Cheʼ bʌ miʼ yujtel tsʌts bʌ wocol

Anquese maʼ chaʼlen wersa chaʼan utsʼat miʼ yajñel a ñujpuñijel yicʼot chaʼan tijicña miʼ yajñel a familia, an tajol miʼ tilel chuqui mach bʌ ñaʼtʌbilic a chaʼan muʼ bʌ mejlel i chilbeñet a tijicñʌyel (Eclesiastés 9:11, 12). Pero Dios miʼ yʌqʼueñonla i coltaya cheʼ woli (choncol) lac ñusan wocol tac. Mi mucʼʌch laʼ qʼuel ti ñuc jiñi principio tac am bʌ ti Biblia, mi caj mejlel laʼ ñusan jiñi ñumen tsʌts tac bʌ wocol muʼ bʌ i tilel ti laʼ tojlel.

1 ÑOPO TI JEHOVÁ

MUʼ BɅ YɅL JIÑI BIBLIA: «Acʼʌ tiʼ wenta Dios pejtelel laʼ cʼojol, come woliʼ cʌntañetla» (1 Pedro 5:7). Cʼajtesan tiʼ pejtelel ora chaʼan mach i mulic Dios cheʼ an a wocol tac (Santiago 1:13). Mi mucʼʌch a lʌcʼtesan a bʌ tiʼ tojlel, mi caj i wen coltañet (Isaías 41:10). «Cʼajtibenla Dios ti wocol tʼan pejtelel chuqui wolaʼ ñaʼtan ti a pusicʼal.» (Salmo 62:8.)

Yambʌ muʼ bʌ mejlel i yʌqʼueñet a tijicñʌyel: Jiñʌch cheʼ maʼ pejcan yicʼot cheʼ maʼ wen tsajin jiñi Biblia ti jujumpʼejl qʼuin. Mi cheʼʌch maʼ mel bajcheʼ jiñi, mi caj a qʼuel bajcheʼ Jehová «miʼ ñuqʼuesan lac pusicʼal ti pejtelel lac wocol» (2 Corintios 1:3, 4; Romanos 15:4). Jehová miʼ yʌcʼ i tʼan chaʼan mi caj yʌqʼueñetla mach bʌ añic i pʼisol «i ñʌchʼtʌlel laʼ pusicʼal [...] yicʼot laʼ ñaʼtʌbal» (Filipenses 4:6, 7).

MUʼ BɅ MEJLEL A MEL:

• Cʼajtiben Jehová chaʼan miʼ coltañet a wajñel ti ñʌchʼʌl yicʼot chaʼan utsʼat chuqui maʼ ñaʼtan

• Qʼuele jaychajp muʼ bʌ mejlel a mel chaʼan toj miʼ loqʼuel jiñi woli bʌ a ñaʼtan

2 CɅNTAN A BɅ YICʼOT A FAMILIA

MUʼ BɅ YɅL JIÑI BIBLIA: «Jiñi muʼ bʌ i chʼʌmben isujm miʼ yutsi taj i ñaʼtʌbal. Jiñi wem bʌ i pusicʼal miʼ wen jacʼ i cʌntesʌntel» (Proverbios 18:15). Qʼuele mi an chuqui yomob ti jujuntiquilob yaʼ ti a familia. Chaʼlen tʼan a wicʼotob yicʼot ñʌchʼtañob (Proverbios 20:5).

¿Chuqui yom maʼ mel mi tsaʼ chʌmi juntiquil muʼ bʌ a cʼuxbin? Mach a chaʼlen quisin chaʼan maʼ wʌl bajcheʼ yubil maʼ wubin a bʌ. Cʼajtesan chaʼan Jesús tsaʼ to i «chaʼle uqʼuel» jaʼel (Juan 11:35; Eclesiastés 3:4). Ñucʼ i cʼʌjñibal jaʼel cheʼ utsʼat maʼ cʼaj a wo yicʼot cheʼ wen maʼ wʌyel (Eclesiastés 4:6). Cheʼʌch bajcheʼ jiñi, mi caj mejlel a cuch jiñi wocol.

MUʼ BɅ MEJLEL A MEL:

• Yom maʼ chaʼlen tʼan ti utsʼat a wicʼot a familia cheʼ bʌ maxto añic tsʌts bʌ wocol. Mi cheʼʌch maʼ mel, mach wocolic mi caj laʼ mejlel ti tʼan cheʼ bʌ miʼ tejchel wocol tac

• Chaʼlen tʼan a wicʼot yambʌ wiñicob xʼixicob (quixtañujob) am bʌ i ñusayob wocol bajcheʼ jiñi

3 SɅCLAN A COLTɅNTEL

MUʼ BɅ YɅL JIÑI BIBLIA: «Mi isujm miʼ cʼuxbiñonla laj cʌñʌ bʌ maʼañic miʼ cʌy i cʼuxbiñonla ti pejtelel ora. Junlajalʌch bajcheʼ lac piʼʌl baʼ ora woli la cubin wocol» (Proverbios 17:17). A wamigojob yomʌch i coltañetob pero tajol mach yujilob bajcheʼ yom miʼ melob. Mach a chaʼlen quisin chaʼan maʼ wʌl chuqui a wom tiʼ sujm (Proverbios 12:25). Cheʼ jaʼel, cʼajtin a coltʌntel tiʼ tojlel jiñi yujiloʼ bʌ chaʼan Biblia. Jiñi coltaya muʼ bʌ caj a chʼʌm loqʼuem bʌ ti Biblia mi caj i coltañet chaʼan utsʼat maʼ ñusan majlel jiñi wocol (Santiago 5:14).

Mi caj a taj a coltʌntel mi mucʼʌch a pejcan quixtañujob añoʼ bʌ i ñopoñel (chʼujbiya) yicʼot muʼ bʌ ñopob jiñi tʼan albil bʌ i chaʼan Dios. Cheʼ jaʼel, miʼ mejlel a tijicñesʌben i pusicʼal jiñi chʼijiyemoʼ bʌ. Subeñob jiñi a chʼujbiya am bʌ a chaʼan tiʼ tojlel Jehová yicʼot jiñi tʼan albil bʌ i chaʼan. Coltañob tiʼ pejtelel ora jiñi yomoʼ bʌ coltʌntel i mach a ñajtʼesan a bʌ tiʼ tojlel jiñi muʼ bʌ i cʼuxbiñetob yicʼot muʼ bʌ i cʼojoʼtañetob (Proverbios 18:1; 1 Corintios 15:58).

MUʼ BɅ MEJLEL A MEL:

• Chaʼlen tʼan a wicʼot juntiquil wem bʌ a wamigo i jacʼben i coltaya

• Subu baqui bʌ jiñi a wocol yicʼot chaʼlen tʼan tiʼ sujmlel chaʼan jiñi