¿Bajcheʼ yom miʼ cʼʌjñel ti subtʼan jiñi alʌ carro chaʼan jun tac loqʼuem bʌ ti Biblia?

Jiñi subtʼan ti mesa tac o ti alʌ carro tac mucʼ jach bʌ i mejlel ti ñijcʌntel, woliʼ lʌcʼtesan cabʌl quixtañujob yom bʌ i cʌmbeñob i sujmlel (Juan 6:44). Jin chaʼan, subebil jiñi ancianojob chaʼan miʼ chajpañob jiñi subtʼan yaʼ baqui miʼ ñumel cabʌl quixtañujob am bʌ tiʼ territorio jiñi congregación. Come mucʼ jach i mejlel ti ñijcʌntel jiñi alʌ carro, an tajol mach wersajic miʼ cʼajtintel permiso ti jiñi añoʼ bʌ i yeʼtel. ¿Majqui miʼ mejlelob ti subtʼan yaʼi? Jiñi tsajal bʌ xsubtʼañob, jiñi wem bʌ miʼ pʌsob i bʌ yicʼot jiñi mach bʌ wocolic miʼ yubiñob chaʼan miʼ chaʼleñob tʼan. Laʼ laj qʼuel lamital yom bʌ miʼ mejlel yicʼot mach bʌ yomic. Cheʼ miʼ chʼujbintel ili tʼan tac, mi caj i coltan jiñi xsubtʼañob chaʼan miʼ ñumen tajob i wenlel ti ili subtʼan.

Yom bʌ miʼ mejlel:

Yom utset i qʼuele jiñi muʼ bʌ i ñumelob. Chaʼlen wersa chaʼan tseʼtseʼña maʼ mel a bʌ yicʼot pejcan ti uts jiñi xñumelob. Cheʼ an majqui miʼ waʼtʌl i qʼuel jiñi alʌ carro, miʼ mejlel a suben: «Mi a wom, miʼ mejlel a chʼʌm majlel ili jun tac».
Yom wen jach i ñajtlel maʼ wajñel yaʼ baqui an jiñi alʌ carro. An territorio tac baʼ qʼuelbil i chaʼan jiñi xsubtʼañob chaʼan ñumen wen cheʼ mach ñajtic miʼ yajñelob ti jiñi alʌ carro, pero tajol mach tiʼ pejtelel ora cheʼ yom bajcheʼ jiñi. Tajol ñumen wen cheʼ tsʼitaʼ ñajt mi la cajñel ti jiñi alʌ carro, i jin to mi lac lʌcʼtesan lac bʌ cheʼ an majqui miʼ cʼotel i qʼuel jiñi jun tac. Ti jiñi bʌ ora, chaʼlen wersa chaʼan maʼ tech tʼan yicʼot jumpʼej cʼajtiya, tajol miʼ mejlel a suben: «¿Am baʼ melbe a bʌ ili cʼajtiya?».
Cheʼ bʌ mejletʌch, cʼʌñʌ jiñi Biblia.
Mi an majqui tsiʼ chʼʌmʌ jumpʼejl jun muʼ bʌ laj cʼʌn ti pʌs estudio, bajcheʼ jiñi libro Enseña, tsictesʌben bajcheʼ mi lac pʌs jiñi estudio i suben chaʼan a wom a pʌsben jiñi video ¿Chucoch yom mi lac pejcan jiñi Biblia?
Mi an majqui yom i ñumen cʌn, mi mucʼʌch i mejlel, cʼajtiben baqui chumul o bajcheʼ miʼ mejlel a pejcan.

Mach bʌ yomic miʼ mejlel:

Cheʼ mi lac michʼan yicʼot cheʼ mi lac wersa sub jiñi jun tac o cheʼ mi laj cʌntan jiñi alʌ carro bajcheʼ juntiquil xcʌntaya.
Cheʼ mi lac ñaʼtan chaʼan ili subtʼan chaʼan jach mi lac puc jiñi jun tac. La com bʌ ti ili subtʼan jiñʌch chaʼan mi lac tech estudio tac, jin chaʼan yom mi lac chaʼlen wersa chaʼan mi lac tech tʼan yicʼot jiñi quixtañujob.
Cheʼ mi lac mʌctan jiñi alʌ carro o cheʼ mi lac wen pejcan jiñi lac piʼʌl ti subtʼan. Mi wersa yom maʼ cʼʌn a celular, tsʼitaʼ ñajtʼesan a bʌ yaʼ ti alʌ carro.
Cheʼ mi lac chaʼlen aʼleya yicʼot jiñi maʼañic bʌ miʼ mulañob jiñi wen tʼan. Mi an majqui yomix jatsʼ, yom mi lac chʼʌm majlel ti yambʌ parte jiñi alʌ carro.