Parte 2
Che’ bʌ tsa’ ñumi jini but’ja’ che’ tsa’ loc’sʌntiyob ti Egipto
Waxʌctiquilob jach cuxul bʌ tsaʼ ajñiyob cheʼ tsaʼ ñumi jini Butʼjaʼ, pero ti wiʼil bʌ qʼuin yonlel ti mil tsaʼ pʼojliyob. Cheʼ jini, lajchʌmpʼejl i waxʌclujuncʼal (352) jabil cheʼ bʌ tsaʼ ñumi jini Butʼjaʼ, tsiʼ yila pañimil Abraham. Mi laj cʌn bajcheʼ tsiʼ tsʼʌctesa Dios jini i tʼan cheʼ tsaʼ yʌqʼue juntiquil i yalobil Abraham i cʼabaʼ Isaac. Cheʼ jini, Isaac, an chaʼtiquil i yalobil, pero Dios tsiʼ yajca Jacob.
Jacob yonlel tsaʼ pʼojli i familia lajchʌntiquil i yalobilob chʼiton bʌ yicʼot lamital xchʼocob bʌ. Jini lujuntiquil i yalobil Jacob tsiʼ tsʼaʼleyob jini ñumen ijtsʼiñʌl bʌ, i cʼabaʼ José, i tsiʼ choñoyob chaʼan miʼ mosojintel yaʼ ti Egipto. Ti wiʼil, José tsaʼ ochi ti ñuc bʌ yumʌl yaʼ ti Egipto. Cheʼ bʌ ora tsaʼ tili ñuc bʌ wiʼñal, José tsiʼ yilʌbe i pusicʼal jini i yʌscuñob chaʼan miʼ qʼuel mi tsaʼix i qʼuextayob i melbal. Tsaʼ cʼoti i yorajlel chaʼan pejtelel i familia Jacob, jini israelob, tsaʼ majliyob ti chumtʌl ti Egipto. Iliyi tsaʼ ujti cheʼ tsaʼ ñumi lujumpʼejl i joʼlujuncʼal (290) jabil cheʼ tsaʼix i yila pañimil Abraham.
Jini yambʌ joʼlujumpʼejl i junlujuncʼal (215) jabil jini israelob tsaʼ chumleyob ti Egipto. Cheʼ tsaʼ chʌmi José, tsaʼ ochiyob ti mosojintel yaʼ ti Egipto. Ti wiʼil tsaʼ yila pañimil Moisés, Dios tsiʼ cʼʌñʌ chaʼan miʼ locʼsan jini israelob yaʼ ti Egipto. Tiʼ pejtelel, tsaʼ ñumi 857 jabil chaʼan tsaʼ bʌ ujti wajali chaʼan ili PARTE 2.