Maʼañic baʼ ora an j cʌyʌ j cʌn

Tsaʼ quila pañimil (chʼocʼayon) ti 1927 ti jumpʼejl alʌ tejclum lʌcʼʌ ti Chicago (Illinois, Estados Unidos). Joʼtiquilon lojon: Jetha, Don, joñon, Karl yicʼot Joy. Ti lon c joʼticlel wen com lon c melben i yeʼtel (troñel) Jehová. Jetha tsajñi ti clase chaʼan Galaad ti 1943. I jiñi querañob tsaʼ pʌjyiyob ti Betel ti Brooklyn (Nueva York), Don tsaʼ pʌjyi ti 1944, Karl ti 1947, i Joy ti 1951. Tsaʼʌch i wen coltayon jiñi wem bʌ i yejemplo querañob yicʼot i chaʼan jiñi c papá c mamá.

JEHOVÁ MIʼ COLTAN C FAMILIA CHAʼAN MIʼ CɅN I SUJMLEL

Jiñi c papá yicʼot c mamá ñʌmʌl i pejcañob jiñi Biblia i miʼ wen cʼuxbiñob Dios, i cheʼʌch tiʼ cʌntesayon lojon jaʼel. Jiñi c papá tsajñi ti jiñi Primera Guerra Mundial ti Europa, i cheʼ bʌ tsaʼ sujti maʼañix chuqui yom i ñaʼtan chaʼan jiñi ñopbalʌl. Pero jiñi c mamá wen tijicña cheʼ tsaʼʌch chaʼ sujti jiñi c papá, i tiʼ sube: «Karl, chaʼ conla ti iglesia cheʼ bajcheʼ ti wajali». Jiñi c papá tsiʼ jacʼbe: «Mi caj c pʌyet majlel, pero maʼan mi caj cochel», jiñi c mamá tsiʼ cʼajtibe chucoch. I jiñi c papá tsiʼ yʌlʌ: «Cheʼ bʌ woli (yʌquel) jiñi guerra, tsaʼ j qʼuele chaʼan jiñi ñucoʼ bʌ i yeʼtel ti ñopbalʌl woliʼ chaʼleñob ti bendecir jiñi soldadojob yicʼotob i juloñib, woliʼ contrajiñob i bʌ anquese junlajalob i ñopbal. ¿¡Tsaʼ ba i colta Dios ili soldadojob woli bʌ i contrajiñob i bʌ!?».

Ti jumpʼejl bʌ qʼuin cheʼ bʌ c mamá an ti iglesia, yaʼ ti lon cotot tsaʼ cʼoti chaʼtiquil Testigojob, tsiʼ pejcayob c papá i tsiʼ yʌqʼueyob jumpʼejl libro chaʼpʼejl bʌ volumen i cʼabaʼ Luz, ili libro miʼ taj ti tʼan chaʼan Apocalipsis. Jiñi c papá tsiʼ chʼʌmʌ jiñi libro come tsiʼ wen mulaj. Cheʼ bʌ jiñi c mamá tsiʼ taja i qʼuel ili libro tsaʼ caji i pejcan. Ti wiʼil tsiʼ taja i qʼuel jumpʼejl invitación ti periódico baqui miʼ pʌjyel lac piʼʌlob chaʼan miʼ chʼʌmob estudio yicʼot jiñi libro, i jiñi c mamá tsaʼ majli yaʼi. Cheʼ bʌ tsaʼ cʼoti, yaʼan juntiquil xʼixic añix bʌ i jabilel. Jiñi c mamá yicʼotix majlel jiñi libro, i tsiʼ cʼajti: «¿Wʌʼ ba baqui miʼ chaʼlentel ti estudiar ili libro?». Jiñi xʼixic añix bʌ i jabilel tsiʼ jacʼʌ: «Wʌʼʌchi, ochen». Ti yambʌ semana jiñi c mamá tsiʼ pʌyʌyon majlel yicʼot querañob, i cʼʌlʌl ti jimbʌ ora maʼañic tsaʼ lon j cʌyʌ majlel.

