Laʼ laj coltan jiñi xpotsʼob chaʼan miʼ cʌñob Jehová
1. ¿Bajcheʼ tsiʼ pʌsʌ Jesús chaʼan mucʼʌch i cʼojoʼtan jiñi xpotsʼob?
1 Jesús muqʼuix caj i loqʼuel majlel ti Jericó. Cheʼ jiñi, chaʼtiquil xpotsʼob tsaʼ cajiyob ti cʼam bʌ tʼan: «C Yum, [...] pʼuntañon lojon». Ti jiñi bʌ ora, Jesús woliʼ ti wen pensar come yujil chaʼan lʌcʼʌlix miʼ caj ti chʌmel. Pero tsaʼ waʼle, tsiʼ pʌyʌyob tilel i tiʼ tsʼʌcayob (Mt. 20:29-34). ¿Bajcheʼ miʼ mejlel lac lajin i pʼuntaya Jesús?
2. ¿Bajcheʼ miʼ mejlel lac subeñob jiñi wen tʼan jiñi xpotsʼob muʼ bʌ lac tajob ti calle?
2 Laʼ laj coltañob. Mi tsaʼ lac taj juntiquil xpotsʼ, tajol ti calle, laʼ lac pejcan i laʼ laj coltan. Tajol ti ñaxan maʼañic miʼ ñop chuqui mi lac suben come an muʼ bʌ i ñusañob i bʌ tiʼ tojlelob yicʼot miʼ ticʼlañob. Pero mi utsonla yicʼot mi mucʼʌch lac pʌs chaʼan com laj coltan, tajol maʼañic miʼ chaʼlen bʌqʼuen. Yom mi lac ñaʼtan jaʼel chaʼan añʌch muʼ bʌ i tsʼitaʼ cʼotelob i wut i an maʼañic bʌ, i jiñi miʼ mejlel i coltañonla chaʼan mi lac ñaʼtan bajcheʼ yom mi laj coltañob. Ti wiʼil, miʼ mejlel lac subeñob chaʼan woli lac chaʼlen cʌntesa loqʼuem bʌ ti Biblia. Laʼ lac pejcʌben texto tac, cheʼ bajcheʼ Salmo 146:8 o Isaías 35:5, 6. Miʼ mejlel laj coltan chaʼan miʼ chaʼlen ti descargar jiñi formato am bʌ ti audio yaʼ ti jw.org. Mi yujil i pejcʌntel jun ti braille, laʼ laj cʼajtiben mi yom jun tac am bʌ ti braille. Mi an i computadora am bʌ i chaʼan jiñi programa muʼ bʌ i pejcan texto tac ti pantalla, tajol miʼ mejlel i coltan jiñi temaj tac am bʌ ti jw.org yicʼot jiñi jun tac am bʌ ti formato RTF, ili chaʼpʼejl formato cojach an ti español o ti yan tac bʌ tʼan wen cʌmbil bʌ. (Qʼuele jiñi recuadro «Cheʼ maʼ coltan juntiquil xpotsʼ...».)
3. ¿Bajcheʼ miʼ mejlel lac sʌclan jiñi xpotsʼob yaʼ ti lac territorio?
