼotelob ti Canaán.
Cheʼ bʌ tsaʼ cʼotiyob, acʼʌlelix. Rebeca tsiʼ qʼuele juntiquil winic woli bʌ ti xʌmbal ti jamil. Jiñʌch Isaac. Wen tijicña tsiʼ yubi cheʼ tsiʼ qʼuele Rebeca. Sara, i ñaʼ jini Isaac an jaxto uxpʼejl jab i chʌmel, cʼʌlʌl chʼijiyem to cheʼ jini. Pero wʌle jini Isaac tsiʼ wen cʼuxbi Rebeca, yicʼot chaʼ tijicñayix.
Génesis 24:1-67.