Sʌclanla Dios chaʼan tijicña mi laʼ wajñel ti laʼ ñujpuñijel

Jehováa Dios tsiʼ yʌcʼʌ ti ñujpuñel jiñi ñaxam bʌ wiñic yicʼot xʼixic. Jiñi Biblia mi yʌl chaʼan Jehová tsiʼ mele jiñi xʼixic i «tsiʼ pʌyʌ tilel [...] baʼan jiñi wiñic». Adán wen tijicña ti yubi i bʌ i tsiʼ yʌlʌ: «Jiñʌch c bʌquel loqʼuem bʌ tic bʌquel yicʼot c bʌcʼtal loqʼuem bʌ tic bʌcʼtal» (Génesis 2:22, 23). Cʼʌlʌl ili ora, Jehová yom chaʼan tijicña miʼ chumtʌlob jiñi ñujpuñemoʼ bʌ.

Cheʼ bʌ miʼ ñujpuñel jiñi wiñicob xʼixicob (quixtañujob), tajol miʼ ñaʼtañob chaʼan wen utsʼat miʼ cajelob ti chumtʌl. Pero miʼ tajob wocol tac jaʼel jiñi muʼ bʌ i wen cʼuxbiñob i bʌ (1 Corintios 7:28). Ti ili folleto mi caj a taj principio tac am bʌ ti Biblia, ili mi caj i coltañet a taj a tijicñʌyel ti a ñujpuñijel yicʼot ti a familia mi mucʼʌch a chʼʌm ti ñuc (Salmo 19:8-11).

1 TSʼɅCTESAN JIÑI EʼTEL TSAʼ BɅ YɅQʼUEYET JEHOVÁ

MUʼ BɅ YɅL JIÑI BILIA: Jiñi wiñic jiñʌch i jol jiñi familia (Efesios 5:23).

Mi an a wijñam, Jehová yom chaʼan maʼ wen cʌntan (1 Pedro 3:7). Tsiʼ mele jiñi xʼixic bajcheʼ xyaj coltaya a chaʼan i yom chaʼan maʼ qʼuel ti ñuc yicʼot maʼ cʼuxbin (Génesis 2:18). Mach a bajñel jach yom maʼ chʼʌm a bʌ ti ñuc, yom maʼ cʼuxbin yicʼot maʼ chʼʌm ti ñuc chuqui miʼ subeñet jaʼel (Efesios 5:25-29).

Mi an a ñoxiʼal, Jehová yom chaʼan maʼ wen qʼuel ti ñuc yicʼot chaʼan maʼ coltan i tsʼʌctesan jiñi eʼtel (troñel) aqʼuebil bʌ ti Jehová (1 Corintios 11:3; Efesios 5:33). Coltan cheʼ an chuqui yom i mel, pero mele tiʼ pejtelel a pusicʼal (Colosenses 3:18). Mi mucʼʌch a mel, Jehová yicʼot a ñoxiʼal mi caj i wen qʼuelet ti ñuc (1 Pedro 3:1-6).

MUʼ BɅ MEJLEL A MEL:

• Cʼajtiben a piʼʌl (ñoxiʼal o a wijñam) chuqui miʼ mejlel a mel chaʼan maʼ tsʼʌctesan ti wen a weʼtel. Ñʌchʼtan chuqui miʼ subeñet yicʼot chaʼlen wersa a mel chuqui muʼ bʌ yʌl

• Yom a wujil pijt. Mach tiʼ pejtelelic muʼ bʌ i mulan a piʼʌl mi caj a mulan jaʼel

2 PɅSɅ CHAʼAN MUCʼɅCH A QʼUEL TI ÑUC A PIʼɅL

MUʼ BɅ YɅL JIÑI BIBLIA: Wen i cʼʌjñibal cheʼ maʼ chʼʌm ti ñuc chuqui yom a piʼʌl (Filipenses 2:3, 4). Yom utsʼat maʼ qʼuel a piʼʌl, cʼajtesan chaʼan Jehová yom chaʼan jiñi i wiñicob miʼ pʌsob i yutslel tiʼ pejtelel ora (2 Timoteo 2:24). Wen ñaʼtan chuqui mi caj a wʌl come jiñi Biblia miʼ subeñonla: «An wiñicob xʼixicob mach bʌ utsic i [tʼañob]. Miʼ jecʼonla bajcheʼ espada. I tʼan jiñi weñoʼ bʌ i pusicʼal i wentajʌch tsʼac muʼ bʌ i lajmesañonla» (Proverbios 12:18). Jiñi yespíritu Jehová mi caj i coltañet chaʼan maʼ chaʼlen tʼan yicʼot i yutslel a pusicʼal (Gálatas 5:22, 23; Colosenses 4:6).

MUʼ BɅ MEJLEL A MEL:

• Cʼajtiben Dios chaʼan miʼ coltañet a taj a ñʌchʼtʌlel yicʼot chaʼan maʼ ñaxan wen ñaʼtan cheʼ bʌ an chuqui mi caj a suben a piʼʌl ñuc bʌ i cʼʌjñibal

• Wen ñaʼtan chuqui mi caj a wʌl yicʼot bajcheʼ mi caj a chaʼlen tʼan

3 CʼAJTESAN CHAʼAN TEMEL AÑETLA

MUʼ BɅ YɅL JIÑI BIBLIA: Cheʼ bʌ miʼ ñujpuñelob, «jiñi chaʼtiquil miʼ yochelob ti juntiquil jach» (Mateo 19:5). Mach tiʼ pejtelelic ora lajal chuqui mi caj laʼ ñaʼtan come chʌn chaʼtiquiletola. Jin chaʼan, yom lajal mi laʼ cʌn laʼ chaʼlen pensar yicʼot laʼ cʼuxbin laʼ bʌ (Filipenses 2:2). Yom temel mi laʼ ñaʼtan cheʼ an chuqui laʼ wom laʼ mel. ¿Bajcheʼ miʼ mejlel jiñi? Jiñi Biblia mi yʌl: «Cheʼ maxto ñaʼtʌbilic a chaʼan bajcheʼ yom maʼ mel, cʼajtiben jiñi yujiloʼ bʌ» (Proverbios 20:18). Cʼʌñʌla jiñi principio tac am bʌ ti Biblia chaʼan miʼ coltañetla laʼ ñaʼtan ti utsʼat chuqui laʼ wom laʼ mel (Proverbios 8:32, 33).

MUʼ BɅ MEJLEL A MEL:

• Mach cojicach yom maʼ suben a piʼʌl chaʼan bʌ a weʼtel o yan tac bʌ, suben jaʼel bajcheʼ yubil maʼ wubin

• Cheʼ an chuqui a wom a mel, ñaxan alʌ a wicʼot a piʼʌl