Cʌntesʌntel 35

Jioba tsiʼ yʌcʼʌ i mandar tac

TSAʼ ñumi chaʼpʼejl uw cheʼ bʌ tsaʼ loqʼuiyob yaʼ ti Egipto, jini israelob tsaʼ cʼotiyob yaʼ ti wits Sinaí, yicʼot jaʼel miʼ subentel Horeb. Yaʼʌch baqui Dios tsiʼ pejca Moisés ti jini alʌ teʼ woli bʌ ti lejmel. Jini winicob xʼixicob tsaʼ jijliyob yaʼi; yicʼot tsaʼ jumucʼ jalʼayob.

Cheʼ bʌ tsaʼ cʌli i pijtañob jini winicob xʼixicob, Moisés tsaʼ cʼʌjqui majlel yaʼ ti wits. Yaʼi, Jioba tsiʼ sube Moisés chaʼan yom Jin miʼ jacʼbentel i tʼan tiʼ tojlel israelob yicʼot chaʼan mi yochelob ti cojach bʌ I tejclum. Cheʼ bʌ tsaʼ jubi tilel jini Moisés, tsiʼ sube israelob jini tsaʼ bʌ i yʌlʌ Jioba. Jini winicob xʼixicob tsiʼ yʌlʌyob chaʼan mucʼʌch caj i jacʼbeñob i tʼan Jioba, come yomob ochel tiʼ tejclum.

Wʌle Jioba tsiʼ mele mach bʌ ñʌmʌlic ti qʼuelol. Tsiʼ mele chaʼan jini butsʼ tomocña miʼ loqʼuel yaʼ tiʼ pam jini wits, yicʼot tsiʼ yʌcʼʌ ti tojmel tsʌts tac bʌ chajc. Yicʼot jaʼel tsiʼ pejca jini winicob xʼixicob, tsiʼ sube: ‹Joñon Jioba a Dioson tsaʼ bʌ c locʼsayet ti Egipto›. Cheʼ jini tsiʼ yʌqʼueyob ili mandar: ‹Mach yomic maʼ chʼujutesan yambʌ dios tac cojach yom maʼ ñopon›.

Dios tsiʼ yʌqʼue yambʌ bolompʼejl mandar tac jini israelob. Jini winicob xʼixicob wen woliyob ti bʌqʼuen. Tsiʼ subeyob jini Moisés: ‹Jatet yom maʼ pejcañon lojon, come mic bʌcʼñan lojon mi tsiʼ pejcayon lojon Dios mi caj c chʌmel lojon›.

Ti wiʼil, Jioba tsiʼ sube Moisés: ‹Laʼ ti cʼʌjquel ila ti wits. Mi caj cʌqʼueñet chaʼqʼuejl wechel bʌ xajlel baʼ tsac tsʼijbu jini mandar tac chaʼan miʼ jacʼbeñoñob c tʼan›. Jini chaʼan Moisés tsaʼ chaʼ cʼʌjqui majlel yaʼ ti wits. Tsaʼ jalʼa chaʼcʼal (40) qʼuin yicʼot chaʼcʼal acʼʌlel yaʼi.

Wen cabʌl i mandar tac Dios chaʼan mi yʌqʼuen i tejclum. Moisés tsiʼ tsʼijbu. Dios tsiʼ yʌqʼue jaʼel Moisés jini chaʼqʼuejl wechel bʌ xajlel. Ti iliyi, jiñʌch Dios tsaʼ bʌ i tsʼijbu jini lujumpʼejl mandar tac tsaʼ bʌ i sube ti pejtel jini winicob xʼixicob. Miʼ subentel ti Lujumpʼejl Mandar tac.

Jini Lujumpʼejl Mandar tac wen an i cʼʌjñibal. Pero cheʼ jaʼel jiñʌch yambʌ mandar tac tsaʼ bʌ i yʌqʼue Dios jini israelob. Junchajp jiñʌch iliyi: ‹Yom maʼ cʼuxbin a Dios Jioba ti pejtelel a pusicʼal, ti pejtelel a ñaʼtʌbal, ti pejtelel a cuxtʌlel, yicʼot ti pejtelel a pʼʌtʌlel›. Ili yambʌ jiñʌch: ‹Yom maʼ cʼuxbin a piʼʌlob cheʼ bajcheʼ maʼ cʼuxbin a bʌ ti a bajñelil›. Jesucristo, jini i Yalobil Dios, tsiʼ yʌlʌ chaʼan iliyi jiñʌch chaʼpʼejl ñumen ñuc bʌ mandar tac tsaʼ bʌ i yʌqʼue Dios jini i tejclum Israel. Ti wiʼil muʼto caj lac ñumen cʌn chaʼan jini i Yalobil Dios yicʼot i cʌntesa tac.

Éxodo 19:1-25; 20:1-21; 24:12-18; 31:18; Deuteronomio 6:4-6; Levítico 19:18; Mateo 22:36-40.