Abraham yicʼot Sara miʼ jacʼbeñob i tʼan Dios

An yambʌ tejclum yaʼ tiʼ tʼejl jiñi Babel, i cʼabaʼ jiñʌch Ur. Yaʼi maʼañic miʼ chʼujutesʌntel Jehová, cojach yambʌ dios tac. Pero an juntiquil wiñic yaʼ ti Ur tsaʼ bʌ i chʼujutesa Jehová, i cʼabaʼ Abraham.

Jehová tiʼ sube Abraham: «Cʌyʌ a wotot yicʼot a piʼʌlob. Cucu ti jiñi lum muʼ bʌ caj c pʌsbeñet». Dios tsiʼ yʌqʼue i tʼan: «Mi caj cʌqʼueñet a pʼolbal ti ñuc bʌ lum. Mi caj i tajob i wenlel wiñicob xʼixicob tiʼ pejtelel pañimil chaʼañet».

Abraham mach yujil baqui yom i choc majlel Jehová, pero tsiʼ ñopbe i tʼan. Abraham, Sara, Taré yicʼot Lot tsiʼ chʼujbibeyob i tʼan Dios. Tsiʼ chajpayob i bʌ i tsaʼ cajiyob ti xʌmbal.

Abraham an 75 i jabilel cheʼ bʌ tsaʼ cʼoti yicʼot i familia yaʼ ti lum baqui tiʼ sube Jehová. I cʼabaʼ jiñi lum jiñʌch Canaán. Yaʼi, Jehová tsiʼ yʌqʼue i tʼan: «Tiʼ pejtelel ili lum muʼ bʌ a qʼuel, mi caj cʌqʼuen a walobilob». Pero Abraham yicʼot Sara añobix i jabilel i maʼañobic i yalobil. Cheʼ jiñi, ¿bajcheʼ mi caj i tsʼʌctesan i tʼan Jehová?