Cʌntesʌntel 77
Mi anic to chuqui tsiʼ wis acʼʌyob ti ñoctʌl
¿ANIX ba ubibil a chaʼan ti ajlel jini uxtiquil chʼitoñob? Anix cu, jiñʌch i yamigojob Daniel mach bʌ anic tsiʼ jacʼʌyob i cʼux jini mach bʌ wenic tiʼ tojlelob. Jini añoʼ bʌ ti Babilonia tsiʼ pejcayob ti Sadrac, Mesac yicʼot Abednego. Pero qʼueleyob ila ti dibujo. ¿Chucoch maʼanic woliʼ ñocchocoñob i bʌ tiʼ tojlel jini wen colem bʌ imagen, cheʼ bajcheʼ woliʼ melob yañoʼ bʌ? Laʼ laj qʼuel chucoch tsiʼ meleyob bajcheʼ jini.
¿Cʼajal ba a chaʼan jini mandar tac tsaʼ bʌ i tsʼijbu Jioba, muʼ bʌ i subentel ti Lujumpʼejl Mandar tac? Jini ñaxam bʌ mi yʌl: ‹Mach yomic maʼ chʼujutesan yan tac bʌ dios, cojach joñon›. Jini chʼitoñob tsaʼʌch i jacʼʌyob ili mandar, anquese wocol tiʼ jacʼol.
Nabucodonosor, rey bʌ yaʼ ti Babilonia, tsiʼ choco ti pʌyol yonlel winicob xʼixicob ñucoʼ bʌ, chaʼan miʼ chʼujutesañob jini imagen tsaʼ bʌ i yʌcʼʌ ti melol. Tsiʼ subeyob tiʼ pejtelel jini winicob xʼixicob: ‹Cheʼ mi laʼ wubin ti wustʌl i xulub wacax, yicʼot cheʼ miʼ ñijcʌntel jini arpa yicʼot yan tac bʌ eʼtijibʌl chaʼan música, ñocchocon laʼ bʌ yicʼot chʼujutesanla jini imagen melbil bʌ ti oro. Jini mach bʌ anic miʼ chʼujutesan yicʼot miʼ ñocchocon i bʌ tiʼ tojlel, ti jini jach bʌ ora mi caj i chojquel ochel yaʼ ti horno woli bʌ ti lejmel i cʼʌcʼal›.
Cheʼ bʌ tsiʼ yubi Nabucodonosor chaʼan jini Sadrac, Mesac yicʼot Abednego maʼanic tsiʼ ñocchocoyob i bʌ, tsaʼ wen michʼa. Tsiʼ choco ti pʌyolob. Tsiʼ chaʼ subeyob chaʼan muʼto mejlel i ñocchocoñob i bʌ. Pero jini chʼitoñob tsiʼ ñopoyob chaʼan Jioba mi caj i coltañob. ‹Jini c Dios lojon, woli bʌ c chʼujutesan lojon miʼ mejlel i coltañon lojon›, cheʼob. ‹Pero anquese maʼanic miʼ coltañon lojon, maʼanic mi caj c ñocchocon lojon c bʌ tiʼ tojlel jini imagen tsaʼ bʌ a mele, melbil bʌ ti oro.›
Nabucodonosor tsaʼ wen michʼa cheʼ tsaʼ subenti iliyi. Mach ñajtic yaʼ baqui an jumpʼejl horno, tsiʼ yʌlʌ: ‹¡Ticwisanla jini horno ti wucyajl i ñumel i ticwʌlel!›. Cheʼ jini, tsiʼ sube jini wen pʼʌtʌl bʌ i soldadojob chaʼan miʼ cʌchob Sadrac, Mesac yicʼot Abednego, chaʼan miʼ chojquelob ochel yaʼ ti horno. Jini horno wen ticʌw jax, jini i cʼʌcʼal tsiʼ tsʌnsa jini winicob wen pʼʌtʌloʼ bʌ. Pero, ¿chuqui tsiʼ chaʼleyob jini uxtiquil chʼitoñob tsaʼ bʌ chojquiyob ochel yaʼ ti horno?
Cheʼ bʌ jini rey tsiʼ qʼuele majlel yaʼ tiʼ malil jini horno, tsaʼ toj sajti i pusicʼal. Tsiʼ cʼajti: ‹¿Mach ba uxtiquilicach tsaʼ laj cʌchʌ jini winicob i tsaʼ lac choco ochel yaʼ ti horno woli bʌ ti lejmel?›.
‹Cheʼʌchi, cheʼʌch tsaʼ lac mele bajcheʼ jini›, cheʼen i winicob.
‹Pero woli j qʼuel chʌntiquil winicob woliyoʼ bʌ ti xʌmbal ti cʼajc›, cheʼen jini rey. ‹Maʼanix cʌchʌlob, mi wolic i pulelob yaʼ ti cʼajc. Jini i chʌnticlel cheʼʌch yilal bajcheʼ juntiquil dios.› Jini rey Nabucodonosor tsiʼ lʌcʼtesa i bʌ yaʼ ti i tiʼ jini horno, tsiʼ chaʼle cʼam bʌ oñel: ‹¡Sadrac! ¡Mesac! ¡Abednego! ¡I winiquet bʌ la jini Cʼax Ñuc bʌ Dios, loqʼuenla yaʼi!›.
Cheʼ bʌ tsaʼ loqʼuiyob, ti pejtelel jini winicob xʼixicob tsiʼ qʼueleyob chaʼan maʼanic chuqui tsiʼ chaʼleyob. Cheʼ jini tsiʼ yʌlʌ jini rey: ‹¡Laʼ ñuqʼuesʌntic i Dios Sadrac, Mesac yicʼot Abednego! Tsiʼ choco tilel i yángel chaʼan miʼ coltañob, come maʼanic tsiʼ ñocchocoyob i bʌ chaʼan miʼ chʼujutesañob yambʌ dios, cojach miʼ chʼujutesañob i Dios›.
¿Mach ba jinic wen bʌ cʌntesʌntel, chaʼan lac xucʼtʌlel tiʼ tojlel Jioba?
Éxodo 20:3; Daniel 3:1-30.