¿Bajcheʼ miʼ mejlel ti cʼʌjñel jiñi grabación tac?
1. ¿Bajcheʼ yambʌ miʼ mejlel lac taj jiñi jun tac loqʼuem bʌ ti Biblia?
1 Wocolix i yʌlʌ jiñi página jw.org, cabʌl quixtañujob miʼ tajob i wenlel cheʼ miʼ pejcañob cʌntesʌntel tac utsʼatax bʌ yicʼot isujm bʌ (Ec. 12:10). Pero ¿ñʌchʼtʌbilix a chaʼan jiñi grabación tac? Cabʌl jun tac ti ili página mi lac taj jaʼel ti audio. ¿Baqui bʌ i wenlel mi lac taj?
2. ¿Bajcheʼ miʼ mejlel laj cʼʌn jiñi grabación tac cheʼ mi lac bajñel pejcan jiñi Biblia o yicʼot lac familia?
2 Chaʼan maʼ bajñel pejcan jiñi Biblia o yicʼot a familia. Cheʼ mi lac ñʌchʼtan ti grabación jiñi Biblia, jiñi revista o yambʌ jun cheʼ an baqui woli lac majlel o cheʼ choncol lac mel la queʼtel ti jujumpʼejl qʼuin, miʼ pʌs chaʼan maʼañic mi lac toʼol ñusan qʼuin (Ef. 5:15, 16). Chaʼan mach lajalic chuqui mi lac mel ti bele ora ti lac chʼujutesaya ti familia, miʼ mejlel laj qʼuel jumpʼejl jun loqʼuem bʌ ti Biblia i mi lac ñʌchʼtan majlel ti audio. Cheʼ mi lac bajñel pejcan jiñi Biblia, jiñi grabación tac miʼ coltañonla chaʼan mi lac weñʼesan lac bʌ tiʼ pejcʌntel jun yicʼot mi woli laj cʌn yambʌ tʼan.
3. ¿Majqui miʼ mejlel i tajob i wenlel chaʼan jiñi grabación tac yaʼ ti subtʼan?
3 Ti subtʼan. Cabʌlob muʼ bʌ lac taj ti subtʼan miʼ ñaʼtañob chaʼan wen añob i yeʼtel, i maʼañic miʼ mejlel i pejcañob jun, pero tajol yomʌch i ñʌchʼtañob jumpʼejl grabación. An yujiloʼ bʌ yambʌ tʼan i tajol miʼ ñumen ñʌchʼtañob jiñi wen tʼan mi añobʌch tiʼ tʼan (Hch. 2:6-8). An cultura tac baqui wen ñuc i cʼʌjñibal i ñʌchʼtʌntel tʼan. Jumpʼejl ejemplo, yaʼ ti tejclum hmong añob i chaʼan jumpʼejl tradición chaʼan jiñi tatʌlob miʼ subeñob i yalobilob chuqui tac tsaʼ ujti ti wajali, i ti ora miʼ cʼajtesañob jiñi tsaʼ bʌ i ñʌchʼtayob. Ti cabʌl parte yaʼ ti África, jiñi quixtañujob miʼ mulan i cʌñob cheʼ miʼ ñʌchʼtañob tsaʼ bʌ ujti ti wajali.
4. Cheʼ mi caj laj cʼʌn ti subtʼan jiñi grabación tac, ¿baqui tac bʌ cʼajtiya miʼ mejlel lac ñaxan melben lac bʌ?
4 Yaʼ ti lac territorio, ¿wem ba cheʼ mi lac tsʼitaʼ acʼ jiñi grabación chaʼan jiñi quixtañu miʼ ñʌchʼtan tiʼ tʼan? ¿A wujil ba majqui miʼ mejlel i taj i wenlel cheʼ mi lac chocben majlel ti correo i grabación jumpʼejl jun loqʼuem bʌ ti Biblia? ¿Wem ba cheʼ mi lac chaʼlen ti descargar ti jumpʼejl disco, i mi la cʌqʼuen jiñi yom bʌ i ñumen cʌn yicʼot mi la cʌqʼuen jaʼel ti jun? Jujumpʼejl libro, folleto, revista o tratado muʼ bʌ la cʌcʼ ti audio miʼ mejlel lac tsic yaʼ ti lac informe chaʼan subtʼan. Jiñi grabación tac mach cojach tsaʼ mejli chaʼan mi laj cʼʌn cheʼ mi lac bajñel pejcan jiñi Biblia, tsaʼ mejli jeʼel chaʼan mi lac pʌcʼ i sujmlel (1 Co. 3:6).