Jehová miʼ choc majlel ti subtʼan Jeremías

Jehová tsiʼ yajca Jeremías bajcheʼ xʼaltʼan yaʼ ti tejclum Judá. Tsaʼ chojqui majlel chaʼan miʼ suben wiñicob xʼixicob (quixtañujob) chaʼan miʼ cʌy i melob mach bʌ weñic. Pero Jeremías tiʼ sube Jehová: «Maxto añic c jabilel, mach cujilic tʼan yaʼ baqui an wiñicob xʼixicob». Jehová tsiʼ yʌqʼue i tʼan: «Mach a chaʼlen bʌqʼuen, joñon mi caj j coltañet yicʼot c subeñet chuqui maʼ wʌl».

Jehová tiʼ sube Jeremías chaʼan miʼ tempan jiñi ancianojob, chaʼan miʼ topʼ jumpʼejl ucʼum yicʼot miʼ subeñob: «Cheʼʌch mi caj i yujtel Jerusalén bajcheʼ ili». Cheʼ bʌ tsiʼ mele (chaʼle) jiñi, tsaʼ wen michʼa jiñi ancianojob. Juntiquil motomaj i cʼabaʼ Pasur (Pasjur) tsiʼ bajbe Jeremías i tsiʼ ñetʼbe i yoc yicʼot i cʼʌb ti jumpʼejl teʼ. Jeremías maʼañic tsaʼ mejli i ñijcan i bʌ jumpʼejl acʼʌlel. Tiʼ yijcʼʌlel to tsiʼ colo. Jeremías tsiʼ yʌlʌ: «Mach mejloñix, mi caj j cʌy subtʼan». ¿Tsaʼʌch baʼ i cʌyʌ? Maʼañic. Jeremías tsiʼ wen ñaʼta i tsiʼ yʌlʌ: «I tʼan Jehová tsaʼ caji cubin tic pusicʼal bajcheʼ cʼajc woli bʌ ti lejmel. Mach mejlic j cʌy subtʼan». Jeremías tsaʼ chʌn caji ti subtʼan.

Cabʌl jab tsaʼ ñumi i tsaʼ caji ti yumʌntel yambʌ rey ti Judá. Mach yom i yubibeñob i tʼan Jeremías jiñi motomajob yicʼot jiñi lot bʌ xʼaltʼañob. Jin chaʼan tsiʼ subeyob i yalobilob jiñi rey: «Yom miʼ chʌmel ili wiñic». Jeremías tsiʼ yʌlʌ: «Mi tsaʼ laʼ tsʌnsayon, mi laʼ tsʌnsan juntiquil wiñic maʼañic bʌ i mul. Joñon mic sub muʼ bʌ i yʌl Jehová, mach bajñel c tʼañic». Cheʼ bʌ tsiʼ yubiyob jiñi tʼan i yalobilob jiñi rey, tsiʼ yʌlʌyob: «Maʼañic i mul ili wiñic chaʼan miʼ chʌmel».

Jeremías tsiʼ chʌn chaʼle subtʼan, pero i yalobilob jiñi rey tsaʼ wen michʼayob i tiʼ subeyob jiñi rey chaʼan miʼ tsʌnsan. Jiñi rey tsiʼ yʌlʌ chaʼan miʼ tumbeñob chuqui yomob. Jin chaʼan tsiʼ chucuyob i tsiʼ chocoyob ochel ti jumpʼejl pozo am bʌ i yocʼlel chaʼan miʼ chʌmel. Xucʼu xucʼul tsaʼ sujpʼij Jeremías.

Jiñi soldado Ebedmelec (Ébed-Mélec) tiʼ sube jiñi rey: «I yalobilob jiñi rey tsiʼ chocoyob ochel Jeremías ti jumpʼejl pozo. Mi maʼañic miʼ locʼsʌntel, mi caj i chʌmel». Jiñi rey tsiʼ chocbe majlel 30 wiñicob chaʼan miʼ locʼsañob Jeremías. Ili xʼaltʼan maʼañic tsiʼ cʌyʌ i chaʼlen subtʼan. ¿A wom ba a mel bajcheʼ Jeremías?