Coltan jiñi muʼ bʌ a wʌqʼueñob estudio chaʼan miʼ cʌyob jiñi mach bʌ weñobic i melbal

Mi yomob sujtel tiʼ yamigo Jehová jiñi woli bʌ la cʌqʼueñob estudio yom miʼ sʌclañob wem bʌ i yamigojob (Sal. 15:1, 4). Jiñi wem bʌ i yamigojob mi caj i coltañob chaʼan miʼ melob chuqui wen (Pr. 13:20; lff cʌntesʌntel 48).

Cheʼ maʼ coltan jiñi woli bʌ a wʌqʼuen estudio chaʼan miʼ cʌyob jiñi i yamigojob mach bʌ weñobic i melbal, yom maʼ pʌs a pijt come tajol wocolʌch miʼ yubiñob chaʼan miʼ cʌyob jiñi i yamigojob. Jin chaʼan, jajayajl maʼ wʌqʼuen estudio pʌsʌ chaʼan mucʼʌch a qʼuel ti ñuc. Miʼ mejlel a chocbeñob majlel mensaje, a pejcañob o maʼ julaʼtañob. Cheʼ bʌ wolix i ñumen lʌcʼtesan i bʌ ti Jehová, pʌyʌ chaʼan miʼ yajñel yicʼot yambʌ hermanojob. Cheʼ bajcheʼ jiñi mi caj i qʼuelob chaʼan woliʼ ñumen tajob i yamigojob (Mr 10:29, 30). Cheʼ jaʼel, tijicña mi caj a wubin cheʼ bʌ maʼ qʼuel chaʼan woliʼ ñumen colel i familia Jehová.

CHEʼ BɅ TSAʼIX LAʼ QʼUELE JIÑI VIDEO LAʼ LAJ COLTAN JIÑI MUʼ BɅ LA CɅQʼUEÑOB ESTUDIO CHAʼAN MIʼ CɅYOB JIÑI MACH BɅ WEÑOBIC I MELBAL, JACʼɅ ILI CʼAJTIYA TAC:

• ¿Chuqui yom i yʌl jiñi mach bʌ weñobic i melbal? (1Co 15:33).

• ¿Bajcheʼ yilal tsiʼ ñaʼta Coral chaʼan miʼ ñusañob i bʌ jiñi Testigojob?

• ¿Bajcheʼ tsiʼ colta Rita jiñi Coral chaʼan miʼ taj yambʌ i yamigojob?