Moisés miʼ chʼujutesan Jehová

Cheʼ bʌ yaʼ to chumulob ti Egipto, jiñi tilemoʼ bʌ tiʼ familia Jacob tsaʼ cʌjñiyob bajcheʼ israelob. Cheʼ bʌ tsaʼ chʌmi Jacob yicʼot José, tsaʼ ochi ti yumʌl yambʌ faraón. Ili faraón tsiʼ chaʼle bʌqʼuen come woli (yʌquel) i ñumen pʼʌtʼan jiñi israelob. Jin chaʼan tiʼ sujtesayob ti mozo jiñi israelob. Tsiʼ xiqʼuiyob ti mel (pʌt) ladrillo yicʼot ti tsʌts bʌ eʼtel (troñel) yaʼ ti jamil. Jiñi egiptojob tsaʼ caji i ñumen ticʼlañob, pero jiñi israelob tsaʼ bej oñʼayob. Faraón maʼañic tsiʼ mulaj, jin chaʼan tsiʼ xiqʼui ti tsʌnsʌntel jiñi chʼiton bʌ israelob, cojach jiñi xchʼocob maʼañic. ¿Muʼ baʼ ñaʼtan bajcheʼ cʼamel i bʌqʼuen jiñi israelob?

Juntiquil Israel bʌ xʼixic i cʼabaʼ Jocabed tsiʼ yʌcʼʌ ti pañimil wen cʼoʼtajax bʌ alʌl. Mach yomic chaʼan miʼ tsʌnsan jiñi egiptojob, jin chaʼan tsiʼ mucu ti jumpʼejl chiquib yaʼ baqui an chan tac bʌ jam yaʼ ti jaʼ Nilo. Miriam, i chich jiñi alʌl, tsaʼ ñajti cʌyle i qʼuel chuqui mi caj i chaʼlen.

I yixicʼal (yixicpʼeñal) faraón tsaʼ majli ti tsʼʌmel yaʼ ti jaʼ i tsiʼ qʼuele jiñi chiquib. Tsiʼ qʼuele chaʼan woli ti uqʼuel jiñi alʌl i tsiʼ wen pʼunta. Miriam tsiʼ cʼajtibe: «¿A wom ba mic majlel c pʌy tilel juntiquil xʼixic chaʼan miʼ cosʌbeñet jiñi alʌl?». Tsiʼ yʌlʌ chaʼan yomʌch, i jiñi Miriam tsaʼ majli i pʌy tilel i ñaʼ. I yixicʼal faraón tiʼ sube Jocabed: «Pʌyʌ majlel ili alʌl chaʼan maʼ cʌntʌbeñon i mi caj c tojet».

Cheʼ bʌ tsaʼ coli jiñi alʌl, Jocabed tsiʼ pʌyʌ majlel yaʼ baqui an i yixicʼal faraón. Moisés tsiʼ yotsʌbe i cʼabaʼ i tsiʼ cosa bajcheʼ i yalobil. Moisés tsaʼ coli bajcheʼ i yalobil rey i miʼ luʼ mejlel i taj chuqui yom. Pero tsiʼ chʌn cʼajtesa Jehová. Moisés yujil chaʼan tilem tiʼ pʼolbal israelob, mach yaʼic ti Egipto, i tsiʼ chʼujutesa Jehová.

Cheʼ bʌ añix 40 i jabilel, Moisés tsiʼ ñaʼta i coltan jiñi israelob. Ti jumpʼejl bʌ qʼuin, tsiʼ qʼuele chaʼan juntiquil egipcio woliʼ jatsʼ juntiquil mozo. Cheʼ bʌ tsiʼ qʼuele jiñi, Moisés tsiʼ jatsʼʌ jiñi egipcio, tsaʼ chʌmi i tsiʼ mucu yaʼ ti jiʼ. Cheʼ bʌ tsiʼ yubi faraón jiñi, tsiʼ ñopo i tsʌnsan Moisés, pero tsaʼ putsʼi majlel ti Madián. Jehová tsiʼ cʌnta yaʼi.