Jiñi jontolil woli i yʌcʼ ti wocol jiñi políticojob | ¿Chuqui miʼ yʌl jiñi Biblia?

Ili ora tiʼ petol pañimil wen cabʌl wocol chaʼan política.

• Ti México, cheʼ ti septiembre 2023 cʼʌlʌl ti junio 2024, tsaʼ tsʌnsʌntiyob 39 candidatojob yomoʼ bʌ i taj i yeʼtel ti política, ñumento cheʼ bajcheʼ jiñi jabil ñumen tac bʌ.

• Yaʼ ti Europa wen cabʌlʌch jontolil muʼ bʌ i yʌcʼ ti wocol jiñi políticojob, yaʼ ochem cheʼ bʌ tsiʼ ñopo i tsʌnsañob jiñi yumʌl ti Eslovaquia cheʼ ti 15 de mayo chaʼan 2024.

• Jiñi lac piʼʌlob ti Estados Unidos tsaʼ toj sajtiyob i pusicʼal cheʼ bʌ tsiʼ ñopo i tsʌnsañob jiñi expresidente Donald Trump ti 13 de julio chaʼan 2024.

¿Chucoch wen an jontolil woli bʌ i yʌcʼ ti wocol jiñi políticojob? ¿Muʼ ba caj i jilel ti jumpʼejl bʌ qʼuin? ¿Chuqui miʼ yʌl jiñi Biblia?

Jiñi Biblia tsiʼ wʌn alʌ chaʼan miʼ cajel tʼox bʌ tiʼ caj política

Jiñi Biblia tsiʼ wʌn alʌ chaʼan ti ili ora, cʌmbil bʌ bajcheʼ «jiñi cojix tac bʌ qʼuin», cabʌl lac piʼʌlob mi caj i pʌsob i melbal tac muʼ bʌ i yʌcʼ tʼox bʌ.

• «Ti jiñi cojix tac bʌ qʼuin wen wocol miʼ cajel yicʼot bʌbʌqʼuen. Come jiñi lac piʼʌlob mi caj i bajñel cʼuxbiñob i bʌ, [...] maʼañic mi caj i yʌcʼob wocolix i yʌlʌ, maʼañic mi caj i pʌsob i xucʼtʌlel, [...] maʼañic mi caj i mulañob i sʌclan ñʌchʼtʌlel, [...] wen jontolob, [...] mi caj i melob mach bʌ weñic tiʼ tojlel i yamigojob, miʼ waʼ melob chuqui yomob, ñumen ñuc mi caj i yubiñob i bʌ» (2 Timoteo 3:1-4).

Jiñi Biblia tsaʼʌch i wʌn alʌ chaʼan jiñi jontolil yicʼot wocol tiʼ tojlel jiñi yumʌlob mucʼʌch cajel lac wen qʼuel ti ili cojix bʌ qʼuin (Lucas 21:9, nota). Pero pejtelel iliyi mucʼʌch caj i jilel.

¿Jala miʼ caj ti jilel jiñi jontolil?

Jiñi Biblia miʼ tsictesan chaʼan Dios mi caj i jisan pejtelel jiñi yumʌlob i jin jach mi caj i chaʼlen yumʌntel.

• «Jini Dios am bʌ ti panchan mi caj i waʼchocon yambʌ Yumʌl […]. Mi caj i mʌjlel i chaʼan. Mi caj i laj jisan pejtel jini yumʌlob. Mi caj i yajñel ti pejtelel ora» (Daniel 2:44).

Jiñi i Yumʌntel Dios mi caj i yʌcʼ i sujm bʌ ñʌchʼtʌlel tiʼ pejtelel pañimil i juntemel mi caj la cajñel.

• Jesucristo miʼ subentel bajcheʼ «Xlajmesaleto muʼ bʌ i chaʼlen yumʌl». Mi caj i yʌcʼ ñʌchʼtʌlel tiʼ pejtelel ora (Isaías 9:6, 7).

• Ili ora, jiñi woli bʌ i coltañob jiñi Yumʌntel woli i ñopob chumtʌl ti ñʌchʼtʌlel. Jiñi Biblia miʼ yʌl tiʼ tojlel jiñi quixtañujob: «Jiñi eʼtijibʌl chaʼan guerra mi caj i sujtel ti eʼtijibʌl chaʼan cholel. Maʼanix mi caj i chʌn chaʼlen contra jumpʼejl tejclum tiʼ tojlel yambʌ. Maʼanix mi caj i chʌn ñopob guerra» (Isaías 2:3, 4).

Mi a wom a ñumen cʌn pejcan ili artículo «¿Chuqui tac mi caj i mel jiñi i Yumʌntel Dios?» yicʼot qʼuele ili video ¿Chuqui jiñi i Yumʌntel Dios?