¿Bajcheʼ tsaʼ chaʼ ñaʼtʌnti i sujmlel am bʌ ti Biblia?

Jini Biblia tsiʼ wʌn alʌ chuqui mi caj i yujtel cheʼ chʌmenix Cristo, tsaʼ cajiyob ti loqʼuel lot bʌ xcʌntesajob, tsaʼ loqʼuiyob tiʼ tojlel ñaxañoʼ bʌ xñoptʼañob yicʼot tsaʼ caji i yʌlob chuqui tac mach bʌ isujmic tiʼ tojlel i Tʼan Dios (Hechos 20:29, 30). Ti jimbʌ ora, cheʼʌch tsaʼ ujti bajcheʼ jini. Tsiʼ xʌʼtʌyob o xʌbʌyob jini cʌntesa tsaʼ bʌ i cʌyʌ Jesús yicʼot i ñaʼtʌbal winicob xʼixicob muʼ bʌ i chʼujutesañob yan tac bʌ dios (2 Timoteo 4:3, 4). Cheʼ tsaʼix laj qʼuele iliyi, ¿chucoch mi cʌl lojon chaʼan weñʌch bajcheʼ mic chʼʌmben lojon i sujmlel loqʼuem bʌ ti Biblia?

Tsaʼ cʼoti i yorajlel cheʼ bʌ Jehová tsiʼ yʌcʼʌ ti cʌjñel i sujmlel. Dios tsiʼ wʌn alʌ chaʼan cheʼ ti cojix bʌ qʼuin, «mi caj i pʼojlel i [sujm bʌ i] ñaʼtʌbal winicob ti pañimil» (Daniel 12:4). Cheʼ ti jabil 1870, junmojt winicob woli bʌ i sajcañob jini i sujmlel, tsiʼ qʼueleyob chaʼan jini yan tac bʌ ñopbalʌl mach loqʼuemic ti Biblia i cʌntesajob. Jini winicob, tsaʼ caji i chʌn sajcañob i sujmlel bʌ yaʼ ti tsʼijbujel tac, cheʼ jini Jehová tsaʼ caji i yʌqʼueñob chʼujul bʌ i yespíritu.

Winicob tsaʼ bʌ i sʌclʌbeyob i sujmlel cheʼ bʌ tsiʼ wen pejcayob jini Biblia. Jini xPejcaya bibliajob, bajcheʼ cʌmbilob wajali i testigojob Jehová, wen yom i chʼʌmbeñob i sujmlel i Tʼan Dios, jin chaʼan tsiʼ sajcayob junchajp bajcheʼ miʼ pejcañob jini Biblia, jiñʌch woli to bʌ c mel lojon wʌle ora jaʼel. Miʼ qʼuelob ti jujumpʼejl temaj jini muʼ bʌ i pejcañob yaʼ ti Biblia. Cheʼ miʼ tajob jumpʼejl temaj maʼanic bʌ mi chʼʌmbeñob isujm, miʼ sʌclañob yan tac bʌ texto chaʼan miʼ lajob. Cheʼ tsaʼix i chʼʌmbeyob isujm yicʼot jini yan tac bʌ texto, miʼ tsʼijbuñob ti jun. Tsiʼ cʌybeyob tiʼ wenta jini Biblia chaʼan jin miʼ tsictesʌben i sujmlel, tsiʼ tsictesʌbeyob i sujmlel i cʼabaʼ Dios yicʼot i yumʌntel, chuqui yom Dios chaʼan jini winicob xʼixicob yicʼot jini pañimil, bajcheʼ añob xchʌmelob yicʼot jini pijtaya chaʼan miʼ tejchelob chʼojyel. Cheʼ bʌ tsiʼ wen pejcayob jini Biblia, tsiʼ chʼʌmbeyob isujm cabʌl ñopbalʌl tac yicʼot chaʼan mach isujmic chuqui tac tsiʼ meleyob (Juan 8:31, 32).

Ti 1879, jini xPejcaya bibliajob, tsaʼ cʼoti i chʼʌmbeñob isujm chaʼan i yorajlelix miʼ sujbel jini wen tʼan tiʼ pejtelel pañimil. Jini jabil, tsaʼ caji i melob jaʼel jini jun loqʼuem bʌ ti Biblia woli to bʌ i chʌn mejlel ili ora, i cʼabaʼ jiñʌch: Lac Tsictesʌbentel cha’an i Yumʌntel Jehová. Ili ora woliʼ sujbel isujm bʌ cʌntesʌntel loqʼuem bʌ ti Biblia, ti 240 tejclum tac yicʼot cheʼ bʌ ti 750 tʼan tac. ¡Maʼanic baʼ ora ujtem jini subtʼan tiʼ pejtelel pañimil bajcheʼ ili ora!

• ¿Chuqui tsaʼ caji ti ujtel yicʼot jini cʌntesʌntel loqʼuem bʌ ti Biblia, cheʼ bʌ tsaʼ chʌmi Jesús?

• ¿Bajcheʼ tsac chaʼ taja lojon jini i sujmlel am bʌ ti Biblia?