Ñumen weñʼesan a subtʼan: Coltan jiñi weñoʼ bʌ i pusicʼal chaʼan miʼ sujtelob ti xcʌntʼan

¿CHUCOCH ÑUC I CʼɅJÑIBAL? Jehová miʼ yʌcʼ ti colel tiʼ pusicʼal jiñi yomoʼ bʌ i cʌñob i sujmlel chaʼan miʼ tajob i cuxtʌlel (Hch. 13:48; 1 Co. 3:7). Mi lac tem chaʼlen eʼtel la quicʼot Jehová cheʼ mi laj coltañob jiñi woli bʌ i jacʼob muʼ bʌ i yʌl jiñi Biblia (1 Co. 9:26, Jini wen bʌ tʼan). Yom miʼ ñaʼtañob chaʼan ñaxan yom miʼ chʼʌmob jaʼ chaʼan miʼ tajob i cuxtʌlel (1 P. 3:21). Chaʼan miʼ sujtelob ti xcʌntʼan jiñi muʼ bʌ la cʌqʼueñob estudio, yom mi laj coltañob i qʼuextan i melbal, chaʼan miʼ chaʼleñob subtʼan, miʼ cʌntesan yambʌlob yicʼot chaʼan miʼ yʌcʼob i bʌ ti Jehová (Mt. 28:19, 20).

¿BAJCHEʼ YOM MIʼ MEJLEL?

• Yom maʼ cʼajtesʌben jiñi choncol bʌ laʼ pʌsben estudio chaʼan laʼ wom miʼ cʌñob Jehová yicʼot chaʼan miʼ tijicñesʌbeñob i pusicʼal (Jn. 17:3).

• Chaʼan miʼ colelob tiʼ chaʼan bʌ Jehová, yom maʼ coltañob chaʼan miʼ cʌyob i mel jiñi mach bʌ weñic yicʼot chaʼan miʼ cʌy i ñochtañob jiñi mach weñobic i melbal.

• Pʼʌtʼesañob yicʼot tijicñesʌbeñob i pusicʼal cheʼ bʌ maxto i chaʼleyob chʼʌmjaʼ yicʼot cheʼ bʌ tsaʼix i chaʼleyob (Hch. 14:22).

CHEʼ BɅ TSAʼIX LAʼ QʼUELE JIÑI VIDEO JEHOVÁ MI CAJ I COLTAÑET, JACʼɅ ILI CʼAJTIYA TAC:

• ¿Chuqui miʼ mejlel i mʌctan juntiquil chaʼan maʼañic miʼ yʌcʼ i bʌ ti Jehová yicʼot miʼ chʼʌmjaʼ?

• ¿Chuqui miʼ mejlel i mel jiñi ancianojob chaʼan miʼ coltan jiñi woli bʌ i chʼʌmob estudio chaʼan miʼ colelob tiʼ chaʼan bʌ Jehová?

• ¿Chuqui miʼ cʌntesañonla tiʼ tojlel Jehová jiñi Isaías 41:10?

• ¿Baqui bʌ lac melbal mi caj i coltañonla chaʼan mi lac melben i yeʼtel Jehová cheʼ bajcheʼ yom anquese xmulilonla?