Jini rey Salomón am bʌ i ñaʼtʌbal

¿BAJCHEʼ yilalob jini winicob xʼixicob yaʼ ti tejclum yicʼot jini yumʌl cheʼ laj xucʼulobic yicʼot mi qʼuelob ti ñuc i yumʌntel Jehová? I yumʌntel jini Salomón tsaʼ bʌ jalʼa chaʼcʼal (40) jab mi yʌqʼuen i jacʼbal.

Cheʼ maxto anic chʌmen jini David, tsiʼ waʼchoco i qʼuexol jiñʌch i yalobil Salomón. Jumpʼejl bʌ qʼuin Salomón, tsiʼ qʼuele tiʼ ñajal Dios i tsiʼ sube chaʼan mi yʌqʼuen chuqui miʼ cʼajtiben. Jini chʼiton bʌ rey tsiʼ cʼajti i ñaʼtʌbal yicʼot i cʌmbal chaʼan bajcheʼ miʼ chaʼlen meloñel ti toj. Jehová utsʼat tsiʼ yubi chuqui tsiʼ cʼajtibe, jini chaʼan tsiʼ yʌqʼue. Yicʼot jaʼel, tsiʼ sube mi maʼanic mi cʌy i jacʼben i tʼan mi caj i taj cabʌl i chubʌʼan, i ñuclel yicʼot cabʌl jabil mi caj i chumtʌl.

Chaʼan cabʌl i ñaʼtʌbal Salomón, tsaʼ wen cʌjñi. An junyajl, chaʼtiquil xʼixic tsaʼ majliyob baʼan Salomón come woli i cajajtañob juntiquil alʌl. ¿Chuqui tsiʼ mele Salomón? ¡Tsiʼ yʌcʼʌ mandar chaʼan miʼ tsep ti ojlil jini alʌl! Jini ñaxam bʌ tijicña tsaʼ yubi, pero jini yambʌ tsaʼ yʌlʌ chaʼan mi yʌqʼuen jini yambʌ xʼixic. Cheʼʌch tsaʼ cʼoti i ñaʼtan Salomón majqui i ñaʼ jini alʌl. Cheʼ bʌ tsiʼ laj ubiyob jini winicob xʼixicob, tsiʼ ñaʼtayob chaʼan Salomón añʌch i ñaʼtʌbal ti Dios.

Jini tsaʼ bʌ i ñumen acʼʌ ti cʌjñel ili rey, jin cheʼ bʌ tsaʼ yʌcʼʌ ti melol jini ñuc bʌ i templo Jehová yaʼ ti Jerusalén jiñʌch baʼan i yotlel i chʼujutesʌntel Dios ti Israel. Cheʼ tsiʼ meleyob qʼuiñilel jini templo, Salomón tsiʼ pejca Dios ti oración i tsaʼ yʌlʌ: «¡Awilan! Mach ñuquic maʼ qʼuel panchan chaʼan yaʼ maʼ chumtʌl. ¡Chʼoʼchʼoc jax jini otot tsaʼ bʌ c waʼchocobeyet!» (1 Reyes 8:27).

Tsaʼ pam ubinti chuqui tsaʼ bʌ i mele Salomón ti ñajtʌl cʼʌlʌl to ti Seba (o Saba), yaʼ ti Arabia. Jini xʼixic bʌ yumʌl yaʼ ti Seba tsaʼ tili ti Israel chaʼan miʼ cʌmben i ñuclel yicʼot i chubʌʼan Salomón, yicʼot chaʼan miʼ yilan mi añʌch i ñaʼtʌbal. Tsaʼ toj sajti i pusicʼal yicʼot tsiʼ yʌqʼue i ñuclel Jehová chaʼan tsiʼ waʼchoco juntiquil rey am bʌ i ñaʼtʌbal. Yicʼot i bendición Dios i yumʌntel jini Salomón tsaʼ bʌ wen pʼojli i chubʌʼan yicʼot jiñʌch tsʼitaʼ jach bʌ tsiʼ chaʼle guerra cʼʌlʌl tiʼ tejchibal i yumʌntel Israel.

Chʼijiyem jax, chaʼan Salomón mach ti pejtelelic ora tsiʼ chaʼle xʌmbal yicʼot i ñaʼtʌbal Jehová. Anquese ticʼbil i chaʼan Dios cheʼ miʼ pʌyob cabʌl i yijñam jini yumʌlob, pero tsiʼ pʌyʌ yonlel xʼixicob i yonlel muʼ bʌ i chʼujutesañob dios tac mach bʌ isujmic. Iliyobi cʼunteʼ cʼunteʼ tsaʼ caji yʌqʼueñob i cʌy Jehová yicʼot tsiʼ yʌqʼueyob i ñop chaʼan miʼ chʼujutesan diosteʼ tac. Jini chaʼan, Dios tsiʼ sube jini i chaʼañoʼ bʌ chʼoʼchʼoc jax miʼ cajelob ti yumʌntel. Cojach chaʼan Dios tsiʼ yʌqʼue i tʼan jini David maʼanic tsiʼ luʼ sʌtʌ ti pejtelel. Anquese Salomón tsiʼ cʌyʌ Jehová, pero Dios chʌn xucʼul tsaʼ ajni yicʼot i trato tsaʼ bʌ i mele yicʼot David.

(Loqʼuem ti capítulo 1 cʼʌlʌl ti 11 chaʼan 1 Reyes, jini capítulo 1 cʼʌlʌl ti 9 chaʼan 2 Crónicas yicʼot Deuteronomio 17:17.)