Jiñi hermano woli bʌ i ñusan tempa bʌ ti jimbʌ ora tiʼ subeyon chaʼan mic pejcan jiñi Salmo 144:​15, baqui miʼ taj ti tʼan chaʼan jiñi muʼ bʌ i melbeñob i yeʼtel Jehová tijicñayob. ¡Tsaʼ c wen mulaj ili texto! I tsiʼ coltayon jaʼel ili chaʼpʼejl versículo: 1 Timoteo 1:​11, baqui miʼ yʌl chaʼan Jehová jiñʌch jiñi tijicña bʌ Dios, yicʼot Efesios 5:​1, muʼ bʌ i subeñonla chaʼan mi lac lajin Dios. Tsaʼ cʼoti c ñaʼtan chaʼan yom mic ñusan c bʌ ti chuqui tac mic mel tiʼ tojlel Dios yicʼot mi cʌqʼuen wocolix i yʌlʌ cheʼ mic mejlel c melben i yeʼtel, ili chaʼchajp añʌch i wen coltayon tilel.

Jiñi congregación ñumen lʌcʼʌl bʌ an ti Chicago, 32 kilómetro cʌylem cʼʌlʌl baqui chumulon lojon. Pero anquese ñajt baqui mi lon j cajñel ti tempa bʌ mucʼʌch lon c majlel, i tsaʼ c ñumen cʌñʌ muʼ bʌ i yʌl jiñi Biblia. Ti jumpʼejl bʌ qʼuin Jetha tsiʼ yʌcʼʌ i comentario, cheʼ bʌ tsaʼ cubi, tsaʼ c ñaʼta: «Cujilʌch tsaʼ i jacʼbal jeʼel, ¿chucoch maʼan tsaʼ c letsa j cʼʌb?». Jin chaʼan, cʼʌlʌl ti jimbʌ ora tsaʼ c chaʼle wersa c chajpan c bʌ chaʼan jiñi tempa bʌ tac i mi cʌcʼ j comentario. Tsaʼ c chaʼle wersa jaʼel chaʼan mic ñumen lʌcʼtesan c bʌ ti Jehová cheʼ bajcheʼ querañob, i ti 1941 tsaʼ c chʼʌmʌ jaʼ.

JEHOVÁ TSIʼ CʼɅÑɅ JIÑI ASAMBLEA TAC CHAʼAN MIʼ CɅNTESAÑON

Wen cʼajal c chaʼan jiñi asamblea tsaʼ bʌ mejli ti Cleveland (Ohio) ti 1942. Jiñi lon c familia yicʼot yambʌ familia tac tsaʼ cʌleyob ti tienda de campaña lʌcʼʌl yaʼ baqui tsaʼ mejli jiñi asamblea. Cheʼ jaʼel, jiñi hermanojob tsaʼ mejli i ñʌchʼtañob jiñi asamblea ti teléfono ñumen ti 50 parte ti Estados Unidos. Ti jiñi bʌ ora bej wolito jiñi Segunda Guerra Mundial i woli i ñumen contrajintelob jiñi i testigojob Jehová. Jin chaʼan, jiñi hermanojob tsiʼ wen chajpayob bajcheʼ miʼ chaʼleñob ti estacionar i carro ti acʼʌlel. Tsiʼ comol alʌyob chaʼan an majqui miʼ cʌytʌl ti jujumpʼejl carro chaʼan miʼ mel guardia ti acʼʌlel, mi an chuqui miʼ taj i qʼuelob miʼ tsʼʌybeñob i luz jiñi carro chaʼan miʼ tsʼʌycʼʌcʼañob jiñi yomoʼ bʌ ochel i miʼ wen petsʼbeñob jiñi i bocinajlel. Cheʼ bajcheʼ jiñi, jiñi yambʌlob miʼ mejlelob ti tilel ti coltaya, joñon tsaʼ c ñaʼta: «Jiñi i tejclum Jehová wen chajpʌbilʌch, tsaʼʌch mejli j cʼaj co come maʼañic chuqui tsaʼ ujti, i cʌntʌbil tsaʼ cubi c bʌ».

Cheʼ bʌ mic chaʼ ñaʼtan jiñi asamblea, mij cʼajtesan chaʼan jiñi c mamá maʼañic tsiʼ wis chaʼle bʌqʼuen, tsaʼʌch i wen ñopo ti Jehová yicʼot tiʼ yorganización. Maʼañic mi caj i wis ñajʌyel c chaʼan tsaʼ bʌ i mele.