3 Laʼ lac sʌclan jiñi xpotsʼob. Isujmʌch, maʼañic mi lac wen tajob jiñi xpotsʼob cheʼ mi lac ñumel ti jujumpʼejl otot come maʼañic miʼ pejcañob jiñi mach bʌ i cʌñʌyobic muʼ bʌ i cʼotelob yaʼ tiʼ yototob. Jin chaʼan, yom mi lac chaʼlen wersa lac sʌclañob yicʼot lac subeñob jiñi wen tʼan (Mt. 10:11). ¿Am ba xpotsʼ bʌ lac piʼʌl ti troñel o ti escuela? Mi añʌch, laʼ lac suben jiñi wen tʼan. Mi ti lac territorio an jumpʼejl escuela chaʼan xpotsʼob, laʼ laj cʼajtiben jiñi director mi yom mi lac chʼʌmben majlel jun tac ti braille chaʼan miʼ yʌcʼ yaʼ ti biblioteca. ¿Am ba majqui cʌmbil lac chaʼan am bʌ juntiquil xpotsʼ tiʼ familia? ¿Am ba organización tac ti lac territorio muʼ bʌ i coltan jiñi xpotsʼob o am ba otot tac baqui chumulob? Laʼ lac tsictesʌbeñob i familia, jiñi am bʌ tiʼ wenta jiñi otot o jiñi director yaʼ ti escuela chaʼan com laj coltan jiñi xpotsʼob, come an lac chaʼan jun tac ti braille yicʼot grabación tac. Laʼ lac pʌsbeñob ti Biblia baʼ miʼ yʌl chaʼan Dios mi caj i junyajlel jisan i cʼamʌjel jiñi xpotsʼob. Miʼ mejlel lac pʌsbeñob jaʼel jiñi video «Mach cujilic chuqui yom mic mel cheʼ machic an jiñi Biblia ti braille», am bʌ ti jw.org/ctu. Ili video miʼ yʌl jiñi wenlel am bʌ i taja juntiquil xpotsʼ cheʼ an jiñi Biblia ti braille. Mi weñʌch mi lac sub chucoch woliyonla ti julaʼ, tajol mach wocolic mi caj mejlel lac pejcan jiñi xpotsʼob.
4. ¿Chuqui miʼ cʌntesañonla jiñi experiencia i chaʼan Janet?
4 Janet, juntiquil xpotsʼ bʌ la quermaña tsajñi baʼ chumul jiñi xpotsʼob, i tsaʼ caji ti tʼan yicʼot juntiquil xchʼoc. Janet tiʼ sube: «Cheʼ tsajñi Jesús wʌʼ ti Pañimil, tiʼ tsʼʌcʌ lamital xpotsʼob chaʼan miʼ pʌs muʼ bʌ caj i mel ti tal to bʌ qʼuin chaʼan tiʼ pejtelel jiñi xpotsʼob». Tiʼ tsajiyob Apocalipsis 21:3, 4, i tiʼ tsictesʌbe bajcheʼ mi caj i tsʼʌctesan i Yumʌntel Dios ili tʼan. Jiñi xchʼoc ñʌchʼʌl tsaʼ cʌyle jumucʼ, i tsiʼ yʌlʌ: «Maʼañic baʼ subebil i chaʼañon juntiquil xpotsʼ bajcheʼ jiñi. Cabʌl miʼ yʌlob chaʼan jiñi xpotsʼob woliʼ tojob i mul chaʼan tsaʼ bʌ i meleyob o tiʼ caj tsaʼ bʌ i mele i ñojteʼelob». Janet tiʼ chocbe majlel ti correo electrónico chaʼan miʼ taj jiñi libro Enseña, i wʌle, chaʼyaj miʼ pejcañob jiñi Biblia ti jujumpʼejl semana.
5. Anquese mach mejlic lac tsʼʌcan jiñi xpotsʼob, ¿bajcheʼ mi caj i tojʼan i cuxtʌlelob mi mucʼʌch laj qʼuelob ti ñuc?
5 Isujmʌch, mach mejlic lac tsʼʌcan jiñi xpotsʼob bajcheʼ tsiʼ mele Jesús. Pero añʌch chuqui miʼ mejlel lac mel. I dios ili pañimil an i mʌcbe i wut cabʌlob, yaʼ ochemob jaʼel jiñi literal bʌ xpotsʼob. Miʼ mejlel laj coltañob chaʼan miʼ chʼʌmbeñob i sujm i Tʼan Dios (2 Co. 4:4). Jesús tiʼ tsʼʌcʌ jiñi xpotsʼob yaʼ tiʼ tʼejl Jericó come tsiʼ pʼunta (Mt. 20:34). Mi mucʼʌch laj qʼuelob ti ñuc jaʼel, mi caj i mejlel laj coltañob chaʼan miʼ cʌñob Jehová, jiñi muʼ bʌ caj i chaʼ aqʼueñob i wut jiñi xpotsʼob tiʼ pejtelel ora.