Cʌntesʌntel 41
Jini lucum melbil bʌ ti cobre
¿CUXUL ba ti qʼuelol jini lucum yaʼ bʌ bechʼubil ti teʼ? Mach cheʼiqui. Melbil ti cobre. Jioba tsiʼ sube Moisés chaʼan mi yʌcʼ ti teʼ chaʼan miʼ tajob i qʼuelob jini winicob xʼixicob yicʼot chaʼan chʌn cuxul mi yajñelob. Pero jini yan tac bʌ lucum, am bʌ ti lum, cuxulʌch. Tsaʼ cʼuxleyob jini winicob xʼixicob yicʼot tsaʼ cʼamʼayob. ¿Awujil ba chucoch?
Tiʼ caj chaʼan tsiʼ chaʼleyob wulwul tʼan jini israelob tiʼ contra Dios yicʼot tiʼ tojlel Moisés. Tsiʼ yʌlʌyob: ‹¿Chucoch tsaʼ locʼsayon lojon yaʼ ti Egipto chaʼan mic tilel lojon ti chʌmel ila ti i tiquiñal lum? Maʼanic bʌlñʌcʼʌl yicʼot mi anic jaʼ ilayi. Mach chʌn comix j cʼux lojon jini maná›.
Pero jini maná jiñʌch wem bʌ bʌlñʌcʼʌl. Jioba tsiʼ yʌqʼueyob ti jumpʼejl milagro. Yicʼot ti jumpʼejl milagro tsiʼ yʌqʼueyob jaʼ. Pero jini winicob xʼixicob maʼanic tsiʼ subeyob wocolix i yʌlʌ Dios chaʼan tsiʼ cʌntayob. Jini chaʼan Jioba tsiʼ choco majlel ili lucum tac am bʌ i venenojlel chaʼan miʼ tojob i mul jini israelob. Tsaʼ cʼuxleyob ti lucum tac, i cabʌl tsaʼ bʌ chʌmiyob.
Tsaʼ cʼun tiliyob jini winicob xʼixicob baʼan Moisés, i tsiʼ yʌlʌyob: ‹Tsaʼix c chaʼle lojon mulil, come tsac chaʼle lojon wulwul tʼan tiʼ contra Jioba yicʼot ti a tojlel. Pejcan ti oración Jioba chaʼan miʼ choc loqʼuel ili lucum tac›.
Jini chaʼan Moisés tsiʼ mele oración tiʼ tojlelob. Jioba tsiʼ sube Moisés chaʼan miʼ mel ili lucum melbil bʌ ti cobre. Tsiʼ sube chaʼan mi yʌcʼ ti juntsʼijt teʼ, yicʼot majqui jach miʼ cʼuxtʌl yom miʼ qʼuel jini lucum. Moisés tsiʼ mele cheʼ bajcheʼ tsiʼ yʌlʌ Dios. Jini tsaʼ bʌ cʼuxleyob tsiʼ qʼueleyob jini lucum melbil bʌ ti cobre chaʼan miʼ chaʼ cʼocʼañob.
An chuqui mi laj cʌn ilayi. Ti lac pejtelel lajalonla bajcheʼ jini israelob tsaʼ bʌ cʼuxleyob ti lucum tac. Qʼuele ti pejtelel jini winicob xʼixicob miʼ ñoxʼañob, miʼ cʼamʼañob yicʼot miʼ chʌmelob. Iliyi chaʼañʌch tiʼ caj jini ñaxam bʌ winic yicʼot ñaxam bʌ xʼixic, Adán yicʼot Eva, tsiʼ ñajtʼesayob i bʌ ti Jioba, ti lac pejtelel i yalobilonla. Pero Jioba tsiʼ jamʌ jumpʼejl bij chaʼan mi lac chumtʌl ti pejtelel ora.
Jioba tsiʼ choco tilel ila ti Pañimil i Yalobil, Jesucristo. Jesús tsaʼ jocʼchoconti ti juntsʼijt teʼ, come yonlel tsaʼ bʌ i ñaʼtayob chaʼan jontol. Pero Jioba tsiʼ choco tilel Jesús chaʼan miʼ coltañonla. Cheʼ mi laj qʼuel majlel yaʼ baqui an, o cheʼ mi lac tsajcan majlel, miʼ mejlel lac taj laj cuxtʌlel mach bʌ anic miʼ jilel. Pero wiʼil to mi caj lac ñumen cʌn majlel iliyi.
Números 21:4-9; Juan 3:14, 15.