Jiñi alʌ teʼ woli bʌ ti lejmel

Moisés 40 jab tsaʼ chumle ti Madián. Yaʼʌch tsaʼ ñujpuñi i tsiʼ pʼolo i yalobilob. Ti jumpʼejl bʌ qʼuin woli (choncol) i cʌntan i tiñʌmeʼ tac yaʼ tiʼ tʼejl jiñi wits Sinaí i tsiʼ qʼuele tsaʼ bʌ i yʌcʼʌ ti toj sajtel i pusicʼal. Juntejc alʌ teʼ woli ti lejmel, ¡pero maʼañic woli ti pulel! Cheʼ bʌ Moisés tsiʼ lʌcʼtesa i bʌ chaʼan miʼ qʼuel, tsiʼ yubi jumpʼejl tʼan woli bʌ i loqʼuel yaʼ ti alʌ teʼ i tsiʼ yʌlʌ: «¡Moisés! Mach a bej lʌcʼtesan a bʌ. Jocho a warach, come chʼujul jiñi lum baʼ waʼalet». Jiñʌch Jehová woli bʌ i cʼʌn juntiquil ángel chaʼan miʼ pejcan Moisés.

Moisés tsiʼ bʌcʼña i tsiʼ mʌcʌ i wut. Jiñi aj tʼan tiʼ sube: «Tsaʼix j qʼuele chaʼan woli i ñusan wocol jiñi israelob. Mi caj j coltañob loqʼuel tiʼ cʼʌb jiñi egiptojob chaʼan mic pʌyob majlel ti wem bʌ lum. Com chaʼan maʼ locʼsañob ti Egipto». ¿Toj sajtel ba i pusicʼal Moisés maʼ wʌl?

Moisés tsiʼ cʼajtibe: «¿Chuqui yom mi cʌl cheʼ bʌ miʼ cʼajtiñob majqui tsiʼ chocoyon tilel?». Dios tsiʼ jacʼbe: «Subeñob chaʼan jiñʌch Jehová, i Dios Abraham, i Dios Isaac yicʼot i Dios Jacob». Moisés tsiʼ yʌlʌ: «¿Ixcu mi maʼañic miʼ yʌcʼob ti ñuc c tʼan?». Jehová an chuqui tsiʼ pʌsbe chaʼan miʼ yʌqʼuen i ñaʼtan chaʼan mi caj i coltan. Tiʼ sube chaʼan miʼ choc ti lum i teʼ, ¡tsaʼ sujti ti lucum cheʼ bʌ tsiʼ choco i teʼ! Moisés tsiʼ chucu tiʼ ñej jiñi lucum i tsaʼ chaʼ sujti ti teʼ. Jehová tiʼ sube: «Cheʼ bʌ maʼ mel ili milagro, mi caj a pʌs chaʼan joñon tsaʼ c chocoyet majlel».

Moisés tsiʼ yʌlʌ: «Mach wen cujilic tʼan tiʼ tojlel i wut wiñicob xʼixicob». Jehová tiʼ sube: «Mi caj c subeñet chuqui yom maʼ wʌl i mi caj c choc majlel Aarón chaʼan miʼ coltañet». Cheʼ bʌ yujilix Moisés chaʼan Jehová mi caj i coltan, tsaʼ majli ti Egipto i tsiʼ pʌyʌ majlel i yijñam yicʼot i yalobilob.