Cheʼ bʌ mach jalix yom chaʼan ili asamblea, jiñi c mamá tsaʼ ochi bajcheʼ precursora regular, jin chaʼan tsaʼ caji i ñumen ñʌchʼtan jiñi discurso tac muʼ bʌ i ñumen taj ti tʼan bajcheʼ mi lac ñumen melben i yeʼtel Jehová. Cheʼ bʌ sujtel mucʼon lojon ti cotot, jiñi c mamá tsiʼ yʌlʌ: «Com bej ajñel bajcheʼ precursora, pero ¿bajcheʼ miʼ mejlel c tsʼʌctesan iliyi i cheʼ jaʼel mic mel jiñi queʼtel ti otot?». Tsiʼ cʼajtibeyon lojon mi mejl lon j coltan, i tsaʼ c sube lon chaʼan mucʼʌch. Tiʼ subeyon lojon chaʼan mi lon c sujcun jumpʼejl o chaʼpʼejl cuarto cheʼ bʌ muʼto caj cʼux lon c waj ti sʌcʼan. Cheʼ bʌ tsaʼix majliyon lon ti escuela, miʼ qʼuel mi luʼ tojʼesʌbilʌch chuqui an ti otot i cheʼ jiñi miʼ majlel ti subtʼan. Anquese cabʌlʌch chuqui yom miʼ mejlel, tsaʼʌch i bej cʌntayon lojon. Cheʼ bʌ mi lon c loqʼuel ti escuela yaʼʌch an yicʼoton lon. An i tajol mi lon c majlel ti subtʼan cheʼ bʌ tsaʼix loqʼuiyon lojon ti clase, jiñi tsiʼ coltayon lojon jaʼel chaʼan mi lon c ñaʼtan chuqui miʼ mel juntiquil precursor.

TSAʼ CAJI C ÑUMEN MELBEN I YEʼTEL JEHOVÁ

Cheʼ bʌ 16 c jabilel tsaʼ ochiyon bajcheʼ precursor, jiñi c papá maxto Testigojic, pero tsiʼ mulaj i ñaʼtan bajcheʼ yilal majlel jiñi c subtʼan. Ti jumpʼejl acʼʌlel tsaʼ c sube chaʼan anquese woliyʌch c chaʼlen wersa maʼañic majqui yom estudio yicʼoton, ñʌchʼʌl tsaʼ cʌleyon lojon, cheʼ jiñi tsaʼ j cʼajtibe, «¿mejl ba cʌqʼueñet estudio?». Tsiʼ jumucʼ ñaʼta i tiʼ subeyon: «Maʼañic chuqui miʼ mʌctañon chaʼan maʼañic». Jin chaʼan jiñi ñaxam bʌ c estudiante jiñʌch c papá, jiñi tsaʼ c wen mulaj.

Tsaʼ lon c chaʼle ti estudiar jiñi libro «La verdad os hará libres». Tsaʼ j qʼuele chaʼan jiñi c papá woliʼ coltañon chaʼan ñumen wem bʌ xcʌntesajon yicʼot mic ñumen chajpan jiñi Biblia. Ti jumpʼejl acʼʌlel cheʼ bʌ tsaʼix lon c pejca jumpʼejl párrafo, tiʼ subeyon, «iliyi jiñʌch muʼ bʌ i yʌl jiñi libro, pero ¿bajcheʼ a wujil miʼ sujmʌch muʼ bʌ i yʌl?». Come mach chajpʌbiloñic, tsaʼ c sube: «Mach cujilic bajcheʼ mic jacʼbeñet, pero cheʼ bʌ mi lac chaʼ chaʼlen estudio mic subeñet». Tsaʼ c taja chaʼpʼej uxpʼejl versículo muʼ bʌ i taj ti tʼan jiñi tsaʼ bʌ lon cʌlʌ, cʼʌlʌl ti jimbʌ ora tsaʼ c ñumen cʌñʌ c mel investigación chaʼan ñumen chajpʌbilon cheʼ ba ora mi cʌcʼ estudio. Pejtelel iliyi tsiʼ colta c papá i tsiʼ coltayon jaʼel chaʼan mi lon c ñumen taj lon c ñaʼtʌbal, jiñi c papá tsiʼ jacʼʌ tsaʼ bʌ i cʌñʌ i tsiʼ chʼʌmʌ jaʼ ti 1952.

YAN TAC BɅ META TSAʼ BɅ I COLTAYON CHAʼAN MIC ÑUMEN CɅN

Cheʼ bʌ 17 c jabilel tsaʼ loqʼuiyon ti cotot, lʌcʼʌ ti jimbʌ ora Jethaa tsaʼ sujti ti misionera, i Don tsaʼ pʌjyi ti Betel. Tiʼ chaʼticlelob miʼ wen mulañob i asignación i jin chaʼan tsaʼ caji c mulan jaʼel. Tsaʼ c butʼu c solicitud chaʼan Betel yicʼot chaʼan jiñi Escuela de Galaad i tsaʼ j cʌybe tiʼ wenta Jehová, cheʼ ti 1946 tsaʼ pʌjyiyon ti Betel.

Cʼʌlʌl wajali tsaʼ aqʼuentiyon cabʌl eʼtel ti Betel i cabʌl chuqui tsijib tac bʌ tsaʼ j cʌñʌ. Tsaʼ j cʌñʌ c chaʼlen ti imprimir libro, tsaʼ j cʌñʌ j qʼuel chaʼan bʌ contabilidad, tsaʼ j cʌñʌ c mʌn chuqui tac i cʼʌjñibal bʌ ila ti Betel yicʼot chaʼan mic choc majlel chuqui tac i cʼʌjñibal ti yan tac bʌ parte. Pero jiñi am bʌ c ñumen mulaj ili 75 jab jiñʌch jiñi cʌntesa tac muʼ bʌ i ñusʌntel ti adoración matutina yicʼot yan tac bʌ programa am bʌ ila ti Betel.

Cabʌl chuqui tsaʼ j cʌñʌ jaʼel ti jiñi quijtsʼin Karl, tsaʼ bʌ cʼoti ti Betel ti 1947, wem bʌ xcʌntesa yicʼot miʼ wen pejcan jiñi Biblia. Ti jumpʼejl bʌ qʼuin tsaʼ j cʼajtibe chaʼan miʼ coltañon ti jumpʼejl discurso, tsaʼ c sube chaʼan tsaʼix c wen sʌcla información, pero maʼix mic ñaʼtan bajcheʼ mij cʼʌn. Tsaʼ jach i melbeyon jumpʼejl cʼajtiya: «Joel, ¿baqui bʌ i temajlel jiñi a discurso?». Ti ora tsaʼ c ñaʼta chuqui yom i subeñon, yom jach mij cʼʌn jiñi ñumen ñuc tac bʌ i cʼʌjñibal. Maʼañic tsaʼ ñajayi c chaʼan tsaʼ bʌ i subeyon.

Chaʼan tijicñayonla ti Betel, yom mi lac wen chaʼlen subtʼan. Mi mucʼʌch lac mel miʼ mejlel lac taj wen tac bʌ experiencia. Jumpʼejl ejemplo, wen cʼajal c chaʼan tsaʼ bʌ ujti junsujtel cheʼ bʌ woliyon lon ti subtʼan ti Bronx cheʼ bʌ iqʼuix. Cheʼ bʌ muʼto caj lon c tech subtʼan, joñon yicʼot juntiquil hermano tsaʼ majli lon j qʼuel juntiquil xʼixic tsaʼ bʌ i chʼʌmʌ jiñi revista Lac tsictesʌbentel yicʼot ¡Jamʌx a wut! Tsaʼ c sube lon: «Ti ili acʼʌlel woli lon c suben lac piʼʌlob chuqui utsʼatax bʌ miʼ yʌl jiñi Biblia». Tsiʼ jacʼbeyon lojon: «Mi chaʼañʌch Biblia, ochenla», tsaʼ c pejcʌbe lon cabʌl texto muʼ bʌ i taj ti tʼan jiñi i Yumʌntel Dios yicʼot chaʼan jiñi tsijiʼ bʌ pañimil. Tsaʼ j qʼuele lon chaʼan tsaʼʌch i mulaj come cheʼ bʌ tsaʼ majliyon lon ti yambʌ semana yaʼix an cabʌl i yamigojob yicʼot, ti wiʼil jiñi xʼixic yicʼot i piʼʌl tsaʼ sujtiyob ti Testigo.

CABɅL CHUQUI MIJ CɅN TIʼ TOJLEL QUIJÑAM

Anquese tsaʼʌch c ñaʼta ñujpuñel, tsaʼto ñumi 10 jab chaʼan mij cʌn jiñi tsaʼ bʌ sujti ti quijñam, ¿chuqui tsiʼ coltayon c taj wem bʌ c piʼʌl?, tsaʼ c sube Jehová chaʼan miʼ coltañon i tsaʼ j cʼajtibe c bʌ: «¿Bajcheʼ mi caj c bej cʼʌn j cuxtʌlel cheʼ ñujpuñemoñix?».

Cheʼ bʌ tsaʼ ñumi jiñi asamblea ti 1953 yaʼ ti Estadio de los Yankees, tsaʼ j cʌñʌ juntiquil hermana i cʼabaʼ Mary Aniol, lajal tsajñi yicʼot c chich ti jiñi clase chaʼan Galaad i wʌle i piʼʌlob i bʌ ti subtʼan. Mary wen tijicña miʼ subeñon bajcheʼ yilal tiʼ asignación yaʼ ti Caribe yicʼot bajcheʼ an i yʌcʼʌ cabʌl estudio cʼʌlʌl wajali. Cheʼ tsaʼ j cʌñʌ lon c bʌ tsaʼ lon j qʼuele chaʼan ti lon c chaʼticlel com lon c bej melben i yeʼtel Jehová. Tsaʼ caji c ñumen mulan lon c bʌ i tsaʼ ñujpuñiyon lon ti 1955. Mary jumpʼejlʌch c majtan tilem bʌ Jehová i an i yʌqʼueyon wem bʌ ejemplo, mach yʌlʌyic baqui bʌ i asignación, bele ora tijicña. Wen yujil eʼtel, miʼ chʼʌm ti ñuc yambʌlob i ti bele ora miʼ yʌcʼ ti ñaxan i Yumʌntel Dios (Mat. 6:33). Uxpʼejl jab tsaʼ ajñiyon lon bajcheʼ viajante, i cheʼ ti 1958 tsaʼ pʌjyiyon lon ti Betel.

Cabʌl chuqui tsaʼ j cʌñʌ tiʼ tojlel Mary, cheʼ bʌ tsijib ñujpuñemon lon tsaʼ lon cʌlʌ chaʼan mi caj lon c tem pejcan 15 versículo ti jujumpʼejl qʼuin. Cheʼ bʌ tsaʼ c pejca lon jiñi versículo tac mi lon j comol al yicʼot mi lon j qʼuel bajcheʼ miʼ mejlel lon j cʼʌn ti lon j cuxtʌlel. Mary miʼ wen subeñon chuqui tac tsiʼ cʌñʌ ti Galaad yicʼot cheʼ bʌ tsaʼ ajñi bajcheʼ misionera. Jiñi tsiʼ coltayon chaʼan mic ñumen taj c ñaʼtʌbal, mic weñʼesan c discurso tac yicʼot chaʼan mic ñumen ñaʼtan bajcheʼ miʼ mejlel j coltan jiñi hermanajob (Pr. 25:11).

Jiñi quijñam tsaʼ chʌmi (sajti) ti 2013, ¡wen comix j qʼuel ti tsijiʼ bʌ pañimil! Pero ili ora comto c bej cʌn yicʼot c bej ñop Jehová tiʼ pejtelel c pusicʼal (Pr. 3:​5, 6). Wen tijicña mi cubin c bʌ cheʼ bʌ mic ñaʼtan muʼ bʌ caj i mel i tejclum Dios ti jiñi tsijiʼ bʌ pañimil. Ti jimbʌ ora, jiñi laj Caj cʌntesa cabʌl chuqui tsijiʼ bʌ mi caj i pʌsbeñonla i mi caj i mejlel lac ñumen ñop tiʼ tojlel. Cabʌl chuqui an i cʌntesayon Jehová i an i wen pʌsbeyon i yutslel, maʼañic baqui ora mi caj i mejlel c sutqʼuiben pejtelel am bʌ i mele tic tojlel.