Cʌntesʌntel 29
Chucoch tsaʼ putsʼi Moisés
Q’UELE cu jini Moisés; woli i putsʼel loqʼuel yaʼ ti Egipto. ¿Muʼ ba a qʼuel jini woli bʌ i yajñesañob majlel? ¿Awujil ba chucoch yom i tsʌnsañob jini Moisés? Laʼ laj qʼuel mi tsaʼ mejli laj cʌn.
Moisés tsaʼ coli ti yotot Faraón, jini yumʌl bʌ yaʼ ti Egipto. Tsiʼ wen taja i ñaʼtʌbal yicʼot i ñuclel. Moisés yujil chaʼan mach chʼoyolic yaʼ ti Egipto, yicʼot jini mero i tatoʼ bʌ jiñobʌch israelob mosojoʼ bʌ.
Jumpʼejl bʌ qʼuin, cheʼ bʌ anix chaʼcʼal (40) i jabilel, Moisés tsiʼ ñaʼta chaʼan miʼ majlel i qʼuel bajcheʼ añob jini i tejclum. Woliʼ ticʼlʌntelob. Tsiʼ qʼuele juntiquil egipcio woli i jatsʼ juntiquil moso bʌ Israel. Moisés tsiʼ joy qʼuele pañimil, cheʼ maʼanic majqui woliʼ qʼueleʼ, tsiʼ jatsʼʌ jini egipcio, i tsaʼ chʌmi. Moisés tsiʼ mucu jini xchʌmel ti jiʼlum.
Cheʼ tiʼ yijcʼʌlal Moisés tsaʼ chaʼ majli i qʼuel jini i tejclum. Tsiʼ ñaʼta chaʼan miʼ mejlel i coltañob chaʼan mach chʌn mosojobix. Pero tsiʼ qʼuele chaʼtiquil israelob woliʼ jatsʼob i bʌ, jini Moisés tsiʼ sube jini jontol bʌ: ‹¿Chucoch wolaʼ jatsʼ a piʼʌl?›
Jini winic tsiʼ jacʼʌ: ‹¿Majqui tsiʼ waʼchoyet ti yumʌl tic tojlel lojon chaʼan maʼ chaʼlen meloñel? ¿Muʼ ba caʼ tsʌnsañon jaʼel cheʼ bajcheʼ tsaʼ tsʌnsa jini egipcio?›
Wʌle Moisés tsaʼ bʌcʼña. Yujil chaʼan jini winicob xʼixicob tsaʼix i ñaʼtayob jini tsaʼ bʌ i melbe jini egipcio. Cheʼ bʌ tsaʼ yubi Faraón tsiʼ choco majlel winicob i tsʌnsañob jini Moisés. Jini chaʼan Moisés tsaʼ putsʼi loqʼuel yaʼ ti Egipto.
Cheʼ bʌ Moisés tsaʼ loqʼui yaʼ ti Egipto, tsaʼ majli ti ñajt, tiʼ lumal Madián. Yaʼi tsiʼ cʌmbe i familia Jetro, i tsaʼ ñujpuñi yicʼot juntiquil xchʼoc bʌ i yalobil, i cʼabaʼ Zípora. Moisés tsaʼ ochi ti xcʌnta tiñʌmeʼ i tsiʼ cʌntʌbe i tiñʌmeʼ tac Jetro. Chaʼcʼal (40) jab tsaʼ chumle yaʼ tiʼ lumal Madián. Wʌle cheʼ bʌ anix i chaʼan chʌncʼal (80) i jabilel. Cheʼ jini jumpʼejl bʌ qʼuin, cheʼ bʌ Moisés miʼ cʌntʌben i tiñʌmeʼ tac Jetro, an chuqui toj sajtel bʌ tsaʼ ujti tiʼ tojlel Moisés tsaʼ bʌ i qʼuextʌbe i pensar. Cʼaxen ti yambʌ página, i laʼ laj qʼuel chuqui jini toj sajtel bʌ tsaʼ ujti.
Éxodo 2:11-25; Hechos 7:22-29.