I mul jiñi rey David

Cheʼ bʌ tsaʼ chʌmi Saúl, tsaʼ ochi tsijiʼ bʌ rey, i cʼabaʼ David. An jaxto 30 i jabilel. Tsaʼ ñumi majlel jabil tac, i ti jumpʼejl bʌ acʼʌlel, cheʼ bʌ yaʼan tiʼ pam i palacio, tsiʼ taja i qʼuel cʼoʼtajax bʌ xʼixic. David tsaʼ cʼoti i ñaʼtan chaʼan jiñʌch Betsabé (Bat-Seba) yicʼot chaʼan i ñoxiʼal jiñʌch jiñi soldado Urías. David tsiʼ xiqʼui ti pʌyol tilel yaʼ tiʼ palacio, tsiʼ piʼleyob i bʌ i Betsabé an yalobil tsaʼ cʌyle. David tsiʼ jopʼo i muc jiñi i mul. Tsiʼ sube i yum soldadojob chaʼan miʼ ñaxan acʼ Urías yaʼ baqui woli (yʌquel) i yujtel guerra yicʼot chaʼan miʼ bajñel cʌyob. Urías tsaʼ chʌmi, David tsaʼ ñujpuñi yicʼot Betsabé.

Pero Jehová tsiʼ luʼ qʼuele jiñi tsaʼ bʌ i mele (chaʼle) David. ¿Chuqui tsiʼ mele Jehová? Tsiʼ choco majlel jiñi xʼaltʼan Natán chaʼan miʼ pejcan David. Natán tsiʼ sube: «An juntiquil wen chumul bʌ wiñic ti wajali am bʌ cabʌl i tiñʌmeʼ yicʼot juntiquil pʼumpʼun bʌ wiñic am jach bʌ juncojt i tiñʌmeʼ muʼ bʌ i wen cʼuxbin. Jiñi wen chumul bʌ wiñic tsiʼ chilbe jiñi cojach i tiñʌmeʼ jiñi pʼumpʼun bʌ». David tsaʼ wen michʼa i tsiʼ yʌlʌ: «¡Jiñi wiñic yom miʼ chʌmel!». Natán tiʼ sube: «¡Lajalet bajcheʼ jiñi wen chumul bʌ wiñic!». David wen chʼijiyem tsaʼ yubi i tiʼ sube Natán: «Tsaʼ c chaʼle mulil tiʼ tojlel Jehová». Jiñi mulil tsaʼ bʌ i mele tsiʼ yʌqʼue cabʌl wocol yicʼot i familia. Jehová tsiʼ yʌqʼue i toj i mul, pero maʼañic tiʼ tsʌnsa come tiʼ pʌsʌ i pecʼlel yicʼot tiʼ subu i mul.

David tsiʼ ñaʼta i melben (pʌtben) i templo Jehová. Pero Jehová tsiʼ yajca Salomón, i yalobil David, chaʼan miʼ mel jiñi templo. David tsaʼ caji i chajpʌben chuqui yom miʼ cʼʌn Salomón i tsiʼ yʌlʌ: «I templo Jehová yom utsʼatax miʼ cʌytʌl. Salomón chʼiton to, pero mi caj j coltan i luʼ chajpan». David tsiʼ wen acʼʌ i taqʼuin chaʼan miʼ mejlel jiñi templo. Tiʼ sʌcla wen yujiloʼ bʌ eʼtel (troñel), tsiʼ tempa oro yicʼot plata, i tsiʼ chʼʌmʌ tilel chʼujteʼ yaʼ ti Tiro yicʼot ti Sidón. Cheʼ bʌ tsʼitaʼ jachix yom chaʼan miʼ chʌmel David, tsiʼ yʌqʼue Salomón i juñilel bajcheʼ yom miʼ mel jiñi templo i tsiʼ sube: «Jehová tsaʼ yʌqʼueyon ili tʼan tac chaʼan mic tsʼijbun yicʼot chaʼan miʼ cʌqʼueñet. Jehová mi caj i coltañet. Mach a chaʼlen bʌqʼuen. Yom pʼʌtʌlet yicʼot yom maʼ mel jiñi eʼtel».