CɅNTESɅNTEL 15

Pʌsʌ chaʼan maʼ ñop woli bʌ a wʌl

1 Ts. 1:5 (TNM)

YOM BɅ MIʼ CɅJÑEL: Pʌsʌ chaʼan mucʼʌch a ñop chaʼan isujmʌch jiñi woli bʌ a wʌl yicʼot añʌch i cʼʌjñibal.

Wen chajpan a bʌ. Chajpan muʼ bʌ caj a cʼʌn ti cʌntesa jinto maʼ chʼʌmben isujm jiñi ñuc tac bʌ i cʼʌjñibal yicʼot bajcheʼ miʼ pʌs jiñi Biblia chaʼan isujmʌch. Chaʼlen wersa a tsictesan jiñi ñuc tac bʌ i cʼʌjñibal ti tsʼitaʼ jach bʌ tʼan yicʼot mach bʌ wocolic. Wen ñaʼtan bajcheʼ jiñi muʼ bʌ caj a pʌs mi caj i coltan jiñi woli bʌ i ñʌchʼtañetob. Cʼajtiben i yespíritu Jehová.

Ñopo ti cʼam bʌ tʼan jiñi a discurso chaʼan ñumen tsiquil miʼ cʌytʌl ti a pensar yicʼot chaʼan ñumen wen maʼ ñusan.
Cʼʌñʌ tʼan tac muʼ bʌ i pʌs chaʼan mucʼʌch a ñop woli bʌ a wʌl. Chaʼan maʼañic maʼ pejcan jujumpʼejl tʼan tsʼijbubilix bʌ, alʌ ti bajñel a tʼan. Jiñi tʼan tac muʼ bʌ a cʼʌn yom miʼ pʌs chaʼan maʼ ñop tiʼ sujm woli bʌ a wʌl.
Chaʼlen tʼan tiʼ sujm i yom loqʼuem ti a pusicʼal. Yom cʼam maʼ chaʼlen tʼan. Mi mach lecojic miʼ qʼuelob, yom miʼ sujtel a qʼuel jiñi woli bʌ i ñʌchʼtañetob.

Cheʼ bʌ maʼ pʌs chaʼan mucʼʌch a ñop woli bʌ a wʌl, mach yomic i yʌl chaʼan ñoj tsʌts maʼ chaʼlen tʼan o maʼ chanʼesan a bʌ. Anquese mi caj a chaʼlen tʼan tiʼ sujm, yomʌch maʼ mel yicʼot cʼuxbiya.