Cʌntesʌntel 74
Juntiquil winic mach bʌ yujilic bʌqʼuen
QʼUELE jini winicob xʼixicob woliʼ tseʼtañob jini chʼiton winic. ¿Awujil ba majqui? Jiñʌch Jeremías, juntiquil wen ñuc bʌ xʼaltʼan i chaʼan Dios.
Cheʼ bʌ jini rey Josías, maxto ñoj wajali tsaʼ caji i topʼ jini diosteʼ tac yaʼ bʌ an ti tejclum, Jioba tsiʼ sube Jeremías chaʼan mi yochel bajcheʼ xʼaltʼan i chaʼan bʌ. Pero, Jeremías mi yʌl chaʼan chʼiton winic jaxto chaʼan miʼ yochel bajcheʼ xʼaltʼan. Pero Jioba tsiʼ sube Jeremías chaʼan mi caj i coltan.
Jeremías tsiʼ sube jini israelob, chaʼan yom miʼ cʌy i melob jontolil. ‹Jini dios tac woli bʌ i chʼujutesañob jini winicob xʼixicob ti tejclum tac, mach isujmic›, cheʼ tsiʼ yʌlʌ. Pero muʼ bʌ i mulan i chʼujutesañob jini yonlel israelob, jiñʌch diosteʼ tac i mach jinic Jioba isujm bʌ Dios. Cheʼ bʌ Jeremías tsiʼ sube jini israelob chaʼan Dios mi caj yʌqʼuen i yilañob wocol chaʼan i jontolelob, jini xtejclumob tiʼ tseʼtayob Jeremías.
Tsaʼ ñumi cabʌl jabil. Cheʼ anix uxpʼejl uw i chʌmel Josías, juntiquil i yalobil i cʼabaʼ Joaquín tsaʼ ochi ti rey. Jeremías tsaʼ caji i chʌn suben jini xtejclumob: ‹Jerusalén mi caj i jisʌntel mi maʼanic mi laʼ qʼuextan laʼ bʌ›. Jini xmotomajob tsiʼ chucuyob jini Jeremías i tsiʼ chaʼleyob cʼam bʌ tʼan i tsaʼ yʌlʌyob: ‹Jeremías yom miʼ chʌmel; tsiʼ taja ti tʼan lac tejclum›.
¿Chuqui miʼ cajel i mel Jeremías wʌle? ¡Jeremías maʼanic woli ti bʌqʼuen! Tsiʼ sube tiʼ pejtelelob: ‹Jioba tsiʼ chocoyon tilel chaʼan mic subeñetla iliyi. Mi maʼanic mi laʼ qʼuextan laʼ melbal, Jioba mi caj i jisan Jerusalén. Pero yom bʌ mi laʼ ñaʼtan jiñʌch iliyi: Mi tsaʼ laʼ tsʌnsayon, mi caj laʼ tsʌnsan juntiquil winic mach bʌ melbilic i chaʼan jontolil›.
Jini yumʌlob maʼanic tsiʼ tsʌnsayob Jeremías, pero jini israelob maʼanic tsiʼ cʌyʌyob i mel jontolil. Ti wiʼil tsaʼ cʼoti Nabucodonosor, rey bʌ yaʼ ti Babilonia, i tiʼ chaʼle guerra yicʼot Jerusalén. Tiʼ yujtibal, Nabucodonosor tiʼ sujtesa jini israelob bajcheʼ i yaj eʼtelob. Tsiʼ pʌyʌ majlel yonlel yaʼ ti Babilonia. ¡Ñaʼtancu, bajcheʼ yubil maʼ wubin, cheʼ muqʼuic i pʌyetob majlel winicob xʼixicob mach bʌ a cʌñʌyobic, ti jumpʼejl tejclum mach bʌ cʌmbilic a chaʼan!
Jeremías 1:1-8; 10:1-5; 26:1-16; 2 Reyes 24:1-17.