Cʌntesʌntel 13

Abraham... i yamigo Dios

ICʼABAʼ jini jumpʼejl tejclum baʼ tsaʼ majliyob ti chumtʌl jini winicob xʼixicob cheʼ tsaʼ ñumi jini Butʼjaʼ jiñʌch Ur. Ur jiñʌch jumpʼejl tejclum wen ñuc bʌ baqui an utsʼatax bʌ otot. Pero jini winicob xʼixicob yaʼ bʌ chumulob yaʼi miʼ chʼujutesañob diostac mach bʌ isujmic. Jiñʌch muʼ bʌ i melob jaʼel yaʼ ti Babel. Jini winicob xʼixicob chumuloʼ bʌ ti Ur yicʼot ti Babel mach cheʼobic bajcheʼ Noé yicʼot i yalobil Sem, tsaʼ bʌ i chʌn melbeyob i yeʼtel Jioba.

Anix lujumpʼejl i waxʌclujuncʼal (350) jabil i ñumel jini butʼjaʼ, cheʼ tsaʼ chʌmi jini xucʼul bʌ Noé. Tsaʼ jach ñumi chaʼpʼejl jab cheʼ tsiʼ yila pañimil jini winic muʼ bʌ a qʼuel ila ti dibujo. Juntiquilʌch ñuc bʌ winic chaʼan Dios. I cʼabaʼ jiñʌch Abraham. Yaʼ chumul yicʼot i familia ti jini tejclum i cʼabaʼ Ur.

Jumpʼejl bʌ qʼuin Jioba tsiʼ sube Abraham: ‹Loqʼuen yaʼ ti Ur yicʼot a piʼʌlob, cucu yaʼ ti jini lum muʼ bʌ caj c pʌsbeñet›. ¿Tsaʼ ba i jacʼʌ Abraham jini tsaʼ bʌ i sube Dios, chaʼan mi cʌy jini wen tac bʌ i chubʌʼan yaʼ ti Ur? Tsaʼ cu. Come jini Abraham tsiʼ chʌn jacʼbe i tʼan Dios i tsaʼ cʌjñi cheʼ bajcheʼ i yamigo Dios.

Cheʼ tsaʼ loqʼui majlel Abraham yaʼ ti Ur lamital i familia tsaʼ majliyob yicʼot. Tsaʼ loqʼui majlel i tat Abraham i cʼabaʼ Taré. Yicʼot jaʼel i yalobil i yeran i cʼabaʼ Lot. Cheʼ jaʼel, jini i yijñam, i cʼabaʼ Sara. Ti wiʼil bʌ qʼuin tiʼ pejtelelob tsaʼ tem chumleyob ti jini lum i cʼabaʼ Harán, jini Taré tsaʼ chʌmi. Wen ñajt tsiʼ cʌyʌyob Ur.

Ti wiʼil Abraham yicʼot i familia tsaʼ loqʼuiyob majlel yaʼ ti Harán i tsaʼ cʼotiyob ti chumtʌl ti Canaán. Jioba tsiʼ sube yaʼi: ‹Jiñʌch ili lum muʼ bʌ caj cʌqʼuen a pʼolbal›. Abraham tsaʼ cʌyle ti Canaán i tsaʼ chumle ti pisil bʌ otot.

Dios tsaʼ caji i coltan Abraham i tsaʼ wen pʼojli i tiñʌmeʼ tac yicʼot yan tac bʌ i yañimal tac cheʼ jaʼel yonlel ti joʼcʼal i winicob. Pero jini Abraham yicʼot Sara maʼañobic i yalobil.

Cheʼ lujumpʼejlix yicʼot bolompʼejl i joʼcʼal (99) i jabilel Abraham, Jioba tsiʼ sube: ‹Mic wʌn subeñet chaʼan mi caj a wochel tiʼ tat winicob xʼixicob ti mojt ti mojt ti cabʌl lum›. Pero ¿bajcheʼ miʼ mejlel ti ujtel iliyi, cheʼ jini Abraham yicʼot Sara wen ñoxobix wʌle chaʼan mi yilañob juntiquil i yalobil?

Génesis 11:27-32; 12:1-7; 17:1-8, 15-17; 18:9-19.