Dios tsiʼ yʌqʼue jini winicob xʼixicob jumpʼejl paraíso chaʼan tiʼ majtan

«CHEʼ tiʼ cajibal tsiʼ mele Dios jini panchan yicʼot pañimil.» (Génesis 1:1.) Wen cʌmbil ili tʼan cʼʌlʌl ti wajali. Ili tʼan wen tsiquil bʌ yicʼot wen utsʼatax bʌ, jini Biblia mi yʌcʼ ti cʌjñel jini lac piʼʌl ñumen ñuc bʌ mi yʌl: Jehová, jini Dios cʼax pʼʌtʌl bʌ, tsaʼ bʌ i Mele pejtelel chuqui an ti panchan, yicʼot ti pañimil. Jini Biblia miʼ tsictesan, chaʼan bajcʼʌl jabil, miʼ suben chaʼpʼejl uxpʼejl qʼuin, Dios tsiʼ chajpa Pañimil.

Jini ñumen ñuc bʌ tsiʼ mele Jehová ti Pañimil jiñʌch jini winic. Jini ñaxam bʌ winic tsiʼ mele ti tsʼubejn. Tsiʼ mele Ti yejtal yicʼot chaʼan lajal miʼ mejlel i lajiben i cʼuxbiya, i ñaʼtʌbal yicʼot ti yan tac bʌ i melbal. Tsiʼ yotsʌbe i cʼabaʼ ti Adán yicʼot tsiʼ yʌcʼʌ ti paraíso, i cʼabaʼ Edén. Jiñʌch i tʼojol jax bʌ ajñibʌl tsaʼ bʌ i mele Dios yicʼot butʼul ti pʌcʼʌbʌl muʼ bʌ yʌcʼ wen sumuc bʌ i wut.

Jumpʼejl bʌ qʼuin, Dios tsiʼ ñaʼta chaʼan miʼ yʌqʼuen juntiquil i piʼʌl. Jini chaʼan, tsiʼ cʼʌmbe juntsʼijt i chʼilʼat Adán, tsiʼ mele Eva —ñaxam bʌ xʼixic— i tsiʼ yʌqʼue ti yijñam. Adán wen tijicña tsiʼ yubi, jini chaʼan tsiʼ mele utsʼatax bʌ tʼan baʼ mi yʌl: «Jiñʌch c bʌquel loqʼuem bʌ tic bʌquel yicʼot c bʌcʼtal loqʼuem bʌ tic bʌcʼtal». Cheʼʌch miʼ tsictesan jini Biblia: «Jini chaʼan winicob miʼ cʌyob i tat i ñaʼ. Miʼ chʌn ajñelob yicʼot i yijñam. Jini chaʼtiquil miʼ yochelob ti juntiquil jach» (Génesis 2:22-24; 3:20).

Adán yicʼot Eva an chaʼchajp mandar yom bʌ mi tsʼʌctesañob. Jini ñaxam bʌ, yom miʼ cʌntañob jini Pañimil, chaʼan miʼ pʌcʼob majlel yicʼot chaʼan miʼ pʼojlelob i yalobil. Jini i chaʼchajplel bʌ, an juntejc teʼ mach bʌ muqʼuic mejlel i cʼuxbeñob i wut —cojach bʌ an ti yojlil jini pʌcʼʌbʌl—: jini «teʼ muʼ bʌ i yʌqʼueñet a cʌn chuqui utsʼat yicʼot chuqui jontol» (Génesis 2:17). ¿Chuqui miʼ chaʼleñob mi tsiʼ ñusayob jini tʼan? Miʼ chʌmelob. Yaʼʌch baqui ora mi pʌsob chaʼan mi yumañob Dios, mi mucʼʌch i cʼuxbiñob yicʼot mi tijicñayobʌch chaʼan chuqui tsaʼ aqʼuentiyob. Tsaʼ aqʼuentiyob i wenlel chaʼan tsʼʌcʌl miʼ jacʼbeñob i tʼan Dios. Maʼanic chuqui mi mʌctañob, come jini Biblia mi yʌl: «Dios tsiʼ qʼuele pejtelel i melbal. ¡Awilan!, wen utsʼat» (Génesis 1:31).

(Loqʼuem ti capítulo 1 yicʼot 2 chaʼan Génesis.)