Jini carta tac tsaʼ bʌ i tsʼijbu Pablo chaʼan jini congregación tac

JINI xñoptʼañoʼ bʌ ti tsijiʼ bʌ congregación, mi caj i tsʼʌctesañob junchajp am bʌ i cʼʌjñibal ñaʼtʌbil bʌ i chaʼan Jehová. Pero jini yaʼ bʌ chucbilob yaʼ ti congregación tsiʼ yubiyob ticʼlʌntel yicʼot tsiʼ lʌtʼʌyob mach bʌ tsiquilic wocol yaʼ ti congregación. ¿Chuqui tsiʼ coltayob chaʼan xucʼul miʼ yajñelob? Jini jumpʼejl i chaʼcʼal (21) carta am bʌ ti Tsʼijbujel Griego tsiʼ pʼʌtʼesayob yicʼot jini ñuc tac bʌ ticʼojel wen am bʌ i cʼʌjñibal i chaʼañob.

Pablo i tsʼijbubalʌch jini ñaxam bʌ chʌnlujumpʼejl carta, miʼ tejchel ti carta chaʼan Romanos cʼʌlʌl ti carta chaʼan Hebreos. Tiʼ pejtelel luʼ an i cʼabaʼ baʼ miʼ chojquel majlel, tajol juntiquil winic o jumpʼejl congregación. Laʼ laj qʼuel lamital tsaʼ bʌ i yʌlʌ jini apóstol Pablo.

Jini wem bʌ lac melbal. Jini muʼ bʌ i ñoltʌl yicʼot yambʌ cheʼ mach ñujpuñemobic, o yan tac bʌ tsʌts bʌ mulil yicʼot mi maʼanic mi cʌyob i mul «maʼanic mi caj i yochel ti yumʌntel Dios» (Gálatas 5:19-21; 1 Corintios 6:9-11). Jini i winicob Jehová yom junlajal miʼ qʼuelob i bʌ yicʼot jini chumuloʼ bʌ ti yambʌ tejclum (Romanos 2:11; Efesios 4:1-6). Yom chaʼan pʼejwob yicʼot chaʼan miʼ coltañob i yermañojob ti Dios (2 Corintios 9:7). Jini apóstol Pablo miʼ suben jini xñoptʼañob, chaʼan miʼ jamob i pusicʼal ti Jehová yicʼot tsiʼ subeyob: «Chʌn chaʼlenla oración» (1 Tesalonicenses 5:17; 2 Tesalonicenses 3:1; Filipenses 4:6, 7). Pero chaʼan miʼ ñichʼtʌbeñetla Dios, yom chaʼan mi laʼ ñop cheʼ mi laʼ chaʼlen oración (Hebreos 11:6).

¿Baqui bʌ jini ticʼojel tsiʼ yʌcʼʌ Pablo chaʼan jini añoʼ bʌ ti jumpʼejl otot? Jini añoʼ bʌ i yijñam yom miʼ cʼuxbiñob cheʼ bajcheʼ miʼ bajñel cʼuxbiñob i bʌ. Cheʼ jaʼel, yom tilemob ti pusicʼal chaʼan miʼ qʼuelob ti ñuc i ñoxiʼal. Yicʼot jaʼel, Dios yom chaʼan jini alobob miʼ jacʼbeñob i tʼan i tat i ñaʼ, i jini tatʌlob yom yicʼot cʼuxbiya miʼ ticʼob cheʼ bajcheʼ mi yʌl ti Biblia (Efesios 5:22–6:4; Colosenses 3:18-21).

Chuqui ñaʼtʌbil i chaʼan Dios. Jini Mandar i chaʼan Moisés tsiʼ cʌnta yicʼot tsiʼ tojʼesayob jini israelob cʼʌlʌl cheʼ tsaʼ juli jini Mesías albil bʌ, pero jini xñoptʼañoʼ bʌ maʼanix miʼ chʌn subentelob chaʼan miʼ jacʼob (Gálatas 3:24). Yaʼ ti carta chaʼan Hebreos —judío bʌ xñoptʼañob—, Pablo tsiʼ tsictesa chuqui i cʼʌjñibal jini Mandar yicʼot jini yeʼtel Cristo chaʼan miʼ tsʼʌctiyel chuqui ñaʼtʌbil i chaʼan Dios. Tsiʼ tsictesa chaʼan an cabʌl jini Mandar tsaʼ bʌ tsʼʌctiyi ti wiʼil bʌ qʼuin. Cheʼ bajcheʼ jini añimal tac muʼ bʌ yʌcʼob ti majtañʌl yom yʌl cheʼ baʼ ora Jesús tsiʼ yʌcʼʌ i cuxtʌlel, tsaʼ bʌ cʼʌjñi chaʼan miʼ ñusʌntel lac mul ti pejtelel ora (Hebreos 10:1-4). Jini chaʼan, cheʼ tsaʼ chʌmi Cristo tsiʼ jisʌbe i cʼʌjñibal jini pacto chaʼan Mandar (Colosenses 2:13-17; Hebreos 8:13).

Cheʼ bajcheʼ muchʼquibil jini congregación. Jini winicob muʼ bʌ i yʌqʼuentelob i yeʼtel ti congregación yom chaʼan wen utsʼat i melbalob yicʼot chaʼan yom yujilob melol chuqui wen (1 Timoteo 3:1-10, 12, 13; Tito 1:5-9). Yicʼot jaʼel, an i cʼʌjñibal chaʼan jini i winicob Dios miʼ chʌn tempañob i bʌ chaʼan miʼ chʼʌmob i tijqʼuel am bʌ i cʼʌjñibal i chaʼan bʌ Dios yicʼot chaʼan miʼ pʼʌtʼesañob i bʌ ti jujuntiquil (1 Corintios 14:26, 31; Hebreos 10:24, 25).

Cheʼ bʌ Pablo tsiʼ tsʼijbu jini cojix bʌ i carta —i chaʼpʼejlel Timoteo— chaʼ yaʼan ti Roma, ñupʼbil yicʼot woliʼ pijtan chaʼan miʼ mel i bʌ. Lamital jach jini xñoptʼañob chʼejloʼ bʌ tsajñi i julaʼtañob. Come jini apóstol Pablo yujilix chaʼan lʌcʼʌlix mi caj ti chʌmel, tsiʼ tsʼijbu: «Tsac chaʼle wen bʌ guerra. Wʌle, cʼotemonix, baʼ jaxʌl c bijlel. Tsac wen cʌnta jini muʼ bʌ lac ñop» (2 Timoteo 4:7). Tajol mach jalix tsaʼ tsʌnsʌnti cheʼ jini. Pero jini carta tac, tsaʼ bʌ i tsʼijbu tsiʼ chʌn coltayob jini isujm bʌ xñoptʼañob chaʼan chʌn xucʼul miʼ melbeñob i yeʼtel Dios, cʼʌlʌl wʌle cheʼʌch woliʼ melob.

(Loqʼuem yaʼ ti Romanos, 1 Corintios 2 Corintios, Gálatas, Efesios, Filipenses, Colosenses, 1 Tesalonicenses 2 Tesalonicenses, 1 Timoteo 2 Timoteo, Tito, Filemón yicʼot Hebreos.)