I MELBAL JIÑI XÑOPTʼAN
Laʼ lac tem chaʼlen subtʼan baqui yujilob yambʌ tʼan
Jiñi quixtañujob ñumen wen miʼ jacʼob jiñi wen tʼan cheʼ bʌ miʼ subentelob tiʼ tʼañob. Tajol jin chaʼan, cheʼ ti Pentecostés ti jabil 33, Jehová tsiʼ yʌcʼʌ chaʼan jiñi judíojob muʼ bʌ i ñopob Dios ‹chʼoyoloʼ bʌ ti jujumpʼejl lum tac› miʼ yubiñob jiñi wen tʼan tiʼ tʼañob anquese tajol yujilob jiñi tʼan hebreo o griego (Hch. 2:5, 8). Ili ora an congregación tac yujiloʼ bʌ yambʌ tʼan muʼ bʌ i chaʼleñob subtʼan tiʼ territorio tac yambʌ congregación. ¿Chuqui yom miʼ melob jiñi xsubtʼañob chaʼan miʼ subeñob wen tʼan jiñi quixtañujob i chaʼan mach lolom jach miʼ melob i maʼañic miʼ yʌcʼob ti michʼan jiñi quixtañujob?
Yom miʼ tem chaʼleñob tʼan (Pr. 15:22): Jiñi am bʌ tiʼ wenta subtʼan yom miʼ tem chajpañob bajcheʼ miʼ cajelob ti subtʼan yicʼot miʼ qʼuelob muʼ bʌ i yʌqʼuen i wenlel jiñi hermañojob. Mi mach wen colemic i territorio jiñi congregación tac tajol mach yomobic mi lac chaʼlen subtʼan yaʼi. Pero mi ñumen colem i territorio i mach tiʼ pejtelelic ora miʼ chaʼleñob subtʼan yaʼi, tajol yomob chaʼan mi laj coltañob, i mi lac subeñob mi tsaʼ lac taja juntiquil yom bʌ i ñumen cʌn chaʼan jiñi Biblia (od-S i yopol 93 párr. 37). Tajol miʼ subeñob laj congregación chaʼan mi laj coltañob lac sʌclan quixtañujob yujiloʼ bʌ jiñi tʼan bajcheʼ jiñi congregación i chaʼan miʼ tsʼijbuñob baqui chumulob jiñi quixtañujob (km 5/15 i yopol 1 párr. 2, 3). Yom cʼajal lac chaʼan, ti jumpʼejl otot, tajol mach jumpʼejl jach tʼan yujilob. Cheʼ bajcheʼ chajpʌbil i chaʼan jiñi congregación chaʼan bajcheʼ miʼ mejlel jiñi subtʼan, yom miʼ tsʼʌctesan mi an jumpʼejl ley baqui miʼ yʌl chaʼan mach yomic mi lac ñusʌben yambʌ i dirección jiñi quixtañu.
Laʼ lac tem chaʼlen eʼtel (Ef. 4:16): Yom mi lac jacʼ ti wen chuqui miʼ yʌl jiñi am bʌ tiʼ wenta subtʼan. ¿Woli ba la cʌqʼuen estudio juntiquil mach bʌ lajalic i tʼan bajcheʼ i chaʼan laj congregación? Tajol jiñi woli bʌ i chʼʌm estudio mi caj i colel majlel ti ora tiʼ chaʼan bʌ Dios mi tsaʼ caji i yʌqʼuen juntiquil yujil bʌ i tʼan.
Laʼ lac chajpan lac bʌ (Pr. 15:28; 16:1): Mi tsaʼ taja juntiquil ti a territorio yujil bʌ yambʌ tʼan, chaʼlen wersa chaʼan maʼ suben jiñi wen tʼan. Chaʼan chajpʌbilet, ñaxan ñaʼtan baqui tac bʌ tʼan yujilob ti a territorio, chaʼlen ti descargar jiñi Biblia yicʼot jiñi video tac an tac bʌ ti jiñi tʼan. Cheʼ jaʼel, miʼ mejlel a cʼʌn jiñi JW Language chaʼan maʼ tsʼitaʼ cʌn bajcheʼ yom maʼ pejcañob.