I templo Jehová

Cheʼ bʌ Salomón tsiʼ teche yumʌntel yaʼ ti Israel, Jehová tsiʼ cʼajtibe: «¿Chuqui a wom mi cʌqʼueñet?». Salomón tsiʼ jacʼbe: «xColelon to i maxto cabʌl chuqui cujil i melol. A wocolic, aqʼueñon c ñaʼtʌbal chaʼan mij cʌntan a tejclum». Jehová tiʼ sube: «Tsaʼ cʼajtibeyon a ñaʼtʌbal, jin chaʼan mi caj c sujtesañet ti juntiquil wiñic wen am bʌ i ñaʼtʌbal tiʼ petol pañimil. Mi caj cʌqʼueñet a chubʌʼan yicʼot jal mi caj a chumtʌl mi mucʼʌch a jacʼ c tʼan».

Salomón tsaʼ caji i mel (pʌt) jiñi templo. Tsiʼ cʼʌñʌ oro, plata, teʼ yicʼot xajlel (tun). Luʼ wen tsaʼ bʌ i cʼʌñʌ. Cabʌl wen yujiloʼ bʌ eʼtel (troñel) tsaʼ caji i melob jiñi templo. Tsaʼ waʼchoconti ti 7 jab. Cheʼ jiñi tsaʼ yʌqʼueyob Jehová, i tsaʼ yʌcʼʌyob majtañʌl tac yaʼ ti pulʌntib. Salomón tsaʼ ñocle yaʼ tiʼ tojel jiñi pulʌntib i tsiʼ pejca Dios: «C Yum, Jehová, yom to maʼ wʌqʼuentel ñumen colem bʌ yicʼot utsʼatax bʌ templo bajcheʼ iliyi. Pero, a wocolic, chʼʌmʌ jiñi lon c chʼujutesaya yicʼot jiñi lon coración». ¿Chuqui tsaʼ ujti maʼ wʌl? ¿Tsaʼ ba i mulaj Jehová jiñi templo? ¿Tsaʼ ba i ñʌchʼtʌbe i yoración Salomón? Cheʼ bʌ tsaʼ ujti ti oración, tsaʼ jubi tilel cʼajc ti panchan i tsiʼ pulu jiñi majtañʌl tac. Cheʼʌch tsiʼ pʌsʌ Jehová bajcheʼ jiñi chaʼan mucʼʌch i mulan jiñi templo. Cheʼ bʌ jiñi israelob tsiʼ qʼueleyob jiñi, tsiʼ tajayob i tijicñʌyel.

Jiñi rey Salomón tsaʼ wen cʌjñi tiʼ pejtelel Israel yicʼot ti ñajt tac bʌ pañimil come wen an i ñaʼtʌbal. Cabʌl tsaʼ cʼoti i pejcañob Salomón chaʼan miʼ coltan i tojʼesañob i wocol. Jiñi reina i chaʼan Seba tsaʼ to i julaʼta jaʼel chaʼan miʼ melben wocol bʌ cʼajtiya tac chaʼan miʼ qʼuel mi añʌch cabʌl i ñaʼtʌbal. Cheʼ bʌ tsaʼ yubi bajcheʼ tsiʼ jacʼʌ Salomón, tsiʼ yʌlʌ: «Maʼañic tsaʼ c ñopo jiñi tsaʼ bʌ i yʌlʌyob ti a tojlel, pero wʌle mij qʼuel chaʼan ñumen anto a ñaʼtʌbal cheʼ bajcheʼ tsiʼ subeyoñob. A Dios Jehová tsiʼ wen aqʼuet a bendición». Utsʼatax chumtʌl yaʼ ti Israel yicʼot tijicñayob. Pero maʼañic tsaʼ jalʼa.