Yom mi laʼ pʌs laʼ xucʼtʌlel

Jehová miʼ mulan cheʼ mi lac pʌs lac xucʼtʌlel (Salmo 18:25). Ili wen ñuc i cʼʌjñibal ti jumpʼejl ñujpuñijel come mi maʼañic jiñi xucʼtʌlel maʼañic mi caj ñopbeñob i bʌ chuqui miʼ subeñob i bʌ. I chaʼan miʼ colel jiñi cʼuxbiya, yom miʼ lajal ñopbeñob i bʌ.

Wʌle ora, mach pejtelelic jiñi ñujpuñemoʼ bʌ añob i xucʼtʌlel. Chaʼan maʼ cʌntan a ñujpuñijel an chaʼchajp yom bʌ maʼ mel.

1 QʼUELE TI ÑUC A ÑUJPUÑIJEL

MUʼ BɅ YɅL JIÑI BIBLIA: ‹Yajcanla chuqui ñumen wen› (Filipenses 1:10). Junchajp ñumen ñuc bʌ i cʼʌjñibal ti a cuxtʌlel jiñʌch a ñujpuñijel. Jin chaʼan, wen qʼuele ti ñuc.

Jehová yom chaʼan cojach maʼ qʼuel ti ñuc a piʼʌl (ñoxiʼal o a wijñam) chaʼan tijicña mi laʼ wajñel (Eclesiastés 9:9). Jehová mi yʌl jaʼel chaʼan mach yomic maʼ bajñel sʌclan a wenlel, yom mi laʼ sʌclan bajcheʼ maʼ tijicñesan laʼ bʌ (1 Corintios 10:24). Aqʼuen i ñaʼtan jiñi a piʼʌl chaʼan wen ñuc i cʼʌjñibal a chaʼan yicʼot chaʼan mucʼʌch a wen qʼuel ti ñuc.

MUʼ BɅ MEJLEL A MEL:

• Ñusan qʼuin yicʼot a piʼʌl i ñʌchʼtan chuqui mi yʌl

• Mach a bajñel ñaʼtan a wenlel, ñaʼtʌben i wenlel a piʼʌl jaʼel

2 CɅNTAN A PUSICʼAL

MUʼ BɅ YɅL JIÑI BIBLIA: «Majqui jach miʼ qʼuel xʼixic tiʼ [tsuculel] i pusicʼal tsaʼix i chaʼle tsʼiʼlel tiʼ pusicʼal yicʼot» (Mateo 5:28). Miʼ an majqui muʼto i chʌn ñaʼtan chaʼan bʌ jiñi tsʼiʼlel, mach xucʼulic an tiʼ tojlel i yijñam.

Jehová mi yʌl chaʼan wen ñuc i cʼʌjñibal cheʼ mi laj cʌntan lac pusicʼal (Proverbios 4:23; Jeremías 17:9). Chaʼan miʼ mejlel a mel jiñi, yom tsajilet ti chuqui maʼ qʼuel (Mateo 5:29, 30). Tsajcan jiñi ejemplo i chaʼan Job, tsaʼ bʌ i mele jumpʼejl trato yicʼot i wut chaʼan maʼañic miʼ qʼuel yambʌ xʼixic (Job 31:1). Mach yomic maʼ qʼuel jiñi pornografía. Mach a tech a mulan yambʌ xʼixic o wiñic mach bʌ a piʼʌlic.

MUʼ BɅ MEJLEL A MEL:

• Aqʼuen i ñaʼtan jiñi wiñicob xʼixicob (quixtañujob) chaʼan cojach maʼ cʼuxbin jiñi a piʼʌl

• Qʼuele ti ñuc bajcheʼ yubil miʼ yubin a piʼʌl yicʼot yom maʼ cʌy a mel jiñi mach bʌ muqʼuic i mulan