¿Bajcheʼ yom miʼ tojʼesʌntel jiñi wocol tac?

Cheʼ bʌ juntiquil wiñic yicʼot xʼixic miʼ ñujpuñel miʼ tejchel wocol tac, tajol chaʼan mach lajalic chuqui miʼ ñaʼtañob yicʼot bajcheʼ miʼ yubiñob i bʌ o chaʼan bajcheʼ tsaʼ cosʌntiyob. Tajol jiñi wocol mach yaʼic loqʼuem ti a wotot o mach tsiquilic baqui miʼ tilel.

Tajol an maʼañic bʌ miʼ chʼʌmob ti ñuc jiñi woli (choncol) bʌ ti ujtel pero jiñi Biblia miʼ subeñonla chaʼan yom miʼ lajmesʌntel mi an chuqui woli ti ujtel (Mateo 5:23, 24). Mi caʼ taj a coltʌntel mi mucʼʌch a chʼʌm ti ñuc jiñi principio tac am bʌ ti Biblia.

1 CHAʼLENLA TʼAN CHAʼAN JIÑI WOCOL

MUʼ BɅ YɅL JIÑI BIBLIA: «An i yorajlel mi lac chaʼlen tʼan» (Eclesiastés 3:1, 7). Aqʼuen yorajlel chaʼan mi a wʌl chaʼan jiñi wocol, suben a piʼʌl (ñoxiʼal o a wijñam) bajcheʼ yubil maʼ wubin yicʼot chuqui maʼ ñaʼtan (Efesios 4:25). Anquese michʼet, mach a chaʼlen aʼleya. Cheʼ mi laʼ chaʼlen uts bʌ tʼan miʼ mejlel i mʌctan chaʼan maʼañic miʼ tejchel tsʌts bʌ wocol (Proverbios 15:4; 26:20).

Anquese mach lajalic i pensar a piʼʌl bajcheʼ jatet, mach yomic maʼ michʼan, chʌn pʌsben a cʼuxbiya yicʼot qʼuele ti ñuc (Colosenses 4:6). Chaʼlen wersa a tojʼesan jiñi wocol ti ora i mach a cʌy laʼ pejcan la bʌ (Efesios 4:26).

MUʼ BɅ MEJLEL A MEL:

• Sʌclanla i yorajlel chaʼan mi laʼ chaʼlen tʼan chaʼan jiñi laʼ wocol

• Ñʌchʼtʌben i tʼan jiñi a piʼʌl cheʼ bʌ an chuqui woli yʌl. Pijtan miʼ cʼotel i yorajlel chaʼan maʼ chaʼlen tʼan

2 ÑɅCHʼTAN YICʼOT CHʼɅMBEN ISUJM

MUʼ BɅ YɅL JIÑI BIBLIA: «Cʼuxbin laʼ bʌ come laʼ piʼʌl laʼ bʌ [...]. Yom ñumen ñuc mi laʼ qʼuel laʼ piʼʌlob bajcheʼ mi laʼ bajñel qʼuel laʼ bʌ» (Romanos 12:10). Wen ñuc i cʼʌjñibal cheʼ a wujil i ñʌchʼtʌntel tʼan yicʼot cheʼ a wujil i chʼʌmbentel isujm muʼ bʌ yʌl a piʼʌl, «cʼuxbin laʼ bʌ cheʼ bajcheʼ laʼ wijtsʼin laʼ bʌ», yicʼot «yom mi laʼ mel laʼ bʌ ti pecʼ» (1 Pedro 3:8; Santiago 1:19). Mach a pʌs chaʼan choncolʌch a poj ñʌchʼtan. Yom maʼ cʌy chuqui choncol a mel i ñʌchʼtan chuqui mi yʌl a piʼʌl o cʼajtiben mi mejletla ti tʼan ti wiʼil. Mi mucʼʌch a qʼuel a ñoxiʼal o a wijñam bajcheʼ a piʼʌl ti eʼtel (troñel) i mach cheʼic bajcheʼ juntiquil a contra, mach ti orajic maʼ cajel ti «bʌcʼ michʼan» (Eclesiastés 7:9).

MUʼ BɅ MEJLEL A MEL:

• Ñʌchʼtan ti wen chuqui mi yʌl a piʼʌl anquese maʼañic maʼ mulan

• Chʼʌmben isujm chuqui yom bʌ i subeñet. Qʼuele bajcheʼ yilal tiʼ wut yicʼot cheʼ bajcheʼ choncol ti tʼan

3 CHɅN CHAʼLEN WERSA

MUʼ BɅ YɅL JIÑI BIBLIA: «Pejtel eʼtel muʼ bʌ lac mel miʼ yʌcʼ i chobejtʌbal. Toʼol tʼan miʼ yotsañonla ti pobre» (Proverbios 14:23). Mach jasʌlic jach mi tsaʼix laʼ taja bajcheʼ yom miʼ tojʼesʌntel jiñi wocol. Yom mi laʼ tsʼʌctesan jiñi laʼ tʼan tsaʼ bʌ laʼ wʌlʌ. Anquese wocolʌch pero añʌch i wenlel (Proverbios 10:4). Mi temel mi laʼ chaʼlen eʼtel, «cabʌl mi mejlel» laʼ taj laʼ wenlel (Eclesiastés 4:9).

MUʼ BɅ MEJLEL A MEL:

• Ñaʼtan chuqui mi mejlel laʼ mel ti jujuntiquil chaʼan miʼ tojʼan jiñi wocol

• Yajcan la i yorajlel chaʼan mi laʼ qʼuel mi woliyʌch i tojʼan majlel laʼ wocol