Jeremías maʼañic tiʼ cʌyʌ i yʌl i chaʼan bʌ Jehová

An wiñicob xʼixicob (quixtañujob) muʼ bʌ i michʼañob o mi wajleñoñobla cheʼ mi lac subeñob i chaʼan bʌ Jehová. Jiñi maʼañic miʼ yʌqʼueñonla lac tijicñʌyel, ¿ñomach? Tajol mi laj cʌl: «Maʼañix mi caj c chʌn al i chaʼan bʌ Jehová». ¿Am ba ujtemet bajcheʼ jiñi?... Jiñi Biblia miʼ taj ti tʼan juntiquil wiñic tsaʼ bʌ i cʼuxbi Jehová pero colel i cʌy i chaʼlen tʼan tiʼ tojlel. I cʼabaʼ jiñʌch Jeremías. Laʼ laj qʼuel chuqui tsiʼ chaʼle.

Cheʼ bʌ Jeremías chʼiton to, Jehová tiʼ sube chaʼan yom miʼ sub jumpʼejl tʼan wen ñuc bʌ i cʼʌjñibal. Yom miʼ suben jiñi quixtañujob chaʼan miʼ cʌyob i mel mach bʌ utsʼatic. Jeremías tiʼ bʌcʼña come wen wocol tiʼ yubi. Jin chaʼan, tiʼ sube Jehová: «Mach cujilic chuqui mic subeñob come wen chʼitoñon to». Pero Jehová tsiʼ jacʼbe: «Mach a chaʼlen bʌqʼuen come mi caj j coltañet».

Cheʼ jiñi Jeremías tsaʼ caji i suben jiñi wiñicob xʼixicob: «Mi maʼañic mi laʼ qʼuextan laʼ melbal, mi caj laʼ taj wocol». ¿Tsaʼ ba i chʼujbibeyob?... Maʼañic, an tsaʼ bʌ wen michʼayob yicʼot tsaʼ bʌ i wajleyob. ¡An tsaʼ to bʌ i jopʼo i tsʌnsañob! ¿Bajcheʼ tsiʼ yubi i bʌ maʼ wʌl jiñi Jeremías?... Tiʼ wen chaʼle bʌqʼuen, tsiʼ yʌlʌ: «Mach comix c chʌn al i chaʼan bʌ Jehová». Pero ¿tsaʼʌch ba i cʌyʌ i yʌl i chaʼan bʌ Jehová?... Maʼañic come miʼ wen cʼuxbin. Jehová tsiʼ cʌnta tiʼ contrajob come maʼañic tsiʼ liji i bʌ.

Jumpʼejl ejemplo jiñʌch cheʼ bʌ jontol bʌ wiñicob tsiʼ chocoyob ochel Jeremías ti jumpʼejl pozo am bʌ yocʼlel. Jeremías tsaʼ caji ti sujpʼel i maʼañic chuqui miʼ jap yicʼot chuqui miʼ cʼux. ¡Jiñi wiñicob yomob chaʼan Jeremías miʼ chʌmel! Pero ¿tsaʼ ba coltʌnti Jeremías? Tsaʼʌch come Jehová tsiʼ yʌcʼʌ ti locʼsʌntel ti jiñi pozo.

Ti ili cʌntesʌntel tsaʼix laj qʼuele chaʼan anquese Jeremías tsiʼ chaʼle bʌqʼuen maʼañic tsiʼ cʌyʌ i yʌl i chaʼan bʌ Jehová. ¿Chuqui miʼ mejlel a cʌn chaʼan Jeremías?... Chaʼan tajol an muʼ bʌ caj i wajleñetob o miʼ michʼañob cheʼ maʼ subeñob i chaʼan bʌ Jehová. O tajol miʼ yʌqʼueñet quisin o bʌqʼuen. Pero mach a wis cʌy a wʌl i chaʼan bʌ Jehová. Cʼajtesan chaʼan mi caj i coltañet tiʼ pejtelel ora, cheʼ bajcheʼ tiʼ colta Jeremías.