Cʌntesʌntel 108

Yaʼ ti bij majlem bʌ ti Damasco

¿AWUJIL ba majqui jini yaʼ bʌ toʼtsʼol ti lum? Jiñʌch Saulo. Jiñʌch tsaʼ bʌ i cʌntʌbe i bujcob tam bʌ i cʼʌb jini tsaʼ bʌ i juluyob ti xajlel Esteban. ¡Qʼuele cu jini sʌclel cʼajc chʼoyol bʌ ti panchan! ¿Chuqui woli ti ujtel?

Cheʼ bʌ tsaʼix i tsʌnsayob Esteban, Saulo tsaʼ majli i sʌclan jini xcʌntʼañob i chaʼan Jesús chaʼan miʼ tsʌnsʌntelob jaʼel. Tsaʼ ochi ti otot tac chaʼan miʼ locʼsan jini xcʌntʼañob chaʼan mi yotsañob ti mʌjquibʌl. Yonlel jini xcʌntʼañob tsaʼ putsʼiyob majlel ti yan tac bʌ tejclum i yaʼi tsiʼ subuyob jini «wen tʼan». Pero Saulo tsaʼ majli ti yan tac bʌ tejclum i sajcan jini xcʌntʼañob i chaʼan Jesús. Tsaʼ majli ti Damasco. Pero yaʼ ti bij, an chuqui tsaʼ bʌ ujti baqui toj sajtel i pusicʼal tsiʼ cʌyʌ jini Saulo:

Orajach tsaʼ tili i sʌclel cʼajc chʼoyol bʌ ti panchan tiʼ joytilel Saulo. Tsaʼ yajli ti lum, cheʼ bajcheʼ maʼ qʼuel yaʼ ti dibujo. Cheʼ jini tsiʼ yubi jini tʼan: ‹¡Saulo, Saulo! ¿Chucoch maʼ ticʼlañon?›. Jini winicob yaʼ bʌ an yicʼotob Saulo tsiʼ qʼueleyob jini sʌclel cʼajc jaʼel i tsaʼ yubiyob jini tʼan, pero maʼanic tsiʼ chʼʌmbeyob isujm jini tʼan.

‹¿Majquiyet c Yum?›, cheʼen Saulo.

Jesús tsiʼ jacʼʌ: ‹Joñoñʌch, woli bʌ a ticʼlan›. Jesús tsiʼ yʌlʌ bajcheʼ iliyi, cheʼ bʌ Saulo miʼ ticʼlan jini xcʌntʼañob, cheʼʌch bajcheʼ Jesús woli i ticʼlañob.

Saulo tsiʼ cʼajti: ‹¿Chuqui a wom mic mel, c Yum?›.

Jesús tsiʼ jacʼʌ: ‹Chʼojyen, ochen ti tejclum i cʼabaʼ Damasco, yaʼi mi caj a subentel chuqui yom maʼ mel›. Cheʼ bʌ jini Saulo tsaʼ chʼojyi ti lum, tsiʼ jamʌ i wut pero maʼanic chuqui tsaʼ mejli i qʼuel. ¡Tsaʼ sujti ti xpotsʼ! Jin chaʼan, jini winicob yaʼ bʌ an yicʼotob tsiʼ chucuyob majlel tiʼ cʼʌb chaʼan miʼ tojʼan majlel ti Damasco.

Jesús tsiʼ pejca juntiquil xcʌntʼan i chaʼan yaʼ bʌ an ti Damasco i tsiʼ sube: ‹Tejchen Ananías. Cucu ti bij, i cʼabaʼ Toj bʌ. Yaʼ ti yotot Judas, sajcan juntiquil winic i cʼabaʼ Saulo. Yajcʌbil c chaʼan, come mi caj i sujtel ti juntiquil ñuc bʌ c yaj eʼtel›.

Ananías tsiʼ jacʼʌ tsaʼ bʌ subenti ti Jesús. Cheʼ bʌ tsiʼ qʼuele Saulo, tsiʼ yʌcʼʌ i cʼʌb tiʼ jol, tsiʼ yʌlʌ: ‹Jini lac Yum tsiʼ chocoyon tilel chaʼan miʼ chaʼ cʼotel a wut, chaʼan maʼ bujtʼel ti chʼujul bʌ espíritu›. Ti orajach tsaʼ cʼajli loqʼuel i sujl i wut, i tsaʼ chaʼ mejli i qʼuel pañimil.

Saulo tsaʼ wen cʼʌjñi ti ñuc chaʼan miʼ suben jini wen tʼan winicob xʼixicob ti tejclum tac. Tsaʼ cʼoti ti cʌjñel bajcheʼ apóstol Pablo, cabʌl chuqui mi laj cʌn tiʼ tojlel. Pero laʼ lac ñaxan cʌn chuqui tsiʼ sube Dios jini Pedro yom bʌ miʼ mel.

Hechos 8:1-4; 9:1-20; 22:6-16; 26:8-20.