Cʌntesʌntel 14
Tsaʼ ilʌbenti chuqui ñopol i chaʼan tiʼ Dios jini Abraham
¿MUʼ ba a qʼuel chuqui woli i mel Abraham? Chucul i chaʼan juntsʼijt cuchillo, cheʼ bʌ mi caj i tsʌnsan yilal i yalobil. ¿Chucoch? Laʼ lac ñaxan qʼuel, bajcheʼ Abraham yicʼot Sara tsaʼ tiliyob i yalobil.
Yom cʼajal a chaʼan, Dios tsiʼ wʌn subeyob chaʼan mi caj i yilañob juntiquil i yalobil. Pero cheʼ bʌ ora jini mach mejlic yilal, come Abraham yicʼot Sara wen ñoxobix. Pero Abraham tsiʼ ñopo chaʼan Dios miʼ mejlel i mel wocol bʌ yilal. Jini chaʼan, ¿chuqui tsaʼ ujti?
Cheʼ bʌ Dios tsiʼ waʼchoco i tʼan, tsʼʌcʌl jumpʼejl jab tsaʼ ñumi. Cheʼ jini, cheʼ bʌ anix joʼcʼal (100) i jabilel Abraham jini Sara lujumpʼejl i joʼcʼal (90) an i chaʼan, tsiʼ yilayob juntiquil i yalobil i cʼabaʼ Isaac. ¡Dios tsiʼ tsʼʌctesa jini i tʼan tsaʼ bʌ i waʼchoco!
Pero cheʼ ñuquix jini Isaac, Jioba tsiʼ yilʌbe chuqui ñopol i chaʼan ti Dios jini Abraham. Tsiʼ pejca: ‹¡Abraham!› i tsiʼ jacʼʌ: ‹¡Wʌʼ añon!› Cheʼ jini Dios tsiʼ yʌlʌ: ‹Chucu jini a walobil, jini cojach bʌ a walobil, Isaac, cucu yaʼ ti wits baʼ mi caj c pʌsbeñet. Yaʼi tsʌnsan a walobil acʼʌ bajcheʼ pulbil bʌ majtañʌl›.
¡Tsiʼ wen aqʼue i chʼijiyemlel Abraham iliyi, come jini Abraham miʼ wen cʼuxbin jini i yalobil! Yom cʼajal a chaʼan, Dios tsiʼ wʌn alʌ chaʼan i yalobilob Abraham mi caj i chumtʌlob yaʼ tiʼ lumal Canaán. Pero ¿bajcheʼ tsaʼ ujti jini cheʼ tsaʼic chʌmi Isaac? Abraham maxto anic tsaʼ i chʼʌmben isujm, pero tsiʼ jacʼbe i tʼan Dios.
Cheʼ bʌ ora tsaʼ cʼoti yaʼ ti wits, Abraham tsiʼ cʌchʌ Isaac i tsiʼ ñolchoco tiʼ pam puluntib tsaʼ bʌ i mele. Cheʼ jini tsiʼ chʼʌmʌ cuchillo chaʼan miʼ tsʌnsan jini i yalobil. Pero ti jini jach bʌ ora i yángel Dios tsiʼ pejca: ‹¡Abraham, Abraham!› Jini Abraham tsiʼ jacʼʌ: ‹¡Wʌʼ añon!›
‹Mach a ticʼlan jini chʼiton›, cheʼ tsiʼ yʌlʌ Dios. ‹Wʌle cujilix chaʼan ñopol a chaʼañon, come tsaʼ wʌqʼueyon jini a walobil, jini cojach bʌ a walobil›.
¡Wen ñopol i chaʼan Dios Abraham! Yujil chaʼan miʼ laj mejlel i mel Jioba, yicʼot chaʼan miʼ chaʼ tech chʼojyel jini Isaac baʼan chʌmeñoʼ bʌ. Pero ti i sujmlel Dios mach yomic chaʼan Abraham miʼ tsʌnsan jini Isaac; tsaʼ yʌcʼʌ juncojt tiñʌmeʼ chaʼan mi jocʼtʌl tiʼ xʌcʼ alʌ teʼ i tsiʼ sube Abraham chaʼan miʼ pulben ti majtan cheʼ mach jinix Isaac.
Génesis 21:1-7; 22:1-18.