Cʌntesʌntel 2

Dios jiñʌch ñumen utsʼat bʌ la camigo miʼ mejlel lac taj

Cheʼ i yamigojonla Dios jiñʌch ñumen utsʼat bʌ miʼ mejlel lac taj. Dios mi caj i cʌntesañet bajcheʼ maʼ taj a tijicñʌyel chaʼan wen tijicñayix a pusicʼal; yicʼot mi caj i locʼsañet ti cabʌl ñopbalʌl mach bʌ isujmic, chaʼan maʼanix maʼ chʌn mel jini muʼ bʌ mejlel i ticʼlañet. Mi caj i ñichʼtʌbeñet a woracion tac. Mi caj i yʌqʼueñet i ñʌchʼtʌlel a pusicʼal yicʼot a pijtaya (Salmo 71:5; 73:28). Dios mi caj i coltañet cheʼ maʼ ñusan tsʌts tac bʌ wocol (Salmo 18:18). Jini chaʼan, Dios yom i yʌqʼueñet a majtan, jiñʌch a cuxtʌlel mach bʌ anic miʼ jilel (Romanos 6:23).

Cheʼ mi lac lʌcʼtesan lac bʌ ti Dios, woli lac lʌcʼtesan lac bʌ ti i yamigojob Dios jaʼel. Jini yamigojob Dios mi caj i sujtel ti a wamigojob jaʼel. Ti isujm, mi caj i sujtelob bajcheʼ a wermañojob. Tijicña mi caj i yubiñob cheʼ miʼ cʌntesañetob chaʼan Dios, miʼ cajel i coltañetob yicʼot mi caj i pʼʌtʼesañetob.

Mach lajaloñicla bajcheʼ Dios. Cheʼ mi lac sajcan i cʼuxbiya Dios, yom mi lac chʼʌmben isujm junchajp wen ñuc bʌ i cʼʌjñibal: laj cʼuxbiya yicʼot Dios mach lajalic bajcheʼ i chaʼan pañimil. Ti bajñelil wen cabʌlix i jabilel i ñumen cabʌl i ñaʼtʌbal yicʼot wen pʼʌtʌlʌch. Cojach tiʼ bajñelil miʼ mejlel lac Yuman. Jini chaʼan, mi la com cheʼ yamigojonla, yom mi lac ñichʼtʌben i tʼan yicʼot mi lac mel chuqui miʼ cʼajtibeñonla. Ti jacʼbentel i tʼan Dios lac wenlelʌch tiʼ pejtelel ora (Isaías 48:18).