Cʌntesʌntel 30
Jini alʌ teʼ woli bʌ ti lejmel
MOISÉS tsaʼ tili cʼʌlʌl ti wits i cʼabaʼ Horeb chaʼan miʼ sʌclan i bucʼbal i tiñʌmeʼ tac. Ilayi tsiʼ qʼuele juntejc alʌ teʼ woli bʌ ti lejmel, ¡pero jini alʌ teʼ maʼanic miʼ pulel!
‹¡Mach ñʌmʌlic ti qʼuejlel!› cheʼ tsiʼ ñaʼta Moisés. ‹Mi caj c majlel j qʼuel jini.› Cheʼ lʌcʼʌlix an, yaʼ baqui an jini alʌ teʼ tsaʼ loqʼui jumpʼejl tʼan: ‹Mach a bej ñochtan. Locʼsan a warach, come chʼujul jini lum baʼ waʼalet›. Diosʌch jini tsaʼ bʌ i chaʼle tʼan tiʼ tojlel juntiquil ángel, jini chaʼan Moisés tsiʼ mʌcʌ i wut.
Cheʼ jini Dios tsiʼ yʌlʌ: ‹Tsaʼix j qʼuelbe i wocol c tejclum yaʼ ti Egipto. Mi caj c locʼsañob, mic choquet majlel chaʼan maʼ locʼsañob yaʼi›. Jioba tsiʼ ñaʼta chaʼan miʼ pʌy majlel i tejclum yaʼ tiʼ i tʼojol jax bʌ i lumal Canaán.
Pero Moisés tsiʼ yʌlʌ: ‹Maʼanic j cʼʌjñibal. ¿Bajcheʼ mi caj c mel jini? Mi tsaʼ majliyon mi caj i yʌlob: «¿Majqui tsiʼ chocoyet tilel?» ¿Bajcheʼ cʌlʌ cheʼ jini?›
‹Mi caj a subeñob bajcheʼ iliyi›, cheʼen Dios. ‹«JIOBA jini i Dios Abraham, i Dios Isaac yicʼot i Dios Jacob tsiʼ chocoyon tilel baʼ añetla»›. Cheʼ jini, Jioba tsaʼ to i yʌlʌ: ‹Iliyi jiñʌch j cʼabaʼ tiʼ pejtelel ora›.
‹Pero ¿ixcu mi maʼanic mi ñopoñob cheʼ mic subeñob chaʼan jatet tsaʼ chocoyon majlel?› cheʼen Moisés.
‹¿Chuqui chucul a chaʼan?› cheʼ tsiʼ cʼajtibe Dios.
Moisés tsiʼ jacʼʌ: ‹Juntsʼijt teʼ›.
‹Choco ti lum›, cheʼen Dios. Cheʼ bʌ Moisés tsiʼ mele jini, jini teʼ am bʌ yicʼot tsaʼ sujti tiʼ juncojt lucum. Cheʼ jini, Jioba tsiʼ pʌsbe yambʌ milagro Moisés. Tsiʼ yʌlʌ: ‹Otsan a cʼʌb ti a bujc›. Moisés tsiʼ mele, cheʼ bʌ tsiʼ locʼsa, ¡sʌquix cheʼ bajcheʼ sʌsʌc bʌ tocal! Cheʼ bajcheʼ cʼam yilal, yicʼot leco bʌ i tsoy. Cheʼ jini Jioba tsiʼ yʌqʼue Moisés i pʼʌtʌlel chaʼan miʼ mel jini i yuxpʼejlel milagro. Ti cojix bʌ tsiʼ yʌlʌ: ‹Ili milagro tac mi caj i ñopob jini israelob chaʼan joñoñʌch tsac chocoyet majlel›.
Ti wiʼil, Moisés tsaʼ chaʼ majli ti yotot i tsiʼ sube jini Jetro: ‹A wocolic, laʼ majlicon yaʼ ti Egipto chaʼan mij qʼuel bajcheʼ añob c piʼʌlob›. Jini chaʼan Moisés tsiʼ sube Jetro chaʼan muqʼuix i majlel, tsiʼ teche ñajt bʌ xʌmbal chaʼan miʼ chaʼ sujtel majlel yaʼ ti Egipto.
Éxodo 3:1-22; 4:1-